الحوار المتمدن - موبايل
الموقع الرئيسي


اليوم عزمت الحكومه على الغداء

جهاد علاونه

2015 / 12 / 10
كتابات ساخرة


زمان وانا ولد صغير لما كانوا اهلي يودوني على السوق على شان اشتري مثلا دجاج, كانوا يقولولي روح جيبلنا جاجتين(دجاجتان), وكانت امي تقسم لنا الدجاجة وتقول وهي تقطع بها: هذه لجهاد وهذه لمحمود وهذه...إلخ, ولما كانوا كمان يودوني اشتري خبز كانوا يحسبوها هكذا: رغيف للأولاد ورغيف للام وللجده, ولكن اليوم الموضوع مختلف جدا, ولما كنت اعزم صاحبي على زجاجة بيبسي من الدكانه كنت اقول لصاحب الدكانه: لو سمحت افتحلنا قزازتين بيبسي وحده لي والثانيه لصديقي, وصديقي كان في اليوم التالي يردلي العزومه ويطلب من صاحب الدكانه بفتح زجاجتين بيبسي واحدة له والثانية لي, أما اليوم من كثر ما الحكومه رفعت الاسعار صرت أحس حالي اذا بدي اشتري خبز لازم أحسب معي حساب الحكومه.
واليوم من الصبح رحت على محل الدجاج اللي بجانب بيتي وطلبت منه أن يقتل لي 3 طيور من الدجاج, فقال متطفلا: شو السيره أبو علي؟ انت دايمن بتطلب مني قتل دجاجتين, إش معنى اليوم؟
قلتله: اليوم انا عازم حكومة عبدالله نسور عندي على الغداء.
قال: معقول يا ابو علي رئيس الحكومة بجلالة قدره يجي ويتنازل على شان يتغدى عندك؟
قلتله: شو مالك يا رجل!! انت مستغرب الوضع يعني؟حرام هظول مش املاقيين حدى من أغنياء وأثرياء عمان يوكلوا عنده فقلت أنا: ليش ما أعمل بأصلي؟ ليش ما أجيبهم يتغدوا عندي؟ الأغنياء ما بطعموهمش ولازم الفقراء اللي مثلي كل يوم الصبح يقدمولهم على الأقل وحدة دم للحكومه يمصوها أو يشربوها أو يمزمزوا عليها.
قال: والله بصراحه مستغرب...يعني إنت زلم فقير الحال ويا دوب تقدر تطعم أولادك فكيف بدك تطعم الحكومة؟!!.
فتبسمت ضاحكا ومن ثم اعلنت ضحكي بصوت عالي وقلت له: صحيح أنا فقير ومش املاقي أوكل بس على الأقل عندي شوية دم يمصوه!!!! ولك أنا عندي دم وبستحي على حالي وبضحي من أجل الوطن والحكومه....لعاد شو امفكرني مثل الأغنياء اللي ما عندهمش دم يمصوه الحكومه؟ ولك أنا كلهم بمصوا بدمي البعوض والحكومه وهاظا هو وجه الشبه بين الحكومه الأردنيه والبعوض..ولك يا متخلف...ولك يا جاهل, اصلا الحكومة مش عايشه إلا من جيوب الفقراء اللي مثلي ومثلك, هسع إنت يا أهبل تفكر إنه رئيس الحكومه بده يغطي العجز اللي في خزينة الدولة من جيوب وخزائن أصحاب الملايين والمليارات؟ ولكوا فعلا إنكوا شعب أهبل ومتخلف جدا, ولكوا الحكومه عايشه على ظهري أنا وظهوركوا إنتوا, ولكوا الحكومة بتشرب من دمي أنا ومن دمكوا إنتوا, ولكوا عمركوا شفتوا واحد معاه ملايين من الدولارات وبودي ابنه يخدم في الجيش الأردني؟ ولكوا احنا اللي أولادنا بخدموا بالجيش وبدافعوا عن مصالح اصحاب الملايين , وابناء اصحاب الملايين بودوهم يسكروا ويشربوا في كهوف باريس ولندن, ولكوا ميله إتميلكوا على قد ما انتوا مايلين...الله يقطعكوا.
فقال: والله يابو علي إنك أقنعتني.
فقلتله: يلله بدون غلبه أقتل لي مع سبق الإصرار والترصد طيرين جاج لي وطير للحكومة خليهم يشبعوا الله لا يوفقهم ربهم.

