الحوار المتمدن - موبايل
الموقع الرئيسي


آلو .. مظاهرة 3

أحمد زحام

2013 / 12 / 13
الادب والفن


آلو ... مظاهرة 3
أحمد زحام
المشهد الثالث
( إظلام منطقة وسط خشبة المسرح .. مع إضاءة الجانبين .. خيال لشخصين على جانبي المسرح )
صوت 1 : آلو
صوت 2 : آلو
صوت 1 : انت رحت فين ؟
صوت 2 : أنا موجود
صوت 1 : أنا عايز مظاهرة
صوت 2 : بقالك يومين عايز مظاهرة ، ما تكنش عايزني أعملك أنا المظاهرة ؟
صوت 1 : ياريت .
صوت 2 : عايزها مظاهرة ديلفري
صوت 1 : والله فكرة عبقرية
صوت 2 : أنت بتضيع وقتك ووقتي ، فيه طلبات كتيرة مستنية على الخط .. أنا مضطر بعد اذنك
أقفل الخط ..
( اظلام تدريجي لصوت 1 )
صوت 2 : مين على الخط ؟
صوت 1 : أنا
( إضاءة تدريجية لنفس المكان السابق )
صوت 2 : انت تاني
صوت 1 : ما نا حاجز رقمين لمظاهرتين .
صوت 2 : قول خلصني .
صوت 1 : عايز أعمل مظاهرة تانية .
صوت 2 : هو انته عملت المظاهرة الأولى عشان تعمل المظاهرة التانية
صوت 1 : يعني عايزني أخالف القانون ...
صوت 2 : ايه الدوشة اللي عندك دي ؟
صوت 1 : لا دا صوت البابور .. اصل الجماعة اللي في البيت بيحبوا يدفوا عليه
صوت 2 : قول طلباتك
صوت 1 : انا ( كمن يفكر ) هاطلع بمظاهرة من شارع يوسف عثمان لشارع
صوت 2 : استنى
صوت 1 : أنا قولت حاجه غلط
صوت 2 : فين شارع يوسف عثمان ؟ أيوه ايوه .. دا شارع بيتكم
صوت 1 : اكمل
صوت 2 : كمل .. كمل
صوت 1 : لشارع يوسف عثمان
صوت 2 : يعني ها تاخد الشارع رايح جاي
صوت 1 : تمام
صوت 2 : هاتبقوا كام واحد في المظاهرة دي
صوت 1 : حسب التساهيل
صوت 2: لأ حدد لي العدد .. عشان أعرف ها جيب كام عسكري أمن مركزي
صوت 1 : يعني ممكن تقول كده عشره عشرين تلاتين
صوت 2 : يعني انت عايز على الاقل تلت عربيات أمن مركزي .. كل عربية فيها تلاتين أربعين
عسكري
صوت 1 : وما تنساش تجيب كام قناة فضائية .. وعشان خاطري ما تجيبش التليفزيون المصري
صوت 2 : ليه .. انت ما بتحبش تلفزيون بلدك
صوت 1 : باحبه .. بس هو مابيحبنيش من بعيد لبعيد
صوت 2 : خلصني وايه كمان
صوت 1 : ولو حصل وخرجنا على القانون ، ما فيش داعي لرش الميه
صوت 2 : بس الخطوة دي من أول خطوات فض المظاهرات
صوت 1 : بلاش منها للجو برد برد قوي . قوي .
صوت 2 : وجماعة حقوق الانسان نعمل معاها ايه ؟
صوت 1 : من امتى وانتو بتهتموا بحقوق الانسان ؟
صوت 2 : يعني انت عايز تقول ان احنا بننتهك حقوق الانسان
صوت 1 : استغفر الله العظيم انت اللي لسه قايل
صوت 2 : خلصنا عشان نعملك تصريح
صوت 1 : ولو قبضتم على حد مننا
صوت 2 : ( مقاطعا ) لو خالف القانون .. تحب نستأذنه قبل ما نقبض عليه ؟
صوت 1 : استغفر الله العظيم انت اللي لسه قايل .. نستأذنه
صوت 2 : وها تبدأ المظاهرة الساعة كام
صوت 1 : مظاهرة ايه ؟
صوت 2 : اللي انت طالب لها تصريح
صوت 1 : انت قدامك تليفزيون
صوت 2 : قدامي أهو
صوت 1 : هات البي بي سي
صوت 2 : جبنا محطة البي بي سي
صوت 1 : فيه مظاهرة ؟
صوت 2 : فيه مظاهرة
صوت 1 : انا باكلمك وانا ماشي في المظاهرة .. احنا لسه مخلصين المظاهرة الآن ..
( اظلام ) .................................................. يتبع





التعليق والتصويت على الموضوع في الموقع الرئيسي


اخر الافلام

.. عام على رحيل مصطفى درويش.. آخر ما قاله الفنان الراحل


.. أفلام رسوم متحركة للأطفال بمخيمات النزوح في قطاع غزة




.. أبطال السرب يشاهدون الفيلم مع أسرهم بعد طرحه فى السينمات


.. تفاعلكم | أغاني وحوار مع الفنانة كنزة مرسلي




.. مرضي الخَمعلي: سباقات الهجن تدعم السياحة الثقافية سواء بشكل