الحوار المتمدن - موبايل
الموقع الرئيسي


هل المرأه انسان؟سؤال بمن سيربح المليون

جان نصار

2016 / 3 / 2
كتابات ساخرة


اكيد مستغربين من السؤال الاستفزازي واللامعقول واللي ما اطنيش انسان سوي وعاقل وفي براسه عقل مش صرمايه او مزهريه اوحطبه بدل دماغه يمكن يفكر هيك تفكير او يسأل هيك سؤال.
بجوز تفكروا اني بخترع او بتجنى او حابب بس اكتب مقال لمجرد الكتابه وتضويع الوقت بما اننا كشعوب عربيه الوقت عنا ببلاش وما الو ثمن..
السؤال مش من راسي ولا من بنات او اولاد او حتى اعمام واخوال افكاري .السؤال طرح من مركز الدراسات الاكاديمي السعودي على عنوان دوره تدريبيه واذا مش مصدقين هاي الرابط وصورة المحاضر الفذ واسمه بالبنط العريض
http://www.raialyoum.com/?p=398863
المحاضر الشهبذ فهد ابن ام فهد الاحمدي.
صرنا بكل مقال او معلومه نطالب بهات الدليل.
تصوروا لو قالوا انو الملك او الحاكم فلان كان يقوم بالجنس الحرام او بشي عملية انزال بري نطالب بالدليل بكفيش الشكوك ويمكن نطالب بتوثيق يو تويوب او فيديو.
او حتى مسؤول مختلس او فاسد وكان لدى تسلمه لمنصبه جاي بالشحاطه على الوزاره واليوم عنده قصر ومصاري بالهبل لازم دليل واثبات بكفيش الظاهر والمحسوس.
فمثلا مسؤول او مهم بقوم بالخيانه الزوجيه وخلال العمليه لازم نطلب منه بكل احترام, اذا سمحت نصور فيلم اباحي بوجودك مع عشيقتك وهاي التصريح ,,وارجوك انك تبدع بالعمليه مشان نوثقها.
وانت يا مرتشي اذا سمحت بدنا يوتيوب بالصوت والصوره وانت عم تترشى مشان ننشروا للقطاع العام اذا سمحتم المطلوب التعاون مشان تحقيقاتنا الصحفيه وكتابة مقالاتنا واظهار للحق مش اكتر.
يا جماعه والله ما منتجنى ولا منظلم ولا منتبلى على حد لكن مع الاسف احنا كشعوب عنا بلاوي ومصايب ومأسي من هالشاكلي بالملاين. .المفروض انو المحاضر هاد يكون مثقف,,, وحتى لو كان حمار وتيس وبنص عقل في حد عاقل ممكن يسأل هيك سؤال ويكون موضوع لدورته اذا ما كان متخلف هو ومؤسسته والقائمين والداعمين والممولين عليها.
لما منقول انو الملاين من شعوبنا عندها خلل جيني وخلل عقلي وخلل وراثي وخلل فكري وخلل ثقافي وخلل معرفي وخلل حضاري وخلل ابداعي وخلل منطقي وخلل وخلل وخلل وانا قصدت اكتب كلمة خلل اكثر من مره مشان نوعى ونصحى على وجود خلل عام في المنظومه الفكريه لشعوبنا وبلاش حد يتفذلك ويقول انو مكنش القصد او افهمنا غلط او هاد واحد وبصيريش نعمم .
لاء يا جماعه بدي اعمم واحمم واسمم واطمم والملم واخمخم واصمم لحد ما نصل يوم ونرمم هيك عقول وهيك افراد والاخ مش الوحيد اللي حامل مثل هيك افكار في متلو متايل وبالملاين من هالمجتمع الذكوري الاستعلائي المتخلف اللي شايف انو بس الرجل انسان والمرأه لاء.
