الحوار المتمدن - موبايل
الموقع الرئيسي


شريان

مزمل الباقر

2013 / 3 / 14
الادب والفن


شفتي .. الورد
اللي اتفتح .. تحت
الشفة
لما بسيمتك .. فاحت .. فجأة
وسرب .. الطير
الطاير ..
ساعة الضحكة
خلى .. وراهو
حوض .. بيكادلي
علي الخدين ..
وشتلات .. فل
وكم .. إكليل
من .. ياسمين
***
زورق .. زورق
كان بتمرجح
في ... حدق العين
لما .. ترقرق
فيهو .. الدمعة
***
والموج .. الضارب
حنه
تحت سما .. الطرحة
الأزرق
كان ................... متماوج
كان بيتاوق .. في لون .... الشفق
الغارب
اللابساهو .. بلوزة
وجيد .. الصيدة
الواجهني .. لمن قمتا
اسلم
كان بيسلم
***
وداخلني الظن
انو .. الليلة .. اليوم الرابع
بعد العشرة
في الشهر .. التاني
بالأفرنجي...
وانو .. القديس فالنتاين
كان فارد .. البسمة
بطول الوش
لمن شافك ... داخله
علينا ..
داخلة علينا .. معاك الغيمة
***
وحسيت بي .. فيض الفرحة
الدافق
قرب .. يغرق فيني
الشوق
وكيف الفرحة .. تكون
لمن يبسم لي .. الحظ
مرة
***
وكنا .. بنطلع
ومرة .. بننزل
وكنت بدور ...
السكة .... تطول
إلا .. وصلنا
بسرعة الفجة ..
ووسعت بيك .. الضيقة
***
اترجيتك
شأن تتأخري
شويه معايا
ثانية .. معايا
أشربي شاي .. أو .. كاكاو
خلي الصيف .. الجانا
مباغت ..
يفرد للنسمة .... مساحة
قدر .. الشوق
***
وانتي النسمة
انتي الغيمة الجات
مبتسمة
وبي .. بسمة
فرد .. بسمة
مسحتي .. ساعات حسرة
سكنت فيّ .. ثلاث أيام
وشوق .. متعذب
لهفة ...
داب في .. ساعتو
لمن .. طلعت .... شمسك
فيهو .. لمن شفتك
***
ياتو .. ورد
شايلاهو .. بفاطرك
ياتو .. بلابل
في .. ضحكاتك
جاتنا ... تغرد
وياتو ... دعاش سقتيو
معاك ....
ياتو ... تساب
***
زي النرجس
كانت النظرة
زي ريلة بتشرب
كنتي
شويه .. شويه
وكنت .. بعاين
في عينيك
شفع بلعبو .. تحت القمرة
شليل ...
وكمين شافعة .. بتلعب
حجلة ...
وناس من بدري ..
علي الحواشة
ووردية المصنع
وناس بتساسق .. جنب
المشرع
تشيل . وتخت
تشيل .. وتخت
تشيل .. وتخت
في رمش ... العين
قامت شتلات
كانت بتفرهد .. لما تغازل فيها النسمة
إحساس .. الخصب
وغيمن .. شايل
إرهاص بالخير
والخصب الشال .. الجدب
الوسع .. ماعون
البركة
وابتسم ... الغد
***
وناس .. البلد
الرقصو معاك .. دليب
مردوم .. جراري
شايلين . درقة .. وسيف
سفروق .. وحراب
احباب .. احباب
غنوا معاكي .. في حدق العين
ولمن صوتك ..
مر علي .. الأرض البور
بتق فيها قموح وعيوش
ولمن صوتك
مرة علي .. الناس التمسح
عرق التعب .. الكاتل
حيلا
صوتك .. مر .. عليها
نساها .. اساها
والتعب الكان .. جواها
مالي مساحة ...
ولمن صوتك .. مر عليّ
ملا وجداني .. عشم
مكان الصي
وأداني .. بشارة
بأجمل غد
وتأشيرة فال.. بإنو
المحن
دايمن .. ضيفات
ما مضايفات
وإنو .. الضيق
الفاتح خشمو
باكر ينسد
فيهو الحلق
باكر .. زمن الفرح
الجاي
علينا .. دميرة
وشايل .. محل الحزن
الكان .. عامينا
الكان عامّينا
وانتي جميلة
وطبعك .. أجمل
وأنا .. بالحيل
دايرك زي نيل
محفورة بحجرات قلبي ..
وكاتلك .. ريدي
انا قاصدك .. بختام الحجوة
عريس وعروس
وجنيات سمحين
انا قاصد ... أهلك
وجاييك بالدرب
عدييييل



مزمل الباقر
امدرمان في 7 ابريل 2005م الاربعاء





التعليق والتصويت على الموضوع في الموقع الرئيسي


اخر الافلام

.. صعوبات واجهت الفنان أيمن عبد السلام في تجسيد أدواره


.. الفنان أيمن عبد السلام يتحدث لصباح العربية عن فن الدوبلاج




.. الفنان أيمن عبد السلام يتحدث عن أسباب نجاح شخصية دانيال في ل

.. فيلم ولاد رزق 3 بطولة أحمد عز يقفز لـ 193 مليون جنيه منذ طرح



.. عيد ميلاد خيرى بشارة.. بصمات سينمائية مميزة وقدم عمرو دياب و