الحوار المتمدن - موبايل
الموقع الرئيسي


أم در

مزمل الباقر

2013 / 2 / 24
الادب والفن


أم در



وين الاقي زيك
يا السمحة يا بت القبايل
يا أم در(1) أمان الخايف
يا أما حنون بتضايف
وسديرا دايماً لاقف
ضامي الشقي وتعبان
حامي الطريد والخايف
لي عيالا
شدراً وارف
غيماً تقيلا
شايل
في
عز الهجير الصايف
بيتاً حنين .. وموالف
مابياباهو إلا الهايف
***
ليك تحية
وألف .. هدية
من زولاً .. متيم بيك
في صحو .. حالم بيك

يصبح ويمسي
عليك
ما انت ليهو .. مصير
ومسك منتهى وختام

هاديهو ... نور وجناتك
شايل معاهو حنانك
مناهو بس يرضيك
دايماً وطوع بنانك
***

أنساك؟ كيف انساك؟
وقلبي الغرق في هواك
رضع الشجاعة .. في صدرك
وحيبا بين اسود
وديانك
***

ليك الخليل(2) كم غنى
وشدا بى حنين
ومحنة
وقال فيك .. أحلى
قصيد
زي البيوصف جنة
ساكناها حور .. ومحنة
طيورا دايماً صادحة
خضرة وثمار
تتدنى
***
وأنا لما الليل ما سود .. وبهم
قت اقولي قصيدة
لام در تزين
جيدا
لى
احلى عروس في جديدها
لي وردة في جنينة ... فريدة
تصدح طيورا ... تغني
ودايماً تكون
غريدة
***
أم در ... حبيبتي براي
أم در .. شجني وشقاي
أم در .. فرحي وهناي
مليتي لي الدنيا
وحبك جرى في دماي
صورتك هي ديمه .. معاي
صارة الفرح في توبا
فايته ومعاها اساي
***
أشيل في اسمك
وأردد
ياعقيق ( عازة ) وتبيرا
يا الشامخة .. يا النخلة المديدة
يا السامقة .. ما هامة بي
زمن .. المحل
زمن .. الجفاف
زمن .. الوجل
زمناً .. زي لون .. مسايرك
زي .. كحل
زي ليلاً جافاهو .. قمر
***
وتبقي شامخة ,,
سامقة .. اكتر
حتى لما ضلام الليل ... يطول
تابا .. شمس الله .. تشرق
تابا .. تطلع
نلقى جبينك .. ضي ونور

نوراً .. بيفضح ضلاماً فوقنا .. هوم
نوراً .. بيفضح ضلاماً فينا طول





مزمل الباقر
الجمعة 30 مايو 1997م
امدرمان





التعليق والتصويت على الموضوع في الموقع الرئيسي


اخر الافلام

.. صعوبات واجهت الفنان أيمن عبد السلام في تجسيد أدواره


.. الفنان أيمن عبد السلام يتحدث لصباح العربية عن فن الدوبلاج




.. الفنان أيمن عبد السلام يتحدث عن أسباب نجاح شخصية دانيال في ل

.. فيلم ولاد رزق 3 بطولة أحمد عز يقفز لـ 193 مليون جنيه منذ طرح



.. عيد ميلاد خيرى بشارة.. بصمات سينمائية مميزة وقدم عمرو دياب و