الحوار المتمدن - موبايل
الموقع الرئيسي


وفي اليوم السابع كنت من الأنثى

محمد محمود الكاشف
(Mohamed Mahmoud El Kashef)

2015 / 5 / 26
الادب والفن


وروحي في روحك طارحة غيطان ألوان
والقلب عصفور ع الشجر سارح
الفرحة سكة بدون بيبان
والضحكة صحبة بتنده امبارح
وبتسامح زي الحروف
والرسم بالطباشير
والشخبطة على كل صفحة م اللي فات
وع الحيطان
وع الحاجات
اللي بتعرف من غير سبب
إزاي تكون
وإزاي تعيش في الروح

وميل يا بحر البوح
خليني أعدي بمركبي يم البراح والضي
خليني حي
يمكن أروح
وأفرد جناحي في السما زي الطيور
وأمشي في نور
كأني منه باتولد وأكون: شجر

ميل ومع أول خطوط القدر
إفتح قوسين واكتب في وسطيهم:

(مدهشين يا عيون حبيبتي وأنت ماسكة في إيدين ضحكتك بره النصوص)

وما بين ضفاير الشموس
والليل
والحنين
خللي العروس بنت الحقيقة المطلقة
تأخد حروف الأبجدية
وتسيب النقط
جايز تعود فوق السطور م الحبر
فيعيش ملكوت الكتابة بالقلم
بعد الموات

ميل وقوم كما المسيح قبل الفوات
نادي ع القلوب قبل الخرس ما يكون
خرج المكنون من بين السكات
وإجمع حروف الحلم من صوتها
وهات الخلاص
يمكن تحن السما
وتلبي الندا ف قداس
وتجيب من نظرة عينيها المخلصة
ألوان المطر

فعل المطر ف الأرض
زي الصلاة في حضن الحبيبة
لساه بيزرع م الإيمان جوا الوريد: معنى الحياة
وما بين شفايف اللقا
وصوت الإله
بيمد ايده ويكتبك في الروح "وطن"
فيتولد من لمسة كفوفه المتعبة
رغم الشجن
شيء من الغنا
وشيء من الحقيقة
وشيء جوه عيونك م المُنى
دايب في روح الله
واللي يقول الله
يلقى ضياه م المدد ممدود

موعود بفتح باب الأسئلة
ورد الإجابة
واحتمال التورط في الحقيقة
زي احتمال التورط في الخيال
شيء لابد منه
ومش كفاية
ومش هواية
إني أمشي عكس الإتجاه
وأخد صور
لأجل النظر
ولأجل الشجر
أغسل همومي في كل قلب
وأروح معاه
ف تتفتح وبدون سبب
من بين دواير مُهجتي: سكة سفر

الحكاية م البداية مشدودة الوتر

ولسه البشر زي المطر
مهما يتوهوا في الدروب
راح يرجعوا
ويعيشوا جوايا
زي الحمام
والطيارات الورق
وجري العيال
اللي آمنوا الخلق بيه
واللي من إيدي في إيديه
رأيتك معايا

شبه الملايكة ضحكتك
خليها طايرة ف السما
ويا قلوب الأوليا
يمكن تعود للأرض
وترجع المفقود
خليها لما تلقى القلب تبقى
وما تفارقش
وما تغادرش
وما تنتهيش
وما تستحيش
عشان أعيش
وأموت فيكي
وبإيديكي يكون لي وجود
■-;-■-;-■-;-




2015/5/21





التعليق والتصويت على الموضوع في الموقع الرئيسي


اخر الافلام

.. ندوة الرواية والفنون: روايات واسيني الأعرج أنموذجا- الجلسة ا

.. ندوة الرواية والفنون: روايات واسيني الأعرج أنموذجا- الجلسة ا



.. دوة الرواية والفنون: روايات واسيني الأعرج أنموذجا- الجلسة ال

.. أرملة جورج سيدهم تتبرع بقميصه في مسرحية المتزوجون بمزاد خيري



.. ندوة الرواية والفنون: روايات واسيني الأعرج أنموذجا- الجلسة