الحوار المتمدن - موبايل
الموقع الرئيسي


ارد اسئلك يا وطني ياعراق اجونا ثلاث امراء وزيادة

ماجد العذاري

2013 / 2 / 21
كتابات ساخرة




ارد اسئلك يا وطني ياعراق اجونا ثلاث امراء وزيادة

وزيادة
ارد اسئلك يا وطني
ياعراق اجونا ثلاث امراء وزيادة
واحد غني واضنه حواسم وزياده
وواحد غبي وغباه بالوراثة وزياده
وواحد جذوب وما ينعقل جذبه وزياده
كلي
امير من الحواسم تخلص افلوسه وزياده
والغبي ينتهي بضربة حذاء وزيادة
والجذوب اله يوم و ينكشف جذبه وزياده
وهم اريد اسئلك
ياعراق اجونا ثلاث اشيوخ ونص وزيادة
واحد مطرب بليل والصبح شيخ وزياده
والثاني طالبله دشداشه وعكال وزياده
والثالث اشعث وقذر وريحته نتنه وزياده
كلي
شيخ مطرب بالليل لان العرك دسداس وزيادة
وشيخ يطلب الدشداشة اقراء عليه السلام وزياده
وشيخ نتن ما ينظف لا بقاصر ولا بديتول وازياده
كلي
اخذ مني وللجميع هاي النصيحه وزياده
الي ابوه وجده شيوخ هو الشيخ وزياده
وما يتغير الردي لا بعكال ولادشدادشة وزياده

