الحوار المتمدن - موبايل
الموقع الرئيسي


قهوة العيد

جهاد علاونه

2014 / 7 / 28
كتابات ساخرة


قهوة العيد ليست كقهوة الصباح التي اعتدنا عليها, إنها تؤلم المعدة بسبب كثرتها وتؤلم الرأس ولا تستطيع أن ترفض من يد الناس فنجان قهوتهم...وفي أول أيام العيد الواحد مننا بعوف حاله على قد ما بشرب قهوه (سادى) وبوكل حلو وكعك, يا جماعة الخير كل ما أفوت على واحد من جيراني أو من أقربائي فورا بدير عليّ فنجان قهوه سادى وبعدين حلو وبعدها كعك,وكل واحد بسألني عن طعم قهوته وطعم كعكه,وكل واحد بحكيله: قهوتك على راسي من فوق أي صدقني إنها قهوة شيوخ, واللي بفوت عليهم تقريبا بيجو 20 دار وهذا يعني عشرين فنجان قهوه إذا مش 40 لأن الأغلبية تطلب مني أن أزيد في شرب القهوه, واللي بحكيله: خلص ما بدي قهوه بزعل مني وبصير يحكي (شروي غروي) مع كشره واضحه على وجهه وهو يقول سائلا ومتعجباً:شو أنا قهوتي لا سمح الله ما بتنشربش؟ فبحكيله: لا كيف ما بتنشربش أي إنت شيخ مشايخ العربان كلها, بس عن جد إذا بتقدر تعفيني منها اعفيني,ومع ذلك يصرّ ويلح عليّ بشرب القهوه, وواحد ثاني لما بفوت عليه أول شيء بصير يحكيلي: أحلى فنجان قهوه لأحلى أبو علي بالحاره, ولكن أرد عليه: منشان الله يا رجل...والله معدتي صارت مثل شكوة اللبن من كثرة القهوه...أرجوك اعفيني والله ما بقدر هسع من دقائق إشربت عند أبو يوسف, فيرد ويقول: الله يسامحك يا أبو علي..أنا اللي بعرفه إنك زلمه فهمان وما بطلع منك مثل هيك حكي!!! شو يعني قهوة أبو يوسف بتنشرب وقهوتي ما بتنشربش؟ عليّ الطلاق غير تشرب وتجرب قهوتي,فأقول: لا والله ما هو هذا القصد, بس عن جد يا رجل معدتي صارت توجعني من كثرة القهوه والحلو والكعك والعجوه, أي طل عليّ يا رجل صدقني إنه العرق النازل مني كله عباره عن عجوه وكعك وحلو وقهوه, أي لو تعصرني غير تطلع مني 2 كيلو قهوه, ومن ثم عند كل شخص نتناول أحداث الساعة الجاريه في العراق وسوريا وغزه, وأكثر اللي بفوت عليهم محللين سياسيين وكأنهم جنرالات متقاعده من الجيش الأمريكي أو الإسرائيلي.

طبعا أنا مش لحالي بروح أعايد على الجيران والناس والأقرباء,لازم دايمن يكون معي ثلة من الأقرباء والأنسباء من نفس الحاره, يعني كلنا بنجمع بعض وبنفوت على بيوتنا بيتا بيتا, ومع إني بلف على الناس معهم وشايفهم ومسلّم عليهم ومعايد عليهم ومعايدين عليّ إلا إنهم يصرون ويلحون بأن اذهب إلى منزل كل واحد فيهم وأتذواق قهوتهم السادى وكعك نسوانهم اللي كله عجوه, وبعد ما أفترق عنهم ويفترقون عني يعاودون مباغتتي بزيارة أخرى: وعاد بصير أصرف لهم من الكلام الروتيني العادي في بيتي مع إني من دقائق بكون مفارقهم, ولكن استقبلهم مصافحة وبقبلات حاره على الخدين, والكلام اللي بصرفه كله من هذا القبيل:أهلا وسهلا وشرفتونا وكل عام وأنتوا بخير , وعاد بصير أنا أعزم عليهم يشربوا قهوه ويوكلوا حلو وكعك, وبصيروا يحكولي: يابو علي منشان الله بكفي خلص والله معدة كل واحد منا صارت مثل الشكوة: وأنا بطبيعة الحال أعمل بهم ما عمله بي باقي الأهل والأقارب والجيران وأصرف لهم نفس الكلام الذي كان يقوله الناس وزياده وبصير أقول: أنا جدي محمود المرعي كان يطعم الطير الطاير وما عمره حدى قدر يرفضله صبة قهوه, أنا شيخ ولد شيخ وكل العربان تشهد,شو أنا قهوتي يا جماعه قهوة شيوخ,شو بدكم يحكوا عني العربان؟؟: يقولون: جهاد العلاونه إبن علوان ما قهواش ضيوفه!! وكمان بعزم وبجير عليهم للغدى...إلخ.

