الحوار المتمدن - موبايل
الموقع الرئيسي


رد على عرب وكتب لقاسم محاجنه

جان نصار

2015 / 9 / 14
كتابات ساخرة


زميلنا الكاتب قاسم حسن محاجنه زلمي كتير طوباوي ومثالي وعلى ما يظهر انو انسانيته وطيبة قلبه والتزامه الوطني وحب الخير اسرينو واخونا بدخل كتير بمنطقة الطوباويات والبساطه وماخد الامور على مسطرته ومفكر كل الناس زي حالاته مسالمه لابعد الحدود.
للامانه هو مثقف وقارئ جيد ولماح وقداح ومرتاح ومصباح للفكر والتنوير وبعترف انه قارئ كتب اكثر مني لاني اخر كتاب قراته من 30 سنه كان ميكي وبطوط اللي بتحدث عن الصراع الطبقي بين الحيوانات وعالم ديزي وويتطرق للعولمه والنقد الديني وصراع الحضارات..
اخر ثلاث مقالات لعزيزي قاسم كان احدها نقد لمقال الكاتبه فاطمه ناعوت شهداء ابن زايد.. كان اخونا محق بس اكثر من مالازم مهذب لانه مسالم واعتبر المقال هفوه وكبوه وما بدو يدخل على الصراحه ويقولها انك بالهالمقال نسفتي كل اعتدالك وتنويرك ..وفكرنا انو الكاتبه راح تعتذر او زي ما البعض فكر انه نسب اليها ولكن ما في منو هالحكي والست فاطمه ولا كانها بهالواد دان من طين ودان من عجين وسفأتنا مقال ساخر ولا بركب على العقل وقال وضعته تحت مقالات العلمانيه ونقد الدين,, والله وكيلكم ما فيو لا نقد ولا علمانيه وبعيد عن الدين.
اما مقال قاسم الثاني كان نصيحه للكاتب الزميل نضال الربضي بعدم التفكير بالهجره.على اساس انو قاسم معتدل دينيا وبتقبل الاخر المختلف وبدوش انو الاقليه المسيحيه تهاجر ويصير في فراغ عاطفي عفوا تنوع ثقافي والشغله مش محرزي الزعل والهجره.
يا عمي قاسم انت فاكر كل المسلمين زيك متسامحين ناسي التشدد الديني والارهاب وتقطيع الروس والسحل يعني ضروري تيوصل البل للحانا تنهاجر يا خوي.وبعدين هم المعتدلين المسلمين قادرين يدافعوا عن حالهم تيدافعوا عن المسيحين .انت كمان الزمن عندك توقف على ايام سيدك وسيدي وابوك وابوي.احنا اليوم في عصر الذبح السريع والله يرحمه كان زلمي طيب .
اما المقال الثالث اليوم عرب وكتب كان كتير اوفر واخونا تخنها وبدو ايانا نترك التلفزيون والنيت والفيسبوك والنميمي والتويتر والابحار في عالم النت وننسى كل الهبل واللايكات ومواقع الفتاوي ونشتري كتب ونقراء.
سجل عندك يا خوي 120 مليون امي بالوطن العربي بدك اياهم يقرأوا لغارسيا ماركيز 100 يوم في الجوع والفقر والمرض.
200 مليون عربي بقرأوا مسلسلات تركيه وبرامج الطبخ والموضه والمسابقات الغنائيه وتنساش مهاويس كرة القدم بالملاين اللي بقرأوا اكم هدف جاب ميسي واكم موزه صار عند رونالدو واكم تاتو على جسم ابراهمويش.
100 مليون عربي على القنوات الفضائيه الدينيه من انصار ومؤيدي داعش واخواتها.
100 مليون على جبهات الحروب والقتال والارهاب يتركوا البندقيه وقال يشتروا كتاب.اهلا كتاب.
100 مليون عاطل عن العمل وفقير ومهمش معوش يوكل وبشفش اللحمه الا بالتلفزيون او على العيد بدك اياه يشتري كتاب ماركس او فوكوياما.
صار بدنا كمان ملاين لاني خلصتهم بالعد مشان جنابك للمطالعه.اي طالعت روحنا بهالمثاليات.
حتى المثقف مش شايف الا حالو واذا كان كاتب اوعنده شويه او كمشة ثقافه اكبر بقولك الله خلقني وكسر القالب وحتى لنفسه ما بقرأء.
ثم القرأه بدها استقرار سياسي واقتصادي ونفسي والاهم علم وتنمية الاطفال منذ الصغر على المطالعه.تخيل القصف والقتل والدمار والهجره شغاله والمواطن حامل كتاب كيف تتعلم السباحه نظريا للوصول الى الغرب.
واخيرا الكتاب عند العرب تهمه وسجن وقطع رزق حتى قصص الحب عند الدوعاش فيها قطع راس وسحل .ما احلاها داعشي يمسك شاب او فتاه مع كتاب لاحلام مستغنامي مثل الاسو يليق بك مشان النحر او الرجم يليقوا بحامل التهمه الكتاب...
وما بفضل غير وجه الله والكتب الدينيه.





