الحوار المتمدن - موبايل
الموقع الرئيسي


مسنجر بين الجنّة وجهنّم - 1

كامل علي

2013 / 7 / 25
كتابات ساخرة


متعوس ومحظوظ صديقان منذ الطفولة، قبض عزرائيل روحيهما اثر نسف انتحاري نفسه في بغداد.
في يوم الحساب عبر محظوظ الصراط بسهولة (عبالك بهلوان مال سيرك) ودخل الجنّة، امّا متعوس فسقط في اوّل خطوة خطاها على الصراط (عبالك تيغة مال البيتونة وجمالة مسوّين طسّة اصطناعية) ودخل جهنّم وبئس المصير.
بعد فترة اكتشفا وجود مقاهي للانترنت في الجنّة وجهنّم. في فترات الاستراحة كان يسمح للنزلاء بارتياد هذه المقاهي واستعمال الحاسبة الالكترونية. بالاستعانة باليّة البحث كَوكَل تمكن متعوس من اكتشاف ايميل محظوظ وبذلك تمّ الاتصال الالكتروني بينهما ودار بين الصديقين الحوار التالي في المسنجر:
متعوس: اشلونك خوية محظوظ، شكو ماكو يمكم؟
محظوظ: زين خوية، كلشي اهنا دهنو دبس، انت اشلونك، اشلون الوضع يمكم؟
متعوس: والله موزين، سلكَونه سلك، ماكو هيجي حر حتّى بالعراق من ينكَطع القوّة بتموز بصاية وزير الكهرباء والحكومة الخايسة والبرلمان الجايف.
محظوظ: لتدير بال يمعود احنه العراقيين متعودين عل الحر اكيد الحر يمكم زلاطة بالنسبة الك.
متعوس: خوية كَللي صدك اكو يمكم فَيْ وانهار من خمر ولبن وعسل؟
محظوظ: لعد اشلون، شتريد اكو، عرك زحلاوي ومستكي وويسكي وبراندي وفودكا.
متعوس: ايباخ، اشلون فاتتني هاي السالفة، غير حظ اغبر عندي، بالدنيه عذاب، بالكَبر عذاب وهسّة عذاب، بس اشلون عذاب لو تدري؟
محظوظ: احجيلي بالله.
متعوس: شكَوللك خوية، اول ما جابوني اهنا ركَع دونكيات وتفلات، بعدين شدّوني بزنجيل طوله سبعون ذراعا، بعدين اجه واحد عتوي عبالك سعلوّة ديسموه زبانية طوله يطلع فد خمس امتار شالني وذبني بنص النار، ردت انهزم اشوف هل عتوي لزمني من خوانيكَي وشمرني هلمرّة ثلاثميت متر بنص اللهب، فد كَووي هذا ولا عدنان القيسي واشلون عكسيات يضرب الله ليشوفه لحّد.
محظوظ: زين اشلون مامتت؟
متعوس: ياموت يابه هذي فد طركَاعة ماكو مثله، جلدي صار فحم، بعد اشويّة طلعلي جلد جديد ابيض مثل جلد مارلين مونرو، ودك حرك طول اليوم.
محظوظ: تعني دك عيني دك مو؟ زين اكل اشلون؟ مدتموتون من الجوع؟
متعوس: هاي هم حاليّها شعبالك، اكو اهنا فد شجرة ديسمّو شجرة الزقّوم وجماله دتثمر بس اشلون ثمر عبالك رؤوس الشياطين.
محظوظ: اشلون دتاكولوها مطبوخة لو هيجي؟
متعوس: لا يمعود بليّة طبخ ماتنجرع، لعلمك الطاقة الحرارية اهنا ببلاش كل مكان ديحترك، بارحة سوّينا باجة مال رؤوس الشياطين بس بدون ملح وليموندوزي.
محظوظ: زين الباجة متحتاج ماي اكو ماي يمكم؟
متعوس: لا يابا يا ماي، اكو فد شي مثل الماي ديسمّوه غسلين.
محظوظ: مدكَوللي شنو غسلين خوية؟
متعوس: هو مثل الماي بس اثخن شويّة،ولونه وطعمه مثل الجراحة اللي تطلع من الجرح وراما تلتهب.
محظوظ: هسّة افتهمت، كَلبي ويّاك متعوس احزنت عليك اهواية ولو يكَولون ماكو احد يحزن بالجنّة.
متعوس: اشو اخذتني حاصل فاصل،احجيلي شكوماكو يمكم؟ صدك اكو حوريّات وكواعب اترابا مثل ما كَللولنه، ولو لهسّة ماافتهمت شنو كواعب اترابا، مدكَوللي شنو معناها.
محظوظ: ضحّكتني متعوس، كواعب اترابا معناها انّو الحوريات مميات مالتهن كَويّة مثل جعب رجلك يعني مو مثل مالت صاحبتك العجوز والحوريات كلهن شابّات بنفس العمر.
متعوس: زين انت اتزوجت وحدة من ذوله؟
محظوظ: ها ها ها... يا وحدة يابا...لك اشكد متريد ماكو تحديد.
متعوس: كللي زوجتك متغار، ماسوّت مشكلة؟
محظوظ: المرة يمكم ما تدري؟
متعوس: محظوظ صدك وين تنام ويّة الحوريات، اقصد وين تمارس السكس؟
محظوظ: وين متريد، اهنا ماكو مستحه عبالك نادي العراة مال اوروبا، بس انطونا بيوت حيطان مالته كله جامخانة وتكَدر تشوف الحدايق اللي تجري من تحتها الانهار من غرفتك، والبيوت مو مبنية عل الكَاع، عالية شويّة .... فد خمسين متر.
