الحوار المتمدن - موبايل
الموقع الرئيسي


حجي راضي يقرأ مقال!!

عامر سليم

2014 / 12 / 22
كتابات ساخرة


- لذكرى فنان الشعب الخالد طيب الذكر سليم البصري
- تحيه لفنانة الشعب سهام السبتي متمنين لها الصحه والعمر المديد
- المقال للعراقيين فقط لانه يخص ذكرياتهم وفنونهم ولهجتهم


حكايه قديمه بمشهد جديد

المشهد دكان حجي راضي الحلاق.. وهو يبدأ بحلاقة ذقن الزبون خضير.. تقترب ام كامل من الدكان مناديه بعلو صوتها وملوحه بالورقه المطويه بيدها..
ام كامل : حجي صدقه على راسك متقرالي هذا المقال كتبه اليوم ابني كامل
حجي راضي : ام كامل مو خضير مستعجل وكشه وحده بس!
ام كامل : ياكشه حجي ..( ثم ملتفته الى خضير)..عيني خضير متخلي الحجي يقرالي المقال...
حجي راضي : ها خضير عندك مانع..؟
خضير : زين يابه اقرالهياهه حجي..اقرالهياهه..

يتناول حجي راضي الورقه من ام كامل ويجلس في زاوية الدكان متمتما..
حجي راضي : لازم بعده ابنج يكتب مقالات بالموقع!!
ام كامل : اي حجي..بعده
حجي راضي : لازم ماخذ راحته ..(وهويفتح الورقه) اي لا.. نفس الخريط! .....(وهو يبدأ القراءه)....عندج يامحفوظ البكه والسلامه.....مقال... تنويري....!!!.
ام كامل :مقال تنويري شنو معناتهه حجي؟
حجي راضي : هاي يمكن ايريد ايكلج ...مطّال تنوري ....مطّال.. متعرفيه هذا اليشجرون بيه التنور من يخبزون!
ام كامل ( مستغربه) : ليش المقال يسووه بالتنور؟
حجي راضي : لعد شلون ليش الخبز وين يسووه؟
ام كامل : بالتنور غير!
حجي راضي : خلص.... ابنج خبز المقال بعد ماشجر التنور بالمطّال! ..(يكمل القراءه).........سحاق .....لغوي..لاينتج .....حملا ...معرفيا....قريط...قريط
ام كامل : حجي صدقه على راسك هاي سحاق مدا اعرفها؟
حجي راضي : سحاق ...يعني سمّاك بالجلفي... وبالفصيح سماق متعرفين السماق؟ هذا اللي يخلوه على الكباب لازم ابنج الله يسلمه يحب الحموضه! وهنا يكلج هذا السمّاك ...لغوي ..يعني لغوه متحبّل !!!
ام كامل: زين حجي.... قريط.. قريط.. شنو؟
حجي راضي : هذا يمكن فد جني راكبه ويحجي بلسانه! . اشو كل ساعه يكول قريط ..قريط..مو تدرين بعض كتاب المقالات عندهم جني وابنج الله يسلمه الجني ماله اسمه.. قريط..! . (يكمل القراءه). وعندج اهنا يكول اثيوبيا ليست مثل النمسا علما.. ان ديانة.. البلدين.. مسيحيه! قريط.. قريط.. ها... شوفي اهنا هم جا قريط ..لازم هذا الجني ثاوله ثول !
ام كامل (حائره) : النمسا شنو اثيوبيا وين !!
حجي راضي : هاي يمكن ديحجي على فلم الرساله ...من راحو المسلمين المتنورين الله يسلمهم للنجاشي وصاروا لاجئين سياسيين!! وبعدين يكلج الجني قريط طلب توطين ببلد ثالث وراح للنمسا وكام يسمع سمفونيات شتراوس بدل سمفونية الصحراء.. طلع الفجر علينا!
ام كامل : اي حجي اي ..يمه وليدي مثقف. وجماعته بالنمسا..وبعدين حجي!
حجي راضي : ( وهو يقرأ بصعوبه) ترشيد.. الرؤى الدينية.. في إطار علم الأديان ..المقارن.. وترميزها... في مبادئ الإيتيك.. والقيم الكونيه.. قريط..قريط..
ام كامل : عزه.... ايتيك شنو... ترميز شنو؟
حجي راضي: دقيقه خلي نقره شكو وراها هاي.. كونيه.. مدا اعرفها يمكن كواني يشيل بيها البوكات مالته ! احنه شمدرينه!
ام كامل ( بفزع ): يمه.. ابني طلع نشال!! ..فهمني حجي دخيلك!
حجي راضي: دقيقه.. لتنصبينه عزه خنشوف تاليها وين (يتابع القراءه) !..ماركس..بوبر..فوكو..قريط..زكي..راسل.. يعقوب..الشافعي.. يمكن اهنا ايريد ايكول سويت شوربه زينه بيها كلشي وكلاشي
ام كامل (مقاطعه): يا شوربه حجي..حجي فهمني صدقه على راسك؟
حجي راضي: لتتنطنطين شلون راح نقرالج المقال ..غير نقراه كله!! ونعرف شنو الموضوع هو هذا ابنج حتى الصاحي يثوله!
ام كامل: يمه وليدي ياكل كباب ويه شوربه فوكو.. كمل حجي صدقه!
حجي راضي :وهاي باّخر المقال يكول.. لست متأكد ولكن أعتقد ..يمكن اهنا ايريد ايكول اني مو كاتب المقال...لان المقال مينفهم راسه من رجليه كلمات.. واقوال.. وسوالف.. وارقام تلفونات. .واقواس..ولطش من الويكبيديا... وقال احدهم..و قريط ..وقريط... وما بقّاله مكان يكتب بي سوالفه!!....وهاي هيه ..خلص المقال... .(وهنا يحاول الحجي ان يلخص قراءته للمقال ).. شوفي ام كامل.. يعني باختصار اهنا يكلج خبز المقال بالتنور واكل شيشين كباب بالسمّاك اللي ميحبّل.. وبعدين راح سفره يم النجاشي ويه صديقه الجني قريط .. وقريط عافه وراح للنمسا.. وبعدين اشتره كواني بيها رموز.. ينكل بيها بوكاته وسوه شوربه... ..وها .....وهنانه بعدين ..وهاي هيه خلصت! مابي شي المقال الله وكيلج!!
ام كامل ( مذهوله): حجي دخيلك.... كلشي ما افتهمت!!
حجي راضي ( وقد نفذ صبره) : ليش هو اني الدا اقراه.. اني اللي قريت المقال... افتهمت منه شي! ليش هو ابنج اللي كتب المقال افتهم شديكتب!!
ام كامل : لعد هيه هاي تاليتهه وتكولون نقره مقالات واحنا مثقفين !جماله هم خابصينه!
حجي راضي: بنت الحلال احنا ياهو مالتنه ابنج ايمسلت !
وهنا ينهض الزبون خضير بعد ان نفذ صبره هو الاخر حاملا بكلتا يديه فوطة الحلاقه....
خضير: يرحم موتاج متكليلي ابنج شديسوي بالموقع؟
ام كامل : عيني ...يكتب مقالات!
خضير : يا مقالات!
ام كامل: مقالات تنويريه عيني خضير!
خضير : ليش هي المقالات التنويريه صارت لعب جهال! ياهو اللي يجي يكتبها ! يابه هذا ابنج حتما مضيع صول جعابه وميعرف الشيش من البيش!
حجي راضي (مؤيدا بشده) : لعد شعبالج!
هنا تنهض ام كامل وتأخذ الورقه من يد حجي راضي منتفضه.....
ام كامل: عيني ابني كلشي مابيه صارله سنين يكتب مقالات تنويريه بالموقع.. ويخلون مقالاته بالمفضله .. والجني مالته قريط احسن منكم ليش تغارون منّه! عايش بالنمسا ويسمع شتراوس ..مو مثلكم كاعدين بهلدكان و تسمعون داخل حسن!
تبتعد ام كامل عن الدكان بخطى سريعه وهي تلم عبائتها حولها بغضب ويصرخ في اثرها حجي راضي قائلا......
حجي راضي: شوفي ام كامل تره اللي ميتذوق ابو كاظم اكيد مراح يعرف يتذوق شتراوس!!