التعليق والتصويت على الموضوع في الموقع الرئيسي


التعليقات

1 - عزيزي الغالي جان
قاسم حسن محاجنة ( 2015 / 9 / 14 - 15:03 )
تحياتي الحارة
جزيل شكري على تكريس مقالتك لبعض من مقالاتي
شرفتني بهذا يا رجل ..!!
نعم ، معك حق فأنت ترى الجانب الآخر للمقالة وهو صحيح .
تحية على خفة الظل والسخرية المرة
دمت ساخرا ظريفا

2 - عزيزي قاسم المحترم
جان نصار ( 2015 / 9 / 14 - 15:52 )
انا اكتب من محبتي لك ولولا اعجابي بما تكتب لما سمحت لنفسي بكتابة مقالي هذا فانت وبلا مداهنه كاتب اتشرف بصداقته عدا عن اعجابي بما تكتب.على فكره هاي الكلمات مجامله ودعايه لحد الان مش مدفوع اجرها فخشخشلي جيبتك وقبضنا .تقبل الدفعات بالفيزاكارت او شيكات ويستحسن نقدي وان تشاركني بما تقبضه من امراء الخليج
السخريه مطلوبه بزمنا هذا لان الاكتأب والحزن والمصايب والكوارث لازقه بشعوبنا العربيه.الفرح والسعاده حتى استيراد من الدنمارك ممنوعين .وكاسك يا وطن
تحياتي وابتساماتي واهاتي وسخرياتي بمقالاتي وكتاباتي

3 - أحلى كاس عرق على شرفك
عتريس المدح ( 2015 / 9 / 14 - 16:09 )
يا راجل وين هالقمر ما بيطل وما بيبان
أشكر كثيرا قاسم لانه استفزك و أخرجك من المخبأ، أنا بعرف إنك متخبي من داعش، يا عم جان ما تخاف و تعال عندي ع رام الله و أحلى كاس عرق لاصبلك إياه عا المنارة بس عحسابك، ما انت راحتقبض من قاسم

4 - اضحكتني جدا
قاسم حسن محاجنة ( 2015 / 9 / 14 - 16:27 )
شكرا عزيزي لانك اضحكتني جدا ، وعاليوم بقدر اخشخش بجيوبي الفاضية
محبتي

5 - العزيز عترس المحترم
جان نصار ( 2015 / 9 / 14 - 19:04 )
انت اللي وينك غايب ما بتنشفش ولا حس و خبر وبعدين ليش بطلت الكتابه ورفعت الرايه بدك تعزمني وعلى رام الله وعلى حسابي من المصاري تبعون قاسم ول شو هالبخللا يا سيدي انا عازمك عنا على القدس العاصمه اللي يروها بعيده والختيار كان شايفها قريبه
والله وسلامات

اخر الافلام

.. -لبلبة ربنا تاب عليها واتحجبت-??‍?? لما لبلبة مشيت في الشارع

.. مخرجة الفيلم الفلسطيني -شكرا لأنك تحلم معنا- بحلق المسافة صف



.. كامل الباشا: أحضر لـ فيلم جديد عن الأسرى الفلسطينيين


.. مش هتصدق كمية الأفلام اللي عملتها لبلبة.. مش كلام على النت ص



.. مكنتش عايزة أمثل الفيلم ده.. اعرف من لبلبة