وبعدين بروح عند أختي وبشرب عندها قهوه سادى وباكل كعك وبتصير تقول: ذوق يا أبو علي كعكاتي,بالله عليك ما هن طيبات! فأقول: والله بحياتي كلها ما ذقت كعك مثل هالكعك, وبمد يدي إلى جيبي وأناول الأطفال كل واحد عيديته بعمسكه إياها بيده, والمضحك إنه نفس المبلغ بترجعه أختي لأولادي لما تيجي عليّ نهاية يوم العيد, يعني كله ضحك ومجاملات..وكمان المصاري إللي بياخذوها الأولاد تتسبب لي بوجع الرأس, لا يشترون فيها أي شيء مفيد على الاطلاق, واللعبة التي يشترونها لا تبقى بين يديهم إلا لساعة أو ساعتين وبعد ذلك تذهب إلى أكياس النفايات , عدى عن المشاكل بين الأطفال التي تتطور في بعض الأحيان لتصل إلى كبار السن.

وهذي أختي إللي رحت عندها أول وحده طبعا بلقى عندها أختي الثانية وبعايد عليها عندها ولكن لا تقبل أخذ العيديه إلا إذا جئتها في بيتها على رأي المثل(الحكمُ يؤتى في بيته), بعدين بطلع من عند أختي وبروح عند عمتي وبلقى عندها أختي اللي قبل ربع ساعه عايدت عليها وبرد أعايد عليها مره ثانيه, بعدين بطلع من عند عمتي وبروح عند أختي الثالثة أو الرابعه وبلقى عندها خالي وأولاده وبعايد عليهم, وبتعزم أختي عليّ قهوه وكعك وحلو وتسألني عن طعم الكعك فأقول: بصراحه ما شفتش كعك أطيب من هيك!!, فتقول لي: طبعا هو إنت بتفكره مثل كعك مرتك!!!وتتعالى أصوات الضحكات.. وبعدين برجع لعند أمي وبلقى خالي عند أمي وبرد أعايد عليه مره ثانيه وبشرب قهوه وبوكل حلو وكعك حتى بطني في النهايه يؤلمني من شدة المغص وأصاب بحالة من الاكتئاب, وتسألني أمي: رحت عند أختك؟...فأقول:طبعا, وتسألني عن كل واحده وعن ما هية الضيافة التي قدمتها لي كل واحدة منهن, فأشكو لها من كثرة شرب القهوه وأكل الكعك, فتقول لي: عيب لازم توكل مش مليح إنك ترفض بصيروا يحكوا شو ؟وليش؟ ويمكن إنك قرفان أو مش حابب طعمه, فأقول: آخ يا معدتي...آخ يا راسي, والله يوم العيد ينال مني التعب ما يناله, وشرب القهوه بوجع معدتي هو والكعك, فتقول أمي: أما الأفضل إلك إنك تاكل وتشرب قهوه , وبرد أطلع عند دار عمي وبلقى عندهم خواتي وجيراني وكمان للمره العاشره بعايد عليهم وللمره العشرين باكل كعك وبشرب قهوه, وصدقوني من كثر ما بشرب قهوه في أول أيام العيد بقعد ما يقرب من شهر والقهوه نفسي مش طالبيتها, ولا تنسوش عصير التمر,كمان هذا بقعد أكثر من شهرين أوخمسة اشهر ونفسي غير راغبه به من كثرة ما بشربه في رمضان, والله في العيد الواحد منا بعوف حاله من كثرة المجاملات ومن كثرة حلف الإيمانات , وعلى فكره أغلب الذين أهنئهم بالعيد هم من غير الصائمين,والله العرب المسلمين حيروا عقول العالم كله.