بحثت كثيرا واستنجدت بالعم كوكل واستنجدت بباحث ومؤرخ عراقي عن ظاهرة تزايد الامراء والشيوخ بعد
2003
وجدتها
كازدياد نسبة الكولسترول في الدم او كزيادة الوزن او كزيادة كثافة الضباب او كزيادة نسبة سقوط الامطار او كزيادة سيارت السايبه او كزيادة السيطرات او كزيادة التصريحات او كزيادة السرقات او كزيادة ملفات الفساد او كزيادة هروب السجناء والوزراء المختلسين وكزيادة الهلاهل في البرلمان
فلم اجد شيء اسمه امير الا في ثلاث حالات
الاولى
امراء واميرات العائلة المالكة والشاهد لحد الان في بغداد مدينةالمنصور يوجد شارع اسمه شارع الاميرات نسبة الى بيت العائلة المالكة الموجود لحد الان
والثانية
امير ربيعة رحمه الله واسكنه فسيح جناته وبيتهم في المنصور شارع 14 رمضان
والثالثة امير الطائفة الايزيدية
وهذه الحالات الثلاثة منذ تاسيس الحكومة العراقية في عشرينيات القرن المنصرم
زين اغاتي
نجي هسه على امراء ما بعد 2003 بين يوم ويوم يطلعنا امير اشلون هذا صار امير ومنو الي سواه امير شنو صناعته محلية اصلي لو معاد لو استيراد ومنين مستورد
وشنو مواصفاته هذا الامير الجديد
لو هم دمج
مثال
يطل علينا امير عشائر ال ـ ـ ـ ويندد ويصرح ويتوعد ويتهدد وهناك يطل علينا شيخ عشيرة الامير ويقول ان فلان الفلاني بدون ان يقول امير ان ما يصرح به انما يمثل شخصه ولا يمثل العشيرة
ادري هي عشيرة لو وكالة من غير بواب
مثال اخر
يطل علينا امير عشيرة وليس عشائر
هنا اختلف الاخ موديله
تك باب اسبورت
ويصرح بخرابيط وشخابيط على شنو ما تعرف شيريد الاخ متعرف ليش صاير عصبي متعرف
واتشوف بصفه مجموعة للاسف من لابسي عقل وعبائات عربية وهم يهتفون له بقبضات الايادي ويهوسون له على اي انتصار على اي انجاز ماكو شي كله خرط وكلام فارغ
مثال اخر
السادة المسعولون يجتمعون بامراء وشيوخ عشائر موديل 2003 وصاعدا
زين اغاتي
اتريدلك واحد بيه فد شوفه امرتبه فد كلام امعدل فد موقف واضح كلها تفتر ورى ابو الكاميرا خاطر يطلعله ثانية او ثانيتين من يشوف اكو لقاء مع احد الشيوخ الذين اجتمعوا لملوم
مثال اخر
دخلت على موقع منتدى احدى العشائر ويحمل اسم
موقع منتدى امراء عشيرة
ال ـــــ
هنا الشغلة صارت بالجملة امراء هسه احنا بالمفرد ما عرفناهم انوب بالجملة اتشوف بهذا المنتدى شيء عجيب
مدير المنتدى امير المشرف امير االاعضاء كلهم امراء الزائرين كلهم امراء الطركاعة كلهم امراء زين شنو هو منتدى لو معمل حليب البان ابو غريب
مثال اخر
يطل علينا احد الامراء في منصة ساحات الاعتصام وانا اتحمل كافة التبعية القانونية عن كلامي شخص اعرفه جيدا في سبعينيات القرن المنصرم بعت لوالده سيارة فولفو حمراء اللون حجم 244
بالاقساط ومعدل القسط عشرون دينار شهريا والده الله يرحمه عرفت بعدما بعت له السيارة يعمل في التهريب يعني قجقجي والسيارة باسمي فخفت ايروح ايسويله مكسورة ويجبوني بامكانه وبقت عليه 3 اقساط طلع روحي وما دفعهن الله يرحمه ويسامحه وبريء الذمة ليوم الدين اتصلت باحد الاصدقاء مدير شرطة ويعرف مدير شرطة المنطقة التي يسكن فيها والد الامير موديل 2003 فارسل في طلبه وتنازلت له عن الاقساط بس تعال عمي سجل السيارة وخلصنا والان ابنه امير ونعم الامير الي هسه يحجي كله بالوطنيات وهو ما خله شي ما هربه من العراق العظيم
لا والمصيبة المعتصمون رفضوه رفض قاطع واعلنوا انه لايمثلهم
اشلون امير هذا قجقجي
ــ ـ ـ ـ ـ ـ ـ
زين اغاتي
نرجع على الشيوخ ما بعد 2003
اوووووووووووووووووووووووووف
ان جان كلبك لوعوه كلبي بدريل وبوكلن حفروه
لايحق لي مقارنة الشيوخ الاصلاء النجباء الكرماء بمثل هذه الجوكة مال شيوخ هل وكت
لكن فقط للاستدلال او الاستشهاد وليس المقارنة
لان شيوخ العراق ايم زمان الله يرحم الماضين ويطيل عمر الباقين كانوا على مستوى من الثقافة الاجتماعية والعشائرية تجده يناقشك في كل شيء في المنطق والفلسفة والاعراب والقانون والطب
مع العلم اغلبيتهم لم يدخلوا المدارس لكنهم تدرجوا في الحياة من اكبر جامعات العالم الا وهي مضايف ابائهم واجدادهم وتلقوا دروسهم من تطبيق عملي يحدث امامهم يوميا تجدهم سريعي البديهية ويقراء في عيون الضيف ما في داخله دون ان يتكلم يعرفون كيف يوصلون الموضوع الى المقابل بطرق علم النفس دون دراستهم لعلم النفس تجد احدهم يتكلم وكانه بروفسور في علم النفس
يعرف متى يتكلم وكيف يتكلم ومع من يتكلم ويعرف كيف يجعل المقابل ينطق ويصرح عما في داخله بطرق هادئة
هي الشغلة مو مال صياح ولبس عكال وعباية وكول اني شيخ عمي الشيخ شيخ ما يرادله علامات فارقة
علاماته الفارقة موقعه الاجتماعي الذي توارثه عن ابائه واجداده وهو يكمل مسيرة ما بداء عليه ابائه واجداده
كلنا نعرف ان مضيف الشيخ مفتوح للخطار للغريب للاصدقاء لابناء العشيرة ليلا ونهارا وسابقا كانت المضايف عبارة عن خيمة شعر ومع تطور الزمن تطورالمضيف واخذ يتفنن المعماريون في تصاميمه وبنائه واني اعرف ان اغلب المضايف ابوابها مشرعة دوما يعني مفتوحة ليل ونهار واعرف بعض المضايف اصلا مابيها باب اي بمعنى الباب ملغي دلالة على انه في اي وقت يدخل الزائر او الغريب او صاحب الحاجة
مثال
العلامات المرورية عالميا انها للاستدلال وارشاد الشخص الى المكان الصحيح وتوضع كل عشرة كيلو متر بين قطعة واخرى
زين اغاتي لا تستعجلون واتفكرون شنو علاقة العلامات المرورية بالموضوع

