الحوار المتمدن - موبايل
الموقع الرئيسي


شيخوخه مبكره..خطيه أبو سراوي

مؤيد حميد

2013 / 2 / 18
كتابات ساخرة



تحسون يا جماعه أنو أبو سراوي ديمر بحاله من الزهايمر..شيخوخه مبكره يعني أكو خلل بدماغه..وهاي جايه نتيجه حتميه للهزات اللي ديمر بيها ومجلب ويريد ثالثه .. هسه دخلص الثانيه وشوف ركبتك وين أتصير وبعدين فكر بولايه ثالثه مدام أكو بطانيات وتنكات دهن وزواج وقشامر بهذا الشعب أبو الجيفه..ومرات هوايه يتصرف تصرفات شاذه ومو طبيعيه وعنده صعوبه بأتخاذ القرارات ومرات هوايه يتراجع عنها..وصايره عنده حالات من الاكتئاب والغضب بسرعه ومن أي شي..ويزعل من أي شي ..حتى مرات مياكل وميصلي وحابس نفسه بمكتبه وميطلع وخايف من كلشي ونومه صاير قلق ويحس أنو كل الناس ضده ..هاي مو شقى صدكوني هاي حقيقه ..والرجل ميذكر شوكت عين هذا وشوكت أجتث هذا.. ويدور عالملفات ألضامها وكت الحاجه.. ومديعرف وين خالها بيامجر جوه جربايته فوك الكنتور وميدري وين ..وديصير عند أبو سراوي تعلق بمدحت المحمود وهو أيعرفه كلش زين قاضي خره وأبن ملعونه وتسبب بقتل هوايه عراقيين .. بس محتاجه علمود ولايته الثالثه ويلكي تفسير قانوني يرفض بيه قرار ولد الزمايل..وكام يهذي وميعرف شلون يصرف..ينطي عهود هوايه بس أتشوفه بعد يومين لو تلاثه يتنصل منها ويكول أني هيج سويت لا ممعقوله..يابه أنت عينت شنشل والجحوشه بمجلس الخصيان صادقو عليه..ميصدك ..هسه النوب سوى نفسه رئيس هيئه المساءله والعداله ..بعد شكو, مخله منصب مصار هو بيه الكل بالكل ..خطيه ..خلوه عمي شيريد أيسوي نفسه خلوه ..هذا مرض فضيع الشر بره وبعيد عن القارين.. بس ربك ميعدي.. يعني لا تخافون منه .. وديصير عنده صعوبه يلكي كلامات مناسبه حتى أيعبر عنما أيريد أيكوله.. ويكرر الجواب أكثر من مره وما يفهم أشجاي أيصير..حتى ميكدر يتحكم ببوله, وميريد يلبس حفاظات, خطيه أبو سراوي..يمكن صارت عنده خوفه من رادو أيزحفون أهل الرمادي ويصلون ببغداد..وتلفت خلايا دماغه من التفكير..هيه خلايا لو ماعون مال باجه..وهو يعرف كلش زين من يوكع المطي تكثر الدفرات عليه.. لان ديشوف الريس مالتنه محد ذكره لا بالسبعه ولا بالاربعين .. حتى مسووله قداس ..وعبالك فرده عتيكه وذبيناها بالزباله .. شعب جبان ومعفن بس أللي كدامه..خو أكو ناس متستحي من الحجايه ..ورادت أحطت ريس بسرعه وتعلس مام جلال لوما أبو سراوي..
سوده عالشعب المصخم..ريس بعد ميكدر لا يحجي ولا يوكف على رجليه ويشتغل عالصمامات ..وريس حكومه أنتشر بيه الزهايمر حتى ملحك يتهنى بولاياته ومحد غناله بس هاي مال ..جذاب جذاب نوري المالكي جذاب ..هيه حلوه أشو بس وحده ماكو بعد.. ولا كشف جدور وشاف شتاكل هاي الوادم ولا طب ببيوت الشعب الخايسه من المطر ولا فتح ثلاجه معفنه ولكاها طافيه لان الوطنيه تجي كل تلاث ساعات ساعه وأبو المولده بكيفه وعالمزاج شوكت ينطيها .. ومحد من ذوله الشعراء الفلته سواله فد بيت شعر لان ما وره كلشي عص ..ولا ركصوله الجهال حتى جهالنه ولد كحبه صايرين ..ليش جنتو لابن صبحه تركصوله ودبمكوله ولابن نوريه حرام وصلت لابن نوريه وشالت هدومها..وجماله أيريد ثالثه ..عمي أخذ أثنين وروح بلندن يمه المره وعيش بالتقاعد وأنتظر منح تجيك أحسنلك ..أذا سويتها وأخذت تلاثه شدو راسكم يا كرعين ..حتى أتبيعنه الورانه والكدامنه.. وميبقى ولا أخو خيته يمشي بالشارع..لان الرجال مو بوعيه, خطيه..
وما خفي كان أعظم





التعليق والتصويت على الموضوع في الموقع الرئيسي


اخر الافلام

.. فرحة للأطفال.. مبادرة شاب فلسطيني لعمل سينما في رفح


.. دياب في ندوة اليوم السابع :دوري في فيلم السرب من أكثر الشخص



.. مليون و600 ألف جنيه يحققها فيلم السرب فى اول يوم عرض


.. أفقد السقا السمع 3 أيام.. أخطر مشهد فى فيلم السرب




.. في ذكرى رحيله.. أهم أعمال الفنان الراحل وائل نور رحمة الله ع