الحوار المتمدن - موبايل
الموقع الرئيسي


كَاهْ كَاهْ كَاهْ كَاهْ!

أسامة مساوي

2014 / 12 / 19
الادب والفن



نهار السبت لي فات عرضات عليا وحد الصديقة كَدير أستاذة دال الفرنسية وكتقري في المعهد الفرنسي بأكادير,باش نحضرو وحد اللقاء أدبي مع الروائي لفرونكوفوني-المغربي ’’الطاهر بن جلون’’... نظمو المركز الثقافي الفرنسي.
المهيم هِيا لبسات وحد الفستان أحمر مرشوش بالسواد..صراحة لاق بها جدا..أنا مشيت عادي بحال ديما حيت أصلا حتى فلعيد ولاشي عرس مكنلبسش عليا لحوايج جداد,كنبقا كيف ماكنت ومكنحملش لكرفاطا بحال بنكيران شحال هذي..ولكن مسكين طياح كواريه ولبسا باش يلقاو منين يجروه.
كانو ’’لي كوبلل’’ بزاف فلقاعا, وشكيلات ونويعات على جهد..وخا أنا ماشي ’’الكوبل’’ ديال الآنسة,هي صديقة فقط..لْجوْ كان هادء وساكت وكلشي كان كيتسنا السي ’’الطاهر’’ شنو غيقول..بحال إلى غادي يشوفو محمد الخامس في الكمرة.
دخل السي الطاهر بلحيته البيضاء ونظراته الحادة ومشيته البورجوازية الطوسية ولباسه الغالي ’’سيني’’,ولِيكُوبْلْ كيصفقو عليه حيت كيتمشا وكيضحك معاهم..أنا كنت حاضي غير الناس والدهشة الفلسفية ديالهم...أولَلا أو للا..’’مْسيو طاهر بنجلون’’ ...أولَلاَ أوللا..’’مْسيو طاهر بنجلون’’..زوين وخا ’’أَجِ’’..(زعما شارف بالدارجة)...وحد لبنوتة رقيوقة كَلسا حدايا هي لي كانت كتقول هذ الشي...أولَلا أو للا..’’مْسيو طاهر بنجلون’’ ...أولَلاَ.....
السي الطاهر كيشكر لحضور ’’مِرْسِي مرسي مرسي..’’ وكيضحك معرفت واش معانا ولاكيضحك علينا..ولكن من بعد غادي نعرف!
شد لْمايْك ودار وحد الشكر وتقديم لرواية ديالو جديدة لي غادي يوقعا للمعجبين ولمعجبات...وبدا تيقرا علينا شي مقاطع من داك الرواية ’’حكايات بيرو’’..لمهيم لكتابات ديالو أصلا عادية جدا غير فرنسا شهراتو حيث كينتصر للثقافة الإستعمارية ليمازال دايرها فلمغرب..ونا وحد لمرة ندمت لي شريت وحد لكتاب ديالو على الثورات العربية الأخيرة سميتو ’’الشرارة’’...خسرت فيه 65 درهم..كون شريت بيها غير شي كيلو ديال لمعزي تصدقلي حسن..
هو كيقرا والناس كيتصنتو مساكن..إلى حدود الآن لجو عادي ومكاين حتى مشكل..
ولكن ملي قال أن ’’الشعر وحده يمتلك القدرة على إنقاذ العالم’’!
تّْفْرْتْ فِياَ الضَّحك ومقديتش نصبر...كلشي نتبه ليا,والصديقة لي معايا بقا فيها الحال..حيث هيا عرافني كيف داير وماجابتني غير بزز حيت شدت جوج دعوات..ملقيت مندير شديت تيلفون وديرت راسي كنهدر فيه وخرجت بشوية...
صونيت على الأستاذة ومجوباتنيش كانت مخشعة مع نبوءة السي طاهر...مشيت شديت وحد القهيوة وسيفتلها ميساج قلتلا ملي تخرجي صوني عليا.
داك شي ليدارت..صونات عليا وكانت معصبا...لمهيم بردتها شوية وقنعتا تجي تشرب شي قهيوة ولا ليمون(حيت لبنات عزيز عليهم العاصير في القهوة!)..