فد يوم ذهبت الى احد المحافظات وقبل ان اصل الى مركز المحافظة انتبهت الى لوحة اعلانات صارخة الالوان تجلب انتباه الشخص وتضر نظره لقباحة الالوان
القطعة مكتوب عليها التالي
انت على بعد 30 كيلو متر عن مضارب ومضيف الشيخ فلان الفلاني
وبعد عشرة كيلو مترات اخرى شاهدة نفس القطعة ولكن بالوان انكس من الالوان السابقة ونفس الكليشة وصادف انها قرب احد مطاعم الطرق الخارجية وقد اوقفت سيارتي لشراء قنينة ماء بارد ودفعني الفضول لقرائة لوحة الاعلان هذه التي تشير الى مضارب الشيخ
واذا فيها كتابة اوقفت عقلي
تدرون شكاتب الشيخ صاحب المضارب والمضيف
المضيف يفتح من الساعة العاشرة صباحا الى الساعة السادسة مساء
نعم هذا هو المكتوب
المضيف يفتح من الساعة العاشرة صباحا الى الساعة السادسة مساء
زين بربكم شنو هذا مضيف لو مجمع مشن للاطارات
ادري هو مضيف لو مجمع السنك التجاري
ادري ليش بالعشرة يالله تفتح شيخنا
تتنتظر البورصة علما اتفتح
شنو دوام مال دائرة خاصة
بربكم هذا شيخ
بربكم هذا يستحق يطلق عليه شيخ
ــــــــــــــــــــــــــــ
مثال اخر لشيخ اخر موديل 2003 وصاعدا
اني اعرف الشيخ لايقول عن نفسه انا شيخ ولا يقدم نفسه للاخرين انه شيخ وسبق وان اشرت في احد مواضيعي البسيطة عن احد شيوخ العراق الاصلاء عندما سئلت ابنه لماذا والدك لايكتب تحت اسمه شيخ
جاوبني ابن الشيخ اعزه الله
والله عاد الي ما يعرف ابوي شيخ هاي مشكلته
نرجع الى شيخ ما بعد 2003
اولا كاتب على باب بيته قطعة برونزية مستطيلة الشكل في وسطها كلمة
منزل
بخط ناعم بسيط
وتحتها كلمة
الشيخ
بخط عريض جدا
زين بربك يا شيخ هوبيتكم لو لاء
خاطر تكتب عليه منزل
يعني شنو كراج تصليح سيارات
لو محل تجهيزات منزلية
طبعا بيتكم وانته مهمود بيه
والله اليدري منين حوسمته ليش كاتب قطعة بباب البيت
منزل الشيخ فلان الفلاني
ـــــــــــــــــــــــــــــ
مثال اخرلشيخ اخر موديل 2003 وصاعدا
شيوخ هل وكت اتشوف دائما وياه فد جوكة مال عفطية شلايتية ومن يوكف يم محل او يسلم على ناس راسا ايصيحون انطوا مجال لشيخ فلان او يسلم على واحد راسا ينط واحد من هاي الجوكة اقدملك الشيخ فلان الفلاني
تدرون بس عايزة ايسويله اعلان في برنامج
اكو فد واحد
بربربكم هذا شيخ لو
قره قوز
ـــــــــــــــــــــــــــــــــــــــــــــــــــــ
مما تقدم اعلاه ان الله عز وجل ابتلانا بهذه الاشكال التي عاشت في الارض فسادا واخذوا يتملقون الى الحكام والمسعولين عسى ان يرمى اليهم عظمة من كتف لانهم متعودين على العظام مال المزابل اناس لايفقهون اي شيء في اي شيء
واخير
مزور والله امزور لاخط ولا نخله فلا فسفوره
امزور والله امزور والعباس امشور بيه امزور والله امزور





التعليق والتصويت على الموضوع في الموقع الرئيسي


التعليقات

1 - تعددت الالقاب
النبهاني ( 2013 / 2 / 21 - 17:20 )
تحياتي للكاتب وما ابدع
لايتوقف الامر عند الشيخ والامير بل الظاهره تجاوزت الى القاب اخرى منها السيد والحاج والاستاذ والبعض الاخر يلهث راكضا وبشتى الطرق للحصول على حرف الدال ليضعه مقدم لاسمه
وما ندري شراح يجي النوب بعد ما خلصنا من رفيقي وسيدي

اخر الافلام

.. جريمة صادمة في مصر.. أب وأم يدفنان ابنهما بعد تعذيبه بالضرب


.. عاجل.. الفنان محمد عبده يعلن إصابته بمرض السرطان في رسالة صو



.. انتظرونا غداً..في كلمة أخيرة والفنانة ياسمين علي والفنان صدق

.. جولة في عاصمة الثقافة الأوروبية لعام 2024 | يوروماكس




.. المخرج كريم السبكي- جمعتني كمياء بالمو?لف وسام صبري في فيلم