الحوار المتمدن - موبايل
الموقع الرئيسي


ألف باء حب

روماني سمير
كاتب, باحث, شاعر, مبرمج
(Romany Samir)

2015 / 7 / 27
الادب والفن


الحب حلو مفيش كلام .. بس وقت ما تقرر تحب .. اعرف كمان انه بحبك ده انت بتقبل تكون معرض للالم .. اعرف انه انت بتضحي بكتير من جواك عشان تفضي له مكان .. واعرف انه مهما ان كانت قوتك انت بتدي سلطان للاخر انه ياثر فيك .. واعرف ان في حياتك هيكون فيها اللي اغلي منها .. اعرف انك بتربط نفسك بيه وانت بتدي كل الحرية .. واعرف انه ف وقت ما يكون جواك كل الكلام هيعلمك تسكت .. اعرف انك هتتغير .. الحب نار بتحرق فيك الغرور والكبرياء والانانية .. وخلي بالك .. الحب لو مغيركش هيكسرك .. الحب قوي جدا .. قالوا عنه انه قوي كالموت .. وان مياة كثيرة لا تستطيع ان تطفئه والسيول لا تغمره .. مش مصدق .. طب اعرف انه في 2.2 مليار بني أدم مؤمن ومصدق ان إله لما حب قبل يتذل ..

وفكرة ان كل شوية نكتب او نتكلم عن الغدر و الخيانة ومتمرش فيه والناس الوحشين .. مع احترامي لمشاعر الناس بس كتر اوي .. في الحب .. مفيش لعنات .. انما بتبارك .. بغض النظر عن اللي حصل او بيحصل او هيحصل .. وبعيد كمان عن رد فعل الاخر .. وفكرة انه اتغير او بطل يعمل او ميعملش .. برضو الحب مش متوقف علي شكل او صفات الاخر .. لان اي تميز بيروح انما المحبة ثابتة .. وان اختار يرحل اطلقه .. لانه الحب مش بيكتف وان ربطك بيه لكنه بيعلن حرية .. ومحاولاتك لاسترجاعه عن طريق وعود او اشعار مش محبة لكنها محاولة للسيطرة عليه .. ومن الاخر .. كل محاولاتك لانتزاع اللي جواك او احتواءه - لو كان حقيقي - هتفشل .. وغضبك ولعناتك ما هي إلا تشويه للمحبة .. وبرضو غضبك هيروح والمحبة هتفضل .. هتتألم وقت .. سواء كتير او قليل .. لكنك مش هتموت .. والحياة مش هتقف .. ونبع المحبة اللي جواك مش هينضب .. وزي ما فاض وقدم حب مرة .. اكيد هايفيض حب تاني وبشكل اعمق .. بس خد وقتك تتألم وتتشفي .. لانه مثير للشفقة اللي بيحاول يداوي فقد في علاقة بعلاقة تانية .. يمكن فهمنا للامور دي مش بيخفف من حدة اللي جوانا .. لكنه بيساعدنا اننا نسيطر علي ردود افعالنا ..

المحبة الصادقة والحقيقة .. هي اللي متلمش .. المحب الحقيقي هو اللي يرفع اللوم عن الاخر .. هو اللي يخفف احساسه بالذنب حتي لو فعلا غلطان ويرفع عنه تانيب الضمير .. المحب الحقيقي هو اللي يفك ويحرر .. مش يقيد ويسيطر .. كل ما ازداد حبك كل ما زاد عطاء .. كل ما انت نقصت وزاد الاخر فيك

الحب بيتأني وبيرفق وبيعطف ويحن ..
الحب مش بيحسد ولا بيغير ولا بيتفاخر او يتعالي ..
الحب مش بيقبح ولا بيشوه و ولا بيلعن ..
الحب مش بيمتلك الاخر ومش بيسيطر عليه ..
الحب مش بيطلب اللي ليه او يحتد او يظن السوء ..
الحب مش بيشمت لكنه بيفرح بالخير ..
الحب مش بيدين لكنه بيرحم ..
الحب بيحتمل كل شئ .. بيصدق ويرجو ويصبر ..
الحب لا يسقط ابدا .. الحب بيدوم .. وعمر زرعه ما يطرح شوك ..





التعليق والتصويت على الموضوع في الموقع الرئيسي


اخر الافلام

.. فرحة للأطفال.. مبادرة شاب فلسطيني لعمل سينما في رفح


.. دياب في ندوة اليوم السابع :دوري في فيلم السرب من أكثر الشخص



.. مليون و600 ألف جنيه يحققها فيلم السرب فى اول يوم عرض


.. أفقد السقا السمع 3 أيام.. أخطر مشهد فى فيلم السرب




.. في ذكرى رحيله.. أهم أعمال الفنان الراحل وائل نور رحمة الله ع