قاتلي علاش ضحكتي راه كلشي نتبه...بديت كنضحك عوتاني كنموت بالضحك...
-مالك كضحك عوتاني مالك مالك؟
-قتلا كنضحك على داك ’’الشعر وحده يمتلك القدرة على إنقاذ العالم’’!
-مالها كيجاتك
-والشعر منقذش حتى الشعراء مساكن عاد غينقذ العالم...الشعراء لمغاربة الحقيقيين لي ماباعوش ريوسهوم كاملين مأزمين هم جزء من هذ الشعب لمقهور,وراس مالهم هريد النَّاب والهضرا..كيفاش غادي يدير هذ الشعر ينقذ العالم؟
ولمشكيل مقالش : يمكن للشعر ينقذ العالم..لا..قالك وحدهُ الشعر قادر على إنقاذ العالم...كيفاش وحده عوتاني...؟؟
نظرية الطاهر بنجلون الأخيرة التي اكتشفها بمدينة أكادير المغربية....!!!
بدات كتشوف فيا ’’لمياء’’...وانفجرت ضحكا...كاه كاه كاه كاه كاه كاه كاه...وأنا معها كاه كاه كاه كاه كاه..,نادل المقهي ..كاه كاه كاه كاه...الزبناء من حولنا..كاه كاه كاه كاه كاه ...الناس في الخارج يسمعون وينظرون إلى المقهى,ثم هم أيضا..كاه كاه كاه كاه كاه كاه كاه....مالين الطاكسيات خرجو من طاكسيات ديالهم ...كاه كاه كاه كاه كاه كاه كاه كاه كاه..مالين لحوانت والسيرورا وداك العيالات لي تيسعاو مساكن ...كاه كاه كاه كاه كاه كاه كاه كاه كاه
سمعونا داك الناس لي باقيين لداخل القاعة كيوقعليهم السي الطاهر الرواية...خرجو كيجريو وتاهما..كاه كاه كاه كاه كاه كاه كاه كاه كاه...كيلوحو داك الرواية فسما وسمحو في الطاهر بوحدو في القاعة وتاهمو في الشارع العام...كاه كاه كاه كاه كاه كاه كاه كاه كاه...
وهاهو الطاهر بن جلون ماجي كيجري لشارع يشوف شنو واقع ..كلشي توقف على الضحك ملي شاف الطاهر..كيتسناواه شنو غادي يدير ...وتهاهو نعاس على كرشو في الأرض وبدا ....كااه كاه كاه كاه كاه كاه كاه كاه كاه كاه....في الطاكسي من أكادير إلى بيوكرى مع الشيفور والركاب والناس في الطريق ...كاه كاه كاه كاه كاه كاه كاه كاه كاه...حتى لكلاب ولقطوط وسراق الزيت لي كايخافو منو لبنات تاهوا تقلب على ظهرو وكيدير ..كاه كاه كاه كاه كاه كاه كاه..
صْحَابي فْلفَايسبوك حتى هُما وَقِيلا...كاه كاه كاه كاه كاه كاه كاه كاه كاه كاه كاه كاه كاه كاه كاه كاه كاه كاه كاه كاه كاه كاه كاه ...
هذي فْخَاظر كَاع الشعراء والشاعرات...ودوك لي ناويين يكونو شعراء ولاشاعرات..بلا متعصبو هذا هو النقد الأدبي...
أنا ناقد..كيجيتكوم!





التعليق والتصويت على الموضوع في الموقع الرئيسي


اخر الافلام

.. أدونيس: الابداع يوحد البشر والقدماء كانوا أكثر حداثة • فرانس

.. صباح العربية | بينها اللغة العربية.. رواتب خيالية لمتقني هذه



.. أغاني اليوم بموسيقى الزمن الجميل.. -صباح العربية- يلتقي فرقة

.. مت فى 10 أيام.. قصة زواج الفنان أحمد عبد الوهاب من ابنة صبحى



.. الفنانة ميار الببلاوي تنهار خلال بث مباشر بعد اتهامات داعية