ومن ثم خرجت من محل الدجاج وذهبت إلى المخبز وقلت : بدي لو سمحت بدينار خبز, فقال صاحب المخبز: يابو علي اليوم الخبز مش ببلاش...اليوم الخبز بالمصاري.
قلت: ما انا فاهم إنه بالمصاري, يعني من متى كنتوا بتعطوني أنا وأولادي خبز بالمجان؟والله اللي بسمعك بتحكي هيك بقول إنه جهاد العلاونه بوخذ الخبز مجاني!!.
قال: طيب شو السيره؟؟؟؟؟ماهو إنت كل يوم ابتاخذ بنصف دينار خبز...إش معنى اليوم بدك بدينار؟
قلت: سبحان الله شو إنتوا يا هالأردنيين شعب متطفل وحشري, ياخي شو بدك بي, انا اليوم بدي بدينار خبز؟ عندك مانع؟ عندك لولب؟ فضحك وقال: انت حر, بس عن جد شو السيره.؟؟
قلتله فيك تكتم السر؟..يا سيدي أنا اليوم عندي عزيمه ووليمه كبيره لشخصيات عريقه, فتطفل وألح بالسؤال وقال: بعرض أختك يابو علي تحكيلي مين اللي انت عازمهم!!.
قلتله بقلك بس ما بديش فضايح..ماشي؟
قال وبصوت منخفض: قول...وسرك ببير غميق ماله قرار.
قلتله: بصراحه أنا عازم اليوم رئيس الحكومه الأردنية وكافة أعضاء الحكومة والحقائب الوزارية.
فقال وهو منبهر: جد؟؟إنت أكيد مش صاحي..إنت اكيد مجنون.
قلتله: بلاش لا اتصدقش.
فاقترب مني وقال: مشان الله قول لأي وزير منهم يوظف بنتي..أو ابني.
قلتله: ولك يا أهبل هظول مش جايين عندي على شان يطعموني أو يأكلوني....ولك ما بدكيش تفهمها؟؟؟...ولك رئيس الحكومه دايمن ناط على الحايل والمعشر وقاعد للي بموت جوزها...ولك هظول جايين يوكلوا خبزي وخبز أولادي,ولك هظول جايين يوكلوني لحم ويرموني عظم...ولك عمرك شفتهم رايحين يوكلوا أكل أولاد الاغنياء؟ ولك هظول بوخذوا من قِدام أولادي وأولادكوا وبحطوا قِدام أولاد الأغنياء.. ولكوا هظول بدهمش تعيشوا وتستفيدوا إنتوا منهم, ولكوا هظول بدهم هم اللي يوكلوكوا ويوكلوا خبزات الأولاد..ولكوا متى بدكوا تصيروا تفهموا؟.

ثم خرجت من عنده وذهبت على بياع اللبن وقلتله: لو سمحت بدي دلوين لبن, دلوا لي وللاولاد والدلو الثاني للحكومه, حرام والله غنهم خطيه ما معهمش مصاري يشتروا لبن قلت بيني وبين نفسي مش معقول انا ىكل لبن والحكومه يا حرام ما يوكلوش لبن والله غير الله يوم القيامه يحاسبني, يعني شو موقفي بكره يوم القيامه لما بدي اقف بين يدين الله الديان الذي يدين الناس!! عن جد غنت قلي شو موقفي؟ شو موقفي لما رب العالمين يسالني ويقلي: كيف يا جهاد بتشتري لأولادك دلو لبن وما بتشتريش معك للحكومه دلو مثله؟ هظول يا جهاد بدهم يطعموا اوةلادهم؟ هظول جماعه فقراء مش املحقين يتستروا على اللصوص والحراميه, رئيس الحكومه بده يرقّع وراهم, وانت حرام عليك تشرب لبن لحالك, لازم كل يومين او 3 ايام تشتري دلو لبن غلك ودلو لبن للحكومه, لازم تحسب حساب الحكومه في كل شيء, وكل يوم لازم تشتري كيلو بندوره غلك وكيلو بندوره للحكومه, ضمة بقدونس غلك وضمة بقدونس للحكومه, عشان كمان يصير موقفك مشرّف جدا أمام الدول الغربية والدول الاجنبية, عشان تكون مثال للمواطن المحترم للمواطن المثالي, يلله بلا لكاعه جهزلي دلو اللبن عشان انا اصلا مستعجل اكثير وبدي اروح اشتري ب30 قرش فول لي وللأولاد وب30 قرش فول للحكومه.
بس كيف يعني بدها تمشي هذي المعادله؟
انا بحكيلكوا كيف: زمان مثلا كنا نشتري كيس فول مليان ب30 قرش وهسع حتى نشتري الكيس مليان صار بده 60 قرش, يعني 30 قرش لي و30 قرش للحكومه. افهمتوها؟
زماااان كنا نشتري ب5 دنانير 3 دجاجات, هسع ب5 دنانير يا دوب يجيبن جاجتين, يعني في جاجه بطلع انا كمواطن مشتريها للحكومه على حسابي.
زمان جاري السوكرجي كان يشتري ب5 دنانير أحسن سكره بتكفيه ليومين, هسع جاري السكير عشان يسكر مليح بده يدفع 10 دنانير, يعني هالمسكين كل ما بده يجي يصب كاس عرق إله لازم يصب معه كاس عرق للحكومه.





التعليق والتصويت على الموضوع في الموقع الرئيسي


التعليقات

1 - هاظا من فضل ربي 3
ماجدة منصور ( 2015 / 12 / 10 - 18:07 )
كل رؤساء حكوماتنا السعيدة بشعوبها...تعلف من ذات المعلف أخي جهاد و لكن كونك دعوت الحكومة على الغذاء..فلنا أن نعترض على هذه الدعوة و ان شاء المولى القدير.. يجعلهم ...يطفحوا من السم الهاري
وتذكر أي أن هاظا_أقصد هذا_من فضل ربي0
مساء الخير

2 - ماجدة منصور1
جهاد علاونه ( 2015 / 12 / 11 - 04:57 )
هاظا من فضل ربي رأس الحكمة مخافة المخابرات.

3 - شو اللي بتقوله يازلمي
عتريس المدح ( 2015 / 12 / 11 - 11:45 )
يعني زي ما عنا عندكم، و أنا بقول وين بتروح المصاري وليش ما فيها بركة، أثاري الموضوع إنه أنا كمان بطعمي السلطه الفلسطينية كل يوم و أنا مش داري
تحياتي يا عم جهاد

اخر الافلام

.. تزوج الممثلة التونسية يسرا الجديدى.. أمير طعيمة ينشر صورًا


.. آسر ياسين يروج لشخصيته في فيلم ولاد رزق




.. -أنا كويسة وربنا معايا-.. المخرجة منال الصيفي عن وفاة أشرف م

.. حوار من المسافة صفر | المخرجة والكاتبة المسرحيّة لينا خوري |



.. -عملت له مستشفى في البيت-.. المخرجة منال الصيفي تروي حكاية م