متعوس: اشلون اتطب بالبيت، اكو درج لو مصعد؟
محظوظ: انت ظل بهلعقليّة، يادرج يامصعد يابطيخ، بابا احنه كلنه نكَدر نطير مثل سوبرمان.
متعوس: مامعقولة زين ميصير اصدام بالهوا، اكو ترافيك لايت؟
محظوظ: طبعا اكو، اهنا كلشي تكنولوجيك شعبالك.
متعوس: ها نسيت اسالك منتشربون العرك تسكرون لولا؟
محظوظ: لعدشلون شنو فايدة العرك اذا متسكر؟
متعوس: اكو عرك قجق.... اقصد عرك هبهب؟
محظوظ: ها ها ها متجوز من سوالفك العتيكَة، شتريد اكو، دتعال يمنه فد يوم خطّار وشوف بعينك اذا مدتصدك.
متعوس: اشلون اجي يابه وهل عتوي اربع وعشرين ساعة مكَابلني؟
محظوظ: مااخاف عليك فد يوم تكَدر تدبرها، الكَيلك واحد قجقجي خلي يطلّعك، متتذكر اشلون طلعنا قجق من العراق .
متعوس: لتذكرني بلعراق وطركَاعة ومصايب العراق، لو هسّة يكَوللولي تكدر ترجع كما كنت والله ما اقبل وداعتك محظوظ.
محظوظ: ليش حبيبي؟ عراق ورا السقوط مو احسن من جهنم؟
متعوس: لا والله مو احسن، ذوله الامريكان وربعنا الاحزاب الدينية السنيّة والشيعيّة كَاليبيها كَلب لا ياعمّي لا اهنا اروح، اكو كهرباء اكو غسلين والحطب بلاش اخذ اشكد متريد ودنسوّي باجة وتكّة كل يوم. ليش متعرف الوضعيّة اهناك؟ جاك الواوي جاك الذيب، لا يابه لا اهنا احسن ولو ربعنا الحكّام كلهم اهنا بس اهنا غير شكل اللي يحجي زايد يشكّون حلكَه شك.
محظوظ: صدك ده تسوون باجة، لك خليتني اموت من الضحك،والله مرّات داضوج اهنا بالجنّة، لا نكات ولا هم يحزنون، يومية عرك وسكس، ضجت اريد اسمع فد اغنية مال داخل حسن لو اركص جوبيّة ماكو، مرّات اشتهي جكاير يكولون ممنوع لانها تلوّث الجو وتثقب طبقة الاوزون.
هاي الشغلة متنراد، راح اقدّم عريضة حتى يرجّعوني للعراق، صدك من كَال الشاعر:
وطني لو شغلت بالخلد عنه نازعتني اليه في الخلد نفسي
متعوس: والله انت بطران، هو بقى وطن، بقه صخام لو بقت اغاني، اشو كلله لطمية وزناجيل وانفجارات، دكَعد راحة، اذا رحت ويامن اسولف؟
محظوظ: صدكَ ما عرفت ليش ذبّوك جهنم؟
متعوس: علمود فد بزّونة، حسب ما سمعت من واحد من الزبانية ما ادري صدك لو جذب فد يوم اني لازم البزّونة اللي جانت تاكل الطيور مالتي بالسطح ودك عليها بالخيزران. زين انت اشلون دخّلوك للجنّة؟
محظوظ: اني هم علمود فد بزّونة طلّعتها من فد بير.كَللي شفت جورج دبليو بوش اهناك؟
متعوس: زين ذكّرتني، هذا اول ما جابوه يمنه ربعنه العراقيين شبّعوه كفخات وكَام صاحبنا يصيّح : فوكَ ما جبتلكم ديموقراطية وخلّصتكم من صدّام هيجي تسوون بيّه، هاي مخالفة لحقوق الانسان.
محظوظ: تتذكر متعوس فد يوم امام الجامع بالخطبة اشكَال؟
متعوس: لا والله،هو بقت ذاكرة اهنا، مو حركَوا دماغي الف مرّة.
محظوظ: كَال الامام انّو اكثرية اهل النّار من النسوان والزناكَين واكثرية اهل الجنّة من الفقراء والمكَاميع، كَللي هذا الحجي طلع صدك يمكم لو لا؟
متعوس: بالنسبة للنسوان صح اهنا داشوف اهواية نسوان، بس الزناكَين مو اهواية.
محظوظ: حجَيك صحيح يمنه بالجنّة اكو اهوايه زناكَين.مرّة سالت واحد زنكَين اعرفه كَتله اشلون دبّرتها؟ كَللي: جان عندي فلوس اهواية، من كثرت ذنوبي رحت للحج سبع مرّات وللعمرة سبع مرّات فرجعت كما ولدتني امّي بدون ذنوب.
متعوس: شنهي السالفة حتّى اهنا عندك عبّاسي انت على راسي، ماعندك عبّاسي روح لتدوّخ راسي.
محظوظ: شعبالك مسامع الفرس شيكَولون بلمثل مالهم؟
متعوس: شيكَولون؟ نوّرني.
محظوظ: بارة خدانيست، قاضي الحاجتست.
متعوس: كلشي ما افتهمت، شنهي معناها؟
محظوظ: الفلوس مو الله، لكن تقضي الحاجات مال انت.
ذيج اللحظة انكَطعت القوّة نتيجة احتراق القابلو الرئيسي وصرّح الناطق الرسمي باسم الزبانية بانّ تطاير الشرر من بعض اجزاء السعير سبّبَ انقطاع القوّة في جميع ارجاء جهنّم...... يتبع.





