الحوار المتمدن - موبايل
الموقع الرئيسي


( ألمن نوجه العتب ) / لمناسبة شهادة أمير المؤمنين علي بن أبي طالب عليه السلام

حامد كعيد الجبوري

2014 / 7 / 18
الادب والفن


_موال


ألمن نوجه العتب والفرج سده العلي
بسمك علي جلبوا وزوراً بأسمك علي
باطل نهج سيرتك وداس أبصلافه علي
أبدم البشر يا (علي) يبني الوطن ساسه
مهره وحسبنه اله وبكل درب ساسه
أضمن صلاح الوطن لو تنصح الساسه
مظلوم هذا الشعب وخصم السياسي علي
-----------------
مابين ( الصميده ) والرصيف أسرار..
عميقه وأمتلك برهان للفكره
الرصيف أيلم يتامه وأرمله وجوعان..
و(علي ) كبته ملاذ وتحضن الفقره
----------------
لا تكتب قصيدة وتنتقد مسئول..
القصايد للمدح مو للشتم تكتب
وإذا أتعرفه حرامي كول أنظف أيد..
وهم شايف سياسي أيسلب وينهب
وإذا يبني قصر من دمعة الأيتام ..
الفقره أتبرعتله وعالدمع يركب
وأبد لتظن يحرمك كهرباء أبيوم..
من حرصه علينه أيخاف نتكهرب
وجريمه الحصه ينطي وبالرجل تنداس..
وحرام أتخيس عدنه وبالزبل تنذب
( حيدر ) مو سياسي وباك حب الناس..
ولأن باك الكلوب أتشرعنت ينسب
ولأن ربك حجبها الدعوة المظلوم..
جار الظالم بأحكامه وأستجلب
---------------
المؤمن من جحر ما يلدغ مرتين..
سفينتكم خراب وما بعد نركب
سود أوجوهكم بيّض أوجوه هواي..
غسلتوا للزنيم العار والأجرب
ما نكدر نقارن بالأمس واليوم..
البانيه الشعب بيديكم أتخرب
كراسيهم خشب وأمريكه أرضتها..
طيحت جم عرش بيه حاكمه جلب
يتهدم الكرسي المنبني أبلا ساس..
ودمعات اليتامه أمن الجمر ألهب
يرتج العرش من دمعة الأيتام..
وعلى أدموع اليتامى الكون ما يحجب
حيدر ما ملك كرسي الخشب هيهات..
كلب فوك الكلوب وعرشه يتنصب
-------------

دخيلك يا علي طاحت كصص للكاع
ومد أيد الرذيله الجائر وأذنب
يستر عالحرامي أيهادن القاتل..
السيوف أيحدها بينه وللخصم أرنب
تعلمنه الكفخ من كثرة الجويات..
دامنه المذله وبيه نتلقب
تتخورس زلمنه الكثرة الطكات..
لامومن حجه ولا ثاير أتوثب
ولا صاحب بخت ويصيح بينه الله..
ولا تصحى الضماير لا كلب يشغب
دخيلك يا علي ما تحضر الشدات..
ياهو الينتخي ويا كرسي يتعتب
مقفول الفرج وأنسدت البيبان..
طحنه أبغيرتك ما غيرك أمنتب
دخيلك يا علي (ألمن بعد مذخور)..
معسره وطحنه بيها والطفل شيّب
سيفك يا علي المنذور للإسلام..
حفاظ الشريعه وباني للمذهب
--------





التعليق والتصويت على الموضوع في الموقع الرئيسي


اخر الافلام

.. سكرين شوت | صناعة الموسيقى لا تتطلب آلات فقط بل أيضاً إحساس.

.. أول ظهور لفنان العرب محمد عبده بعد إعلان إصابته بالسرطان




.. «جمع ماشية ورحيم ومرادف البؤس».. أسئلة أثارت جدلًا في امتحان

.. تششيع جنازة والدة الفنان كريم عبد العزيز




.. تشييع جثمان والدة الفنان كريم عبد العزيز.. وتعديل موعد العزا