الحوار المتمدن - موبايل
الموقع الرئيسي


أزهى عصور الكوميديا

حلمى حمدالله
كاتب ومفكر

2013 / 9 / 7
كتابات ساخرة


ازهى عصورالكوميديا .....



تعيش مصر الأن ازهى العصورالديمقراطيه السياسيه ....بل وتخلق علوما سياسيه جديده لم ينزل الله بها من سلطان من قبل ....اذ تدخل حياتنا السياسيه فجأه امور غريبه فجأه.... ويخرج منها ايضا
امور غريبه فجأه ...... وتعبت من المفجأه ونزلت دمعتى....


ف...سبحان العاطى الوهاب ......بعد الشبشب والقباب ...يعطى بدون حساب ...فبعد عصور طويله من حكم الرئيس الأوحد.... الزعيم الملهم... صاحب اعمده الحكمه السبعه .......لدينا فى مصر الأن... رئيس مخلوع ورئيس معزول ورئيس مؤقت ...رئيس سابق ورئيس اسبق ....رئيس منتخب ورئيس معين ....رئيس فى السجن ورئيس تحت الإقامه الجبريه ...بالمناسبه ....مبارك تحت الإقامه الجبريه وللمفارقه بموجب قانون الطوارئ.... يعنى لو مفيش قانون طوارئ مكانش حد قدر ييجى جنبه ....بس شوف حكمه ربنا...وعشان ربنا مابيرضاش بالظلم .... قانون الطوارئ اللى فضل حطه على رقابينا 30 سنه هو اللى حدد اقامته ....وبالمناسبه... برده كده مبارك داخل التاريخ داخل يعنى باعتباره تانى رئيس جمهوريه تفرض عليه الإقامه الجبريه بعد محمد نجيب... الله يرحمه ....ماعلينا ...وعندنا برده .....مرشحين سابقين للرياسه ....ومرشحين محتملين للرياسه...ورؤساء احزاب ....وزعماء جبهات.... ونائب للرئيس المعين ...استقال... فى اول سابقه تاريخيه من نوعها ان يستقيل اى مسئول فى مصر لأى سبب كان ...الجديد بقى ان تانى يوم نسمع ناس تطالب بأحالته للمحاكمه بتهمه خيانه الأمانه .......ويظهر ان الحكومه كانت ماسكه عليه كمبيالات او شئ من هذا القبيل ....او الهابيل
...

وبعد ما كناش لاقيين اد عشرين تلاتين واحد نعمل بيهم مظاهره ضد حصار اسرائيل لغزه ....يتظاهر مؤيدو مبارك بكل حريه امام مستشفى القوات المسلحه بالمعادى ....المقر المختار الجديد لمبارك .......احتفالا باخلاء سبيله...بينما تلغى 6 ابريل مظاهراتها منعا للفتنه واختلاط مظاهريها مع الأخوان ...وتحولها الى مناطق مستهدفه ...... من البلطجيه طبعا ......رابع اقوى جيش فى العالم "جيش البلطجيه"....ويطلق عليهم احيانا الطرف التالت ....فى اشاره واضحه لتدخلهم بين اى طرفين فى المعادله السياسيه فى مصر ...


وبعد ان كانت اقصى امانينا....ان يفعل قانون محاكمه الوزراء الذى صدر فى الستينات ولم يستعمل قط ...وقيل لنا انه المدخل الوحيد لمحاكمه اى مسئول فى مصر ان شالله حتى يكون مسؤول فى وحده محليه فى بنها ....او رياح فى المنوفيه...عشان يتحاكم....تظهر بلاغات بالعماله والتخابر وتلقى اموال من الخارج للكل .... بدايه من البرادعى ومرسى.... ومرورا باسماء محفوط واسراء عبدالفتاح وعلاء عبدالفتاح ونهايه بحمود بدر بتاع تمرد ....اى والله .....بالإضافه الى قيادات الإخوان بالطبع ...وتحقيقات مع جميع مرشحى الرئاسه عن اموال حملاتهم الإنتخابيه ...لدرجه انى خايف اكلم سليمان البواب ليكون عميل ل ...س اى ايه والمسئول عن الخلايا النايمه فى بولاق او الكلاب الميته فى الوراق....


