الحوار المتمدن - موبايل
الموقع الرئيسي


بابايا

صموئيل ميشيل نسيم
(Samuel Michel Nessiem)

2014 / 2 / 23
الادب والفن


أنت قبل الوجود موجود
خالق الكل وصانع الوجود
ضابط الكل بأيد ممدود
ولما كنت في الرحم كان لي في مشيئتك وجود
أنا المحدود كنت فكرة في عقلك الغير محدود
وبأمرك أديتني كيان أنا الإنسان
وطيني أنا خليته جسد أصلك في أبداعك أعظم فنان
وكبرت وكبرالكيان معايا
سيبتك هجرتك وجريت ورا خطايا
قلبي أندفن في ترابها
والجسد لسه ماخلص الحكاية
شامم ريحة عفن من قلبي الحجر
والشر فيه هايم لغاية ما أنفطر
مفيش حد يقدر يرجعله اللي خلاص انكسر
نحات – نحات وماسك أزميل بس ولا عفرة تنشطر
ده القلب بقي كتلة حديد ملهوش في الخدش
بس مفيش غيرك اللي يقدر يفتت عفني ويرمي الدبش
ده القلب من غيرك ميت ماينفعش مايشتغلش
أصل في الأصل روحي كانت حتة منك
ونفسك لقلبي يحرك
كان زمان بتقولي أنت ابني
وأنا أرد وأقولك وأنت كمان أبويا
ولما كبرت حبتين لقيتك ثابت في كلامك ماتتغيرش وتقولي وتتندهلي ابني
بس عشان أنا أصلاً تراب والطبع جوايا تراب بطلت أقولك أبويا
بطلت أتكلم معاك واتباهي بأنتمائي ليك
مهو أصل الخطايا قتالة بقي ليها سلطان علي القلب اللي بقي مش ليك
مرات أقول لما تتعبني الخطية وتسحلني في الأرض سحل (بابا) راجعلك
وأول مالسه بتيجي تطيب جراحي أبعد عنك
بجري بجرحي من يوم ليوم ولسنة لسنة مهو الوقت ملهوش عازة
والدم نازل نزف خلاص معنديش دم مفيش دم
القلب مات وأندفن وبقي رمة وعفن وقربت الجنازة
وطافح – طافح الشر من جوة لبره ومن بره لجوة
مع أن الجسد لسه فيه الرمق بيتحرك
لسه بيتحرك بس بخطوات تقيلة
والقلب جواه ساكت ما بينطق
وقف طيني يشيع جيفته اللي جواه
والتراب عليه خلاص ردم
وطيني أنا لا بيبكي ولا يتكلم
خلاص حسه انكتم
مهو صاحب أحساسه مات وهو اللي راح دفن
وروحه بقيت بقايا ملفوفة في كفن
حتي كفنه أسود زي لون العفن
وخلاص خلصت الحكايه بس طيني لسه ما أندفن

لا .لا بقي لسه للحكايه جزء تاني
ده رويتي لسه ماانتهتش
لسه كلام وكلام ماتقلش
منا قولت أن طيني لسه ما اندفنش
ده طيني أصله غالي علي اللي تفل عليه
كل حبه منه ليها ذكري فيه
ولسه ملامح وشي منحوته في أيديه
والشر مهما طال أمده يقدر في لحظه يمحيه
حتي لوكان قلبي اللي مات هو الشر يغربله وينقيه
بأديه شال تراب قبري
والعفن جوه ملهوش مكان
بقي ليا ريحه تانيه ورجعني طفل زي زمان
طفل لا ليه في الخبث ولا الشر والفجر ولا للف والدوران درايه
طفل لا يفهم البر من الخطايا من معني كلمة شظايا
طفل رجع تاني يقول لربه أبويا (بابايا)





التعليق والتصويت على الموضوع في الموقع الرئيسي


التعليقات

1 - للتواصل معي
صموئيل ميشيل نسيم ( 2014 / 2 / 23 - 17:45 )
My page on facebook to contact with me:
poems with Samuel Michel

2 - بابايا
مجدى زكريا ( 2014 / 2 / 23 - 19:18 )
انت اللى قتلت بابايا

اخر الافلام

.. وفاة زوجة الفنان أحمد عدوية


.. طارق الشناوي يحسم جدل عن أم كلثوم.. بشهادة عمه مأمون الشناوي



.. إزاي عبد الوهاب قدر يقنع أم كلثوم تغني بالطريقة اللي بتظهر ب

.. طارق الشناوي بيحكي أول أغنية تقولها أم كلثوم كلمات مش غنا ?



.. قصة غريبة عن أغنية أنساك لأم كلثوم.. لحنها محمد فوزي ولا بلي