والكاظمين الغيظ ..والعافين عن الناس.. ومحبتي للطيبين





التعليق والتصويت على الموضوع في الموقع الرئيسي


التعليقات

1 - تحية طيبة
عبد الرضا حمد جاسم ( 2014 / 12 / 22 - 12:46 )
نطب بالموضع رأساً
هذا كمولي جان اسمه ياسمين
هذا مجلب سر في طريقك و كأنه حشاك مثل الحمار مخليلة منا و منا طكَاكَيات كَالوا للمعلم ماله يابه اذا حجيهم زين او ينفع هم نطلع كَبل كَالهم لع بس ابوطكَاكَيات ما يدري شني السالفه
ابن ام كمولي مو ث .....قف! ستوب
و جماعته مو بالنمسا... لا بيهم عرك نسه
اما لإيليك يعني لازم واحد يكَله دي لا اجيك حشاك و حشه كلمن اكَول كَباله
اصبرلي بس اخلص البيدي افضحه الكمولي من سيارة التكسي للملك لعيد الميلاد
الله يرحم حجي راضي جان افهم منه و الله يرحم عبوسي جان بيه فايده
هذا كمولي مثل هايشة زرابين حيشاكم
اودعناكم
الى اللقاء في اللقاء الحاسم مع كمولي حجي يعسوب
و اذا فك حلكَه يعسوب اترسه تراب محضرله لوري تراب سيان

اخر الافلام

.. بالدموع .. بنت ونيس الفنانة ريم أحمد تستقبل عزاء والدتها وأش

.. انهيار ريم أحمد بالدموع في عزاء والدتها بحضور عدد من الفنان



.. فيلم -شهر زي العسل- متهم بالإساءة للعادات والتقاليد في الكوي

.. فرحة للأطفال.. مبادرة شاب فلسطيني لعمل سينما في رفح




.. دياب في ندوة اليوم السابع :دوري في فيلم السرب من أكثر الشخص