و يعلن حمزاوى الليبرالى ....استاذ العلوم السياسيه.... اعتزال الحياه السياسيه ....وبينما يجهز الأعلامى الجهبذ ....توفيق عكاشه... نفسه ليكون ممثلا للشعب فى اول برلمان منتخب بعد ثوره 30 يونيو...ولا نجد اعلاميين جدعان ... طالما كانوا يعبرون عن صوت الحريه مثل يسرى فوده وريم ماجد ولا حتى بلال فضل ...بلاش ....دا حتى علاء الأسوانى معدناش شايفينه ...ومتهيألى مفيش ولابرنامج ممكن يشرب بيريل ويستضيفه دلوقتى ...بينما يرتع مرتضى منصور على جميع القنوات ويشتم فى كل الإتجاهات.....

اما الشعب اللى عمره ما تكلم فى السياسه استبدل الكوره بالسياسه وبدل ما كان عندنا 90 مليون حسن شحاته بقى عندنا 90 مليون .....مرشح محتمل لرئاسه الجمهوريه .....بيتكلموا فى السياسه ...


تحس كده اننا مخطوفين ذهنيا... على راى الجهبذ بتاع الشرطه

ويقولك العسكر حموا الثوره ....والإخوان هما الى عملوا الثوره.... وكأن الثوره دى كانت ايام الف ليله وليله وبيحكوا لنا عنها ...وكأننا ما عشنهاش ...محدش حمى الثوره الا الى عمره ما قال انا عملت ثوره... والى ماتوا فى جناين مصر ...وبتوع المولوتوف الى مرسى قال عليهم بلطجيه ...... وفتح علينا بدالهم الطفح الى ولع باكبوراتات مصر...

ويصف المؤرخون 30 يونيو على انه كماله لثوره 25 يناير ....وكأنها كانت ثوره الكشرى ...ودقه الربيع العربى ....ماشى ....وطبعا .....سلاطاته وبابا غنوجه التى لا يستغنى عنها الشعب ....كحظر التجول والطوارئ والذى منه .... ........

ويتحفنا التليفزيون المصرى كعادته ....بنشرات اخبار تتفوق على الدراما التركيه ......تحس كده انها ولا مشويات ام حسن ....مش مصدق ان دا تليفزيون... دريه شرف الدين وزيره اعلامه .... الحقيقه اعلام دريه ......لاشرف ......ولادين .................وكأن لاثوره قامت ولا حسنين...

وعندى احساس حقيقى ان مصر بقت ولا الامم المتحده ...لأن البعض يتحدث عن عدوان رباعى
....ومؤامره شيطانيه امريكيه اسرائيليه اوروبيه قطريه...
او كما قال الاستاذ العظيم فهمى هويدى اصبح لدينا نموذج للثوره تركى رومانى "منسوب الى رومانيا وليس روما" جزائرى باكستانى ...اى والله قال كده
لقد هرمنا ........هرمنا ..........هرمنا ياولاد ........





التعليق والتصويت على الموضوع في الموقع الرئيسي


التعليقات

1 - تسعين مليون
هانى شاكر ( 2013 / 9 / 7 - 00:48 )

تسعين مليون
______


و كِترنا فى ألعدد و بقينا 90 مليون .. منهم 75 مليون تحت خط ألفقر .. عايشين فى ألشوارع و ألمقابر و ألعشوائيات .. و مافيش فى مصر أنسان واحد شجاع وشريف يقف و يقول بطلوا خلفة 2 مليون طفل جديد كل سنة ... لا ليهم هدوم ولا أكل ولا علاج ولا مدارس ولا ملاعب و لا شُغل و لا حتى مراحيض

بلا نيلة

...

اخر الافلام

.. أسرة الفنان عباس أبو الحسن تستقبله بالأحضان بعد إخلاء سبيله


.. ندى رياض : صورنا 400 ساعةفى فيلم رفعت عينى للسما والمونتاج ك



.. القبض على الفنان عباس أبو الحسن بعد اصطدام سيارته بسيدتين في

.. تأييد حكم حبس المتسبب في مصرع الفنان أشرف عبد الغفور 3 سنوات



.. عاجل .. إخلاء سبيل الفنان عباس أبو الحسن بكفالة 10 آلاف جنيه