تخيلو لو سئل هيك سؤال ببرنامج من سيربح المليون.
هل المرأه انسان؟
الخيارات
1.لاء
2.روبوت الي
3.حيوان(مع الاعتذارلكل نساء العالم))
4.نعم
اكيد المتسابق الاحمدي واللي على شاكلته راح يحتار بالجواب ويطلب رأي الجمهور.
قرداحي:ارجوكم يا جماهير بس اللي بعرف يجاوب واللي ما بعرف بلاش يدعس على الرموت كونترول.
يا متخلف :الجمهور اعطاك 60%للجواب الرابع نعم
لانو حتى الملاين من ذكورنا مش متأكده من الجواب.
والجواب الاول لاء اعطاك 30%
والجواب رقم 2 و3 اعطاك لكل واحد منهم 5%
ها شو بتجاوب يا متخلف..
مع الاسف الجمهور واللي على شاكلتك لازالو لا يعتبرون المرأه انسان من منطلق انها عوره وناقصه عقل ودين وانها اقل من الرجل وفي الملاين من الذكور معتبرينها مكب جنسي وخادمه للرجل ولهيك فكرة انها تكون انسان متساوي مع الرجل مستبعده.
اصلا الملاين بعاملوها اسؤ من الحيوان (مع الاعتذار بس هاد تجسيد لواقع الحال الموجود واللي يمارس).
المتخلف بفكر ومش متأكد من صحة الجواب طالما انو مش 100 في الميه من الجمهور اعطى الجواب بنعم وبطلب حذف اجابتين.
بعد الحذف بقي عندك لاء ونعم.
المتخلف حيران وصعبوها عليه وعلى منطق تفكيره وسوية عقله وبطلب الاتصال بصديق.
الو استاذ فهمان معنا صديقك متخلف في برنامج من سيربح المليون وبعده بالسؤال الاول ومش راح يوصل لغيروا حابب يسألك سؤال مشان ىتساعده.
معكم من بداية السؤال نص ساعه قابله للتمديد مشان تجاوبه وتساعده بجوز على الله يفهم.
المتخلف :عزيزي فهمان هل المرأه انسان وعنا بعد الحذف ورأي الجمهور باقي لاء ونعم شو رايك.
فهمان:عيد السؤال مش فاهم عليك وطبعا يعاد السؤال.
فهمان:شوف السؤال صعب وفش اجابه محدده للجواب. هو حسب الزاويه اللي انت بتطلع للمرا وحسب نوع القرابه .
اذا كانت امك وبتحبها كتير فنعم بتحفظ واذا كانت مرتك ومطلع دين اهلك فلا .واذا كانت مرتك وحبابي ولطيفه وحطيتك على كفوف الراحه فنعم بس مش ميه في الميه ما انت عارف بضلوا نسوان وبدهم سنوات تصيروا زينا احنا الرجال النضوات.
المتخلف:ممكن تبديل السؤال لانو احترت بالجواب.
تتا تتا تتا تتا انتهى وقت البرنامج ووقتك ووقت اهلك وعشيرتك وكل اللي على شاكلتك وروح الله لا يوفقك على عقلاتك وتخلفك وبعد بدنا سنوات ضوئيه كثيره قادمه تنمسح تخلف امثالك من الذكور.
ختاما معنديش تعليق على الموضوع اللي مش صادم لانو متوقع في مجتمعنا والمحاضر الفهد مجبوش للسؤال من عقله لو ما انو شايف وعندو شك بانو المرأه انسان ونصى واكتر من نص المجتمع واكيد مش راح اكتب اشي كتير عن واهبة الحياه حتى للحيوانات امثال المذكور مع الاعتذار من الاخوه الحيوانات.