التعليق والتصويت على الموضوع في الموقع الرئيسي


التعليقات

1 - LOL مقال جميل
نضال الربضي ( 2014 / 7 / 28 - 20:34 )
حبيبي أبو علي صدقني نفس السولافة عنا بالضبط على الفصح و الميلاد، كعك و معمول و قهوة لحد ما تصير معدتك مثل صبة الإسمنت لا بتستقبل و لا بترسل LOL

بس أنا ياخوي أشطر منك، بآخذ الكعك و بلفو بفاين و بعطيه لزوجتي بقلها- خليه حبيبتي بفطر عليه بكره الصبح LOL هاي حجتي قدام الناس و طبعا و لا بفطر عليه و لا غيرو أصلا ً أيام العيد ما بصحى قبل الساعة 12 عشان بحب السهر في الإجازة.

و القهوة بعتذر عنها لما بدي و لا بهمني حدا، مهو الضغط و ارتفاعو يا معلم بش ببلاش و أكيد إنتا أدري.

كل عام و أنت و عائلتك الكريمة بخير.

2 - نضال الربضي
جهاد علاونه ( 2014 / 7 / 29 - 05:11 )
كلامك صحيح أخ نضال,وأنا هنا أتحدث عن ابناء ديني, يعني في هذه المسألة المسلم والمسيحي يشتركون فيها,وصباح الخير من بلد الخير.

3 - فنجان قهوة,
Nedaa Aljewari ( 2014 / 7 / 30 - 13:00 )
تحيه طيبة استاذ جهاد
تحدثنا عن قهو ة العيد وموجبات الضيافة أيام الأعياد أو في الأيام العاديه
وهذا الكرم ليس موقوفا على الأمه العربية حسب ,,,,انه موجود في كل العالم
وانت تقول قهوة العيد كأنك تقول يا ليلة العيد اغنية ام كلثوم التي غنتها
عام1939 ونسمعها مرتين في العام وما ضجرنا منها وخاصة مقطع
{جددتي الأمل فينا}
و نتأمل من العرب المسلمين أن يكفوّا عن برامج ضيافتهم
ويلتفتوا الى ما يحاك لهم من مؤامرات لتفرقتهم وتقسيمهم الى دويلات,
,,ولكن الظاهر انهم مّصرين على شرب القهوة
واغاضة ضيوفهم ليصابوا بلعنة المغص

4 - بلش شيفاز احسنلك
نبيل العدوان ( 2014 / 7 / 31 - 21:46 )
انت اضحكتني يا شيخ جهاد انا بقول انسى القهوة وبلش شيفاز احسنلك
كل الحق على طوني لول
سلامي للوالدة الحجة ولام علي وخواتك والاولاد

وكل عام وانتم بخير

اخر الافلام

.. فيلم الممر مميز ليه وعمل طفرة في صناعة السينما؟.. المؤرخ ال

.. بكاء الشاعر جمال بخيت وهو يروي حكاية ملهمة تجمع بين العسكرية



.. شوف الناقدة الفنية ماجدة موريس قالت إيه عن فيلم حكايات الغري

.. الشاعر محمد العسيري: -عدى النهار- كانت أكتر أغنية منتشرة بعد



.. تفاصيل هتعرفها لأول مرة عن أغنية -أنا على الربابة بغني- مع ا