الحوار المتمدن - موبايل
الموقع الرئيسي


الكتابة من أسفل ( حكايات إعلام الصفوة )

صلاح شهاب
باحث
(Salah Shehab)

2014 / 11 / 26
كتابات ساخرة


لو انت صحفي مبتدأ أو قديم وخبرة في المجال يبقى ركز معايا شوية علشان تعرف تاكل عيش في البلد المحروسة اللي احنا بنعيش فيها , أنت أول حاجة تسيب نفسك خالص , لازم تسيب ضميرك على جنب شوية , علشان تعرف تجود صح , التدوير على الخبر ده فن لا يتقنه إلا القليل والقليل اوي كمان .
لما تيجي تدور على الخبر لازم تراعي انه يكون مليان تحابيش , يعني مثلا لازم يكون فيه جنس ودعارة , قتل وتقطيع لحمه , كذبة في الخبر ماتضرش بالعكس , هتخلي الخبر ليه ملكة اكتر بالزيادات والتحابيش اياها , التقارير مش لازم تكون صريحة وصادقة أوي يعني , لو فيها فبركة أو لخبطة ياريت لزوم الحبكة الصحفية , المقالات لازم تكون نارية , نشتم فيها في كل حاجة , وأي حاجة , الهجوم لازم يكون ضاغط على الفريسة موضوع النشر , وده بقى اللي بيسموه الشيء لزوم الشيء .
جرنالك وموقعها الإليكتروني واقعين بقالهم مدة , مش مهم ركز انت بس , وتعال اقولك تعمل ايه , اول حاجة انشر روابط على مواقع التواصل الإجتماعي بصور بنات عريانة ومواضيع فكسانة علشان تزيد الإنتشار شوية , أخبار ملهاش حصر عن اي حاجة ياريس وربنا هيكرم , الاهتمام بتفاصيل التفاصيل في العلاقات الحميمية , وشقق الدعارة واخبارها والقبض على مش عارف مين وهي سكرانة , طلاق فلانة من علان , نجمة النجوم كانت لابسة فستان شفاف , مع التركيز على الوسط الفني ومؤخراته , أخبار وهمية عن مقتل فلان في حادثة , والبقاء لله .
وأنت يا إعلامي ياكبير أو ياصغير مش هتفرق , برنامجك مافيش عليه اقبال , ما انت اللي غلطان ليه مابتعملش زي زمايلك , صوتك هادي ليه و ليه مابتتكلمش بزعيق وخبط على الفاضي والمليان , فين الأخبار عن المؤامرات والارهاب وخلافه , هات اتنين يقعدوا يشتموا في بعض طول الحلقة , وأنت طبعا مش هتسكت لازم تقعد تسخن فيهم , فين الحلقات عن الملحدين والشواذ , هات مرة ملحد وشاذ اقعد طول الحلقة أهري وأنكت معاه , فين المتحولين جنسياً , هاتهم واتكلم عن أخبارهم وأحوالهم , عايشين ازاي في المجتمع الذكوري المتعفن , معقول ما تحاولش تجيب واحد منهم , دول ملوا البلد يا أبا .
اما بقى لو أنت كاتب , فتعالى واسمع , أنت جيت اساسا في ملعبي , هات قلمك , وأكتب معايا الرواية لازم تحشيها بهاريز , خمرة ونسوان وحشيش , كلام سافل , المصطلحات الجديدة لازم تكون موجودة في روايتك , الشتايم بألفاظها مهمة جدا , الجنس أهم من الرواية , احشر على أد ما تقدر من مشاهد العشيق والعشيقة او الزوج والزوجة او الاغتصاب حتى , التفاصيل مهمة جدا في الموضوع ده , كل كبيرة وصغيرة بتخدم الرواية بتاعتك وهتساعد على انتشارها طبعا و حاول تحشي الرواية باي كلام و مع شويتين من العبارات الرنانة علشان تعرف قرائك انك مثقف وجامد , ولو الرواية بهوئت منك ماتخافش هتعرف تلمها باي نهاية , النهايات في الرواية أصلا مش مهم .
ده وصف تفصيلي لإجتماع اكيد بيحصل في الغرف المغلقة بين حد بيعتبر نفسه خبره في مجال المفروض يكون موجه توجيه صحيح , من غير الترقيع والتوهيم اللي بيحصل عمال على بطال مع مجموعة فشلة المفروض هما اللي بيديروا دفة العقل الجمعي لمجتمع ثقافته في الإساس قايمة على الثقافة السمعية , لكن للاسف اللي بيحصل عكس الاخلاق والفطرة السليمة , , اعطني إعلاماً بلاضمير اعطيك شعباً بلا وعي ,,







التعليق والتصويت على الموضوع في الموقع الرئيسي


اخر الافلام

.. فيلم #رفعت_عيني_للسما مش الهدف منه فيلم هو تحقيق لحلم? إحساس

.. الفيلم ده وصل أهم رسالة في الدنيا? رأي منى الشاذلي لأبطال في



.. في عيدها الـ 90 .. قصة أول يوم في تاريخ الإذاعة المصرية ب

.. أم ماجدة زغروطتها رنت في الاستوديو?? أهالي أبطال فيلم #رفعت_



.. هي دي ناس الصعيد ???? تحية كبيرة خاصة من منى الشاذلي لصناع ف