الحوار المتمدن - موبايل
الموقع الرئيسي


ها كاكه حمه حنّيت للبرنو والجبل ؟

أياد السماوي

2014 / 3 / 3
مواضيع وابحاث سياسية


ها كاكه حمه حنّيت للبرنو والجبل ؟
الناس كلها ما مصدكة الاخبار الي تكول كاكه حمه سد الماي على الوادم من سد دوكان , ويريد همينه يسدّه من سد دربندخان , وهاي الاخبار تكول هذا رد حكومة كاكه حمه على موضوع الموازنة العامة , الي تريد منه الحكومة أن يسلمها النفط الي يبوكه , لوزارة النفط وياخذ حقه من هاي الموازنة حاله حال اخوته العراقيين , معقولة هاي كاكه حمه تسد الماي على الوادم ؟ ليش هو الماي ملك ابو واحد حتى تسدّه على الوادم ؟ بعدين منو سواها كبلك وسد الماي على العالم ؟ تدري كاكه حمه أنت بهاي عملتك السودة , انطيت مبرر وشرعية لتركيا هي هم تقطع الماي عن دجلة والفرات الي يجرون من أراضيها , باجر همينه تركيا تكول انا بعد ما انطي ماي للعراقيين , لو ينطوني نص النفط مال العراق , شتكول كاكه حمه حقها تركيا إذا كالت هيجي لو لا ؟ .
كاكه حمه انت تدري أكثر انهار العالم هي انهار مشتركة وتشترك بيها أكثر من دولة , وهاي الدول أكو قانون دولي ينّظم العلاقة بينها , يعني الحجاية مو تايهة وكلمن يعجبه و يقطع الماي عن باقي الدول , ولو كان الحجاية تايهة وماكو قانون ينّظمها جان من زمان تركيا قطعت الماي عن سوريا والعراق وشاركتهم بمواردهم , مع العلم تركيا دولة مستقلة مو إقليم لا زال حتى هاي اللحظة هو جزء من دولة إلها سيادة ويحكمها دستور وقانون , ونت تعرف موضوع الماي بالدستور هو من اختصاصات الحكومة الاتحادية الحصرية , ومو من حق حكومة الإقليم أن تقوم بقطع الماي عن باقي المحافظات .
كاكه حمه شنو سالفتك أنت جاي تجس نبض الحكومة وتشوف شنو ردة فعلها على فعلتك الشاينة ؟ لو أنت حنّيت للبرنو والجبل وعيشة أيام زمان ؟ وهاي عيشة النعيم والاستقرار ما متعلم عليها ؟ كاكه حمه تره هذا الي تسويه هو إعلان حرب وتمرّد وعصيان على الدولة والدستور والقانون , ونت تعرف شنو نتيجة الي يتمرد على الدولة والقانون ؟ كاكه حمه تره القانون ما يخاف من واحد ويسحك أكبر واحد مثل ما تنسحك الخنفسانة تحت الرجلين , وخاف عبالك أنت جذّبت الجذّبة على روحك وصدّكتها , ويتصوّرلك أنت صرت أقوى من الدولة العراقية , تره هاي وسوسة شيطان , ولا تخلي الشيطان يضحك عليك ويلعب بعقلك .
وأريد هم بدربي أمر على هذولة الماعدهم حظ وبخت ويكولون الحكومة تفتعل الأزمات , بله بدينكم و معبودكم هاي هم الحكومة راحت وشوشت بذان كاكه حمه وكالتله روح سد الماي على العالم ؟ خو افتهمنا النفط الي صارله سنتين يبوكه كاكه حمه ويبيعه وما ينطي درنوح للدولة , تكولون هاي مشكلة افتعلتها الحكومة لأغراض انتخابية , هذه هسه الأزمة هم افتعلتها الحكومة لأغراض انتخابية ؟ أنا اريد هذولة الي يطلعون يوميا على الفضائيات ويشتمون برئيس الوزراء , أريد واحد منهم فد يوم يحجي بربع ضمير ويكول معشار الحجي الي يحجيه على المالكي , أنا ما أكول لا تحجون على المالكي لو اسكتوا عن أخطاءه , بس لازم الواحد يصير حقّاني وخايف الله ويحجي العدله ويكول على الغلط غلط وعلى الصح صح , وعيب على الزلم الي تظم روسها مثل النعامة , هذه قضية وطن , وكاكه حمه ما خله لهذا الوطن أي هيبة ولا ذرة من احترام السيادة , ونسه دماء العراقيين الي قاتلوا الديكتاتورية على جبال كردستان من جان هو دهن ودبس وي الدكتاتور , وماكو داعي نذّكره لكاكه حمه اشلون من جان يوكف جدام صدّام ويبوّس بمتونه , وهسه صايرلي عنتر شايل سيفه ويهدد العراقيين بكطع الماي عليهم , ما يدري هاي فعلته محد سواها بس الشمر من كطع الماي على الحسين وأصحابة بيوم عشرة محرم , والي يكول هذا الحجي بيه تحريض على أخوتنا الأكراد , كولوله أنت جذّاب ومنافق ولوكي , والأخ الي يبوك أخوه ويكطع عنه الماي , أحنه متبّرين من خوته , وهيجي خوّة ما نريدها . وكلمة أخيرة لكاكه حمه , لا تخلي راسك براس العراق , تره أنت صفر على الشمال أمام العراق .
أياد السماوي / الدنمارك





التعليق والتصويت على الموضوع في الموقع الرئيسي


التعليقات

1 - الاخ الكاتب ..وبدون تهكم !
اْرام ( 2014 / 3 / 2 - 22:31 )
المواطن الكردي غير مسؤول ولا يعرف مالذي يجري والذي يتذكره ان القادة الكبار هم الذين عزلوا الدكتور الجعفري وجاءوا بالمالكي عن سبق اصرار وكانو متفقين على كل شيىْ وعلى كل الطلبات والذي يبدو ان المالكي قد انتبه اخيرا الى ما جرى ويجري فيحاول انقاذ ما يمكن انقاذه ! ..

2 - ! ها..كاكة حمد
اْرام ( 2014 / 3 / 3 - 21:32 )
أشو ما ترد و لاتجاوب ؟!

اخر الافلام

.. تفاصيل قانون الجنسية الجديد في ألمانيا| الأخبار


.. صحيفة العرب: -المغرب، المسعف الصامت الذي يتحرك لمساعدة غزة ب



.. المغرب.. هل يمكن التنزه دون إشعال النار لطهو الطعام؟ • فرانس

.. ما طبيعة الأجسام الطائرة المجهولة التي تم رصدها في أجواء الي



.. فرنسا: مزدوجو جنسية يشغلون مناصب عليا في الدولة يردون على با