التعليق والتصويت على الموضوع في الموقع الرئيسي


التعليقات

1 - مسألة فيها نظر
سمير ( 2016 / 3 / 2 - 16:48 )
عمي جان الشغلة مو سهلة, يعني التسرع في الاجابة قد تكون من الشيطان , فلو سؤل ابن عثيمين عن الموضوع لاجابك ( لا تسألوا عن اشياء...) ولو سألت الشيخ الكبير جلال الصغير (ابو نستلة) لانه حرم اكل النستلة, يعني الجوكليت, لقال لك( على الاحوط وجوبا ان لا تجيبوا لان المسألة محسومة, المرأة ليست انسان لان الانسان مذكر والمرأة مؤنث, والله اعلم) الله يكون في عونك عمي جان

2 - الاستاذ سمير المحترم
جان نصار ( 2016 / 3 / 3 - 05:51 )
بالفعل الاجابه بدها تأني لانو العجله من الشيطان.شخصيا لما شوفت السؤال احترت وما عرفت الجواب ورحت استعين بالعم غوغل على الانترنت وعلى الويكابيديا عدل هدول ترى الجماعه مثقفين وحتى بيعلموا بالغيب ولما سئلت السؤال عينك ما تشوف النور الكومبيوتر ولع وانحرقت كل شبيساتو وفيوزاتو ومع الاسف حتى الكومبيوتر على الغباء والتخلف ماخد موقف
الاجابه اجت على كومبيوتر تاني مين الحيوان الدابه اللي بيسأل هيك سؤال
يسعدلي صباحك يا عم سمير
الساعه الثامنه بتوقيت بعرفيش اخو غرينيش

3 - انت دائماً متألق
شيخ صفوك ( 2016 / 3 / 3 - 08:11 )
اذا كان الانسان علي شاكلته
فيجب ان لا تزعل المرأة اذا كانت شيئا اخر
تحياتي بالأماني الطيبة
يا وردة

4 - عزيزي شيخ صفوك المحترم
جان نصار ( 2016 / 3 / 3 - 08:24 )
يسعدك ربي يا شيخ صفوك يا اللي ناس حبوك من كتر ما وصفوك سلامي الك ولاخوك
النسوان في كل مكان وزمان همي نص المجتمع وبر الامان
تحياتي ومودتي يا غالي

5 - العرب بين الخلل الجينيّ والخبل الدينيّ
ليندا كبرييل ( 2016 / 3 / 3 - 12:35 )
الأستاذ جان نصار المحترم

عنوان تعليقي استقيتُه من مقال لي : ( الحروب بين الخلل الجيني والخبل الديني) ،

وقد بينتَ لنا في طرحك اليوم أن الخلل والخبل ليس في الحروب الوحشية التي قامت في التاريخ العالمي وللعرب دور كبير فيها من الماضي إلى الحاضر ، بل يمتد المرض ليشمل شخصية الإنسان العربي
وأنا أتمنى ان يطلع القراء على هذا الجنون

المرأة الناقصة العورة تلد الرجل الأعور الناقص

شكرا لأنك أعطيتَنا راحة من قصة السعوديين
ولكن ..
أية راحة ؟
انظرْ في عنوان الرابط بقول:
الأكاديمية السعودية للتدريب والاستشارات

السعودية ورانا ورانا، كيفما تلفّتنا هاها

تحياتي لك وللمعلقين الكرام

6 - الاستاذه ليندا كبرييل المحترمه
جان نصار ( 2016 / 3 / 3 - 13:09 )
انا في الواقع من فتره وبقول حابب ارجع لمقالاتي السابقه بس مع تسارع الاحداث وتدهورالاوضاع السياسيه المقلقه التي فرضت نفسها حتى علي.
المشكله في الغرب والعالم المتحضر اذا الواحد ابتعد عن السياسي ممكن يعيش ويستمر ويوجه اهتماماته لكل هواياته واللي برغبوا من الحياه من فن وابداع وعلم لكن عنا السياسي والدين مقحومين علينا ليوم الدين ان قولنا اه او لاء وابتعادنا عنهم صعب لاننا متنفسهم مع الهوا.

بعدين يا ست ليندا انا كاتب زي الممثل بحب اتقن كل الادوار واورجي اني بفهم بالسياسي والي فيها مش زي ما البعض كون عني فكرة السطحيه والمخ الفاضي بدك تقولي وجاهه وعرض حال
انا قرأت مقالك اللي كتبتي عن الخلل والخبل وبصراحه احنا شعوب زي النعامه مفكرين اذا طمرنا راسنا بالرمل ما راح حد يشوف عيوبنا ولا حتى اننا نشوف عيوب انفسنا
تحياتي ومودتي

اخر الافلام

.. بعد أربع سنوات.. عودة مهرجان عنابة للفيلم المتوسطي بمشاركة 7

.. بدء التجهيز للدورة الـ 17 من مهرجان المسرح المصرى (دورة سميح



.. عرض يضم الفنون الأدائية في قطر من الرقص بالسيف إلى المسرح ال

.. #كريم_عبدالعزيز فظيع في التمثيل.. #دينا_الشربيني: نفسي أمثل




.. بعد فوز فيلمها بمهرجان مالمو المخرجة شيرين مجدي دياب صعوبة ع