الحوار المتمدن - موبايل
الموقع الرئيسي


المراية.. نص بالعامية المصرية.. إلى زيزو وبهاء

مختار سعد شحاته

2014 / 4 / 29
الادب والفن


المراية..
" إلى زيزو وبهاء الحالميين"
----------------------------------------------------------------------------------------

دقق ف المراية هناك جواك وقولي:
شايف إيه؟
شايف عيل لسه بيحلم؟!
حلمه معافر؟! حلمه معاند؟!
عارف ليه؟
علشان بصيت على سطح مرايتك
ع التناتيش..
قرب حبة.. حاول.. دقق
شايف إيه؟

بص لجوه كمان جوه زمان كان حلمه بيضحك
وبيتلخص بس ف لمسة إيدها
وصوتها الهامس ع التليفون
لما أخوها ويمكن أبوها
ضله يبان ف شعاع النور الكاتم على أسرار حكاياتكم نص الليل
من تحت عتبها،
وكحة صوته بتربك كل أحلامكم
دقق حبة .. حاول.. دقق..
شايف إيه؟

شِعرك لما تقوله عليها؟
شعْرك وأنت بتحكي ولافف خُصَلُه على سبابتك
عايز تفهم سر الرابط بين شفايفها وطعم البن؟!
لما بتحكي عن ضحكتها بطعم المشمش
عن قطتها
عن تدوينها،
عن فستانها،
عن سُمرتها مبتعكرش حليب برائتها قبل النوم
أو تندهلك باسم تحبه من أول يوم
قرب حبة.. حاول.. دقق
شايف إيه؟

كام خربوش على وش مرايتك؟
ميهمكشي
جرب تمسح على خرابيشها وشوف الصورة
حتة جديدة ف زاوية بعيدة جوه مرايتك
كات متسامحة لما الشمس تعدي على شباكك
وسابت ليك حبة نور جنب الحيط
كات عيّناهم لما تضلم كل الشيش
وأما تدندن كات تتجن .. غني منير..
علي ف صوتك.. قولي بحبك..
غني "إمبارح كان عمري عشرين"
قرب حبة.. حاول.. دقق
شايف إيه؟

نفس العيل لسه بيحلم جوه مرايتك..
بص لجوه..
دقق حبة..
مش محتاج غير فرك عنيك


مختار سعد شحاته
Bo Mima
روائي
مصر/ الإسكندرية





التعليق والتصويت على الموضوع في الموقع الرئيسي


اخر الافلام

.. أون سيت - اعرف فيلم الأسبوع من إنجي يحيى على منصة واتش آت


.. أسماء جلال تبهرنا بـ أهم قانون لـ المخرج شريف عرفة داخل اللو



.. شاهدوا الإطلالة الأولى للمطرب پيو على المسرح ??


.. أون سيت - فيلم -إكس مراتي- تم الانتهاء من تصوير آخر مشاهده




.. أون سيت - فيلم عصابة الماكس يحقق 18 مليون جنيه | لقاء مع نجو