التعليق والتصويت على الموضوع في الموقع الرئيسي


التعليقات

1 - استمر عزيزي الكاتب استمر ..
أوميد ( 2013 / 7 / 25 - 11:15 )
واتا اقترح ان يسووها مسلسلات تلفزونية بعد رمضان ( حتى لايسيئون الظنون بك ) ! اشلون حوار حلو معبر خلينت كلنا نريد نروح يم منحوس هم نشّد من أزره هم مين نجلس في اوقات الراحة نستمتع بكلامه الساخر الجميل ونتصل مع محظوظ ليعطينا الاخبار الدقيقة والحساسة ولكن المهم أخيرا ان نلكي ( قجغجي ) يوصلنا ذاك الصوب .. وللعلم ان التدخين مسموح في الجنة على قاعدة كل شىْ مكروه في الدنيا فأنه محبوب ومرغوب في الآخرة !!!

2 - التدخين
كامل علي ( 2013 / 7 / 25 - 11:52 )
تحية للعزيز اوميد وشكرا لمعلومة التدخين بالمناسبة الحلقة الثانية منشورة سابقا وستجدها في موقعي لان الحلقة الاولى لم تنشر بسبب الرقيب فنشرتها اليوم بعد التنقيح

3 - متعوس اني بالخدمه
سلوم السعدي ( 2013 / 7 / 26 - 09:49 )
تحيه استاذ علي
اذا تحتاج قجغجي يعبرك للجنه اني بخدمتك بس بشرط تعطيني عشر تنكات غسلين و تبقى بيهه من المساء حتى قبل طلوع الشمس ودير بالك لا تضيع تك من نعالك وتسوينه مشكله
تحيه للجميع

4 - عزيزي كامل علي
أوميد ( 2013 / 7 / 26 - 15:46 )
تحياتي للكاتب المبدع والى موهبيته في الكتابات الساخرة ، لقد طالت عددا مقالاتك الجميلة بقدر مايسمح به الوقت ولدى ملاجظتين اولهما فيما يخص عذاب القبر والمحادثة مع هيكل وجيكل فابلنسبة للكردي فهو يكدر يدبرها مثا ما كان يدبرها في بغداد وفي السيطرات ىالعسكرية على الطرق وكان فنانا في التزوير والقجغ ! المشكلة مع اليابانيين والالمان وغيرهم..وفيما يخص موضوع الملكة بلقيس فمن الواضح وسياق القصة الخيالية ان سليمان افتتن بها فهي حسب الاوصاف الت تمتلكها الملكة بلقيس اثارت غرائز والرغبات الجنسية للنبي سليمان واخيرا هل تعلم ماذا كانت هدية بلقيس الى سليمان في ذلك الصندوق ؟؟!!

5 - هدية بلقيس
كامل علي ( 2013 / 7 / 27 - 19:32 )
عزيزي اميد
عندم حضرت بلقيس كان عندي اجازة مرضية ولكن اعتقد ان الهدية كانت كيلو من القهوة اليمنية لان اليمن-سبأ- مشهورة بالقهوة والقات فقط

6 - عزيزي كامل
أميد ( 2013 / 7 / 27 - 22:03 )
لا يا أخي انت حسن النية كثيرا ..الهدية (وأنا سمعتها من العجايز عنما كنت صغيرا ) وكانو يذكرونها بصوت خفيض وعلى أستيحاء فيما بينهم وانها كانت هدية حساسة جدا وانا ايضا ( استحي ) ! ..من ذكرها فهل تفطن اليها يا ترى ؟!.. ...

اخر الافلام

.. فيلم ولاد رزق 3 يحصد 175 مليونا خلال أسبوعين


.. المخرج محمد الملا يكشف لصباح العربية أسرار من الفيلم الجديد




.. أسباب غياب الفنان عبدالله رشاد عن الساحة الفنية


.. -كان ودي نلتقي-.. دويتو يجمع بين الفنانين عبدالله رشاد ونوال



.. -نحتاج أكاديمية لتطوير مدراء الأعمال-.. الفنان الدكتور عبدال