الحوار المتمدن - موبايل
الموقع الرئيسي


اطراء النساء في السراء والضراء

جان نصار

2016 / 3 / 18
كتابات ساخرة


بصراحه انا كاتب بحب كتير الاختصاص ومقالي هذا اليوم مخصص تحديد للرجال كيف يعيشوا سعداء مع النساء بعد المداهنه ومسح الجوخ والاطراء ولو كان نصه كذب ورياء.
اكيد كله مش وجهني وفي كتيرمن الاطراء راح يكون في محله وزي ما انتو عارفين روح قلبي المبالغه ورش البهارات واختراع السيناريوهات.
لكني هون بدي من الزلمي انو مشان يعيش بسعاده دائمه مع المرا انو دايما دايما على طول الخط يكون لطيف وجنتل لدرجة الوصول الى مرحلة الاشباع والاوفر دوز لانه في حالات الاطراء هاي في من وراها مكاسب اكتر من المخاسر.
المرا بدوب دوبان لما الزلمي يشيد ويشجع ويطرب من طبيخها واكلها في كل الحالات.
حتى لو كان الاكل محروق او زائد الملوحه او الرز مخبص اومش مستوي واللحمه بعد بدها اسبوع على النار والبهارات عملتلك قرحه والزيت عملك حزاز وكل عصه من الاكل كانت بغصه.. بالاخير بتقول انو كل يوم بعد يوم اكلك يا حياتي عمال يكون روعه وسفونيه احلى من اليوم اللي قبله..
ويا سلام قديش المرا بتفرح وبطير لسابع سما لما بتقولها انو اكلها وطبخها احسن من اكل وطبخ امك بالف مره حتى لو كان العكس.
اذا كان في ضيوف لازم كمان تشيد وتمجد وتعظم بطبيخ مرتك وتقول على الملئ للحضور انو فش بعد طبخ مراتي.. حتى المطبخ الصيني وكل مطابخ شعوب العالم لازم يتعلموا منها لانها ماهره وشاطره ونفسها طيبي على الاكل.
هون انت كرجل بتكسب نقطين وبتصير ادام مرتك نور العين اما هي اذا كانت بالفعل شاطره وعارفي انو عقلك ببطنك ومعدتك بتكون هي من ناحيتها كسبت اربع نقاط.
احنا منعرف انو الرجل العادي عنده قلب ومعده لكن الرجل الشرقي عنده معدتين ما اظنش انو عند قلب خصوصا بعد الزواج لانه عندها بعمل لقلبه ديليت وبلغيه.
اذا رجع الزلمي على البيت ولاقاه قايم فوقاني تحتاني مش لازم يزعل ويحتد لازم يأرجي اسنانه بأبتسامي عريضه ويقول للمرا والله هالولاد اتعبوكي وشغلك لفوق راسك (والله لا يعطيكي) عفوا عفوا الله يعطيكي الف عافيه المقال قولنا انو حضاري وجنتل,, فبلاش الطخبيص يا حضرة الكاتب ثم انت اللي بلشت بالنصائح مش القراء فبي كول وريلاكس وهدي اعصابك.
الزلمي لما بنشر الطاقه الايجابيه اكيد راح ينعكس على المدام وهي تكون كمان طاقتها ايجابيه.
لازم تحاول ها بقول تحاول انك تهتم بنفس اهتمامات المرا ولو كانت بالنسبه الك بايخه وممله وبتحرقلك اعصابك وبتطلع عن دين اللي خلفوك.
فالاهتمامات المشتركه لها نصيب من الاستقرار العائلي والعاطفي وبتخفف وجع الراس والزن.
فمش غلط انك بالمسا تجلس بجلسه عائليه مع المرا وتتفرج على نفس المسلسلات البايخه اللي هي بتحضرها وتتفاعل معها.. اذا كان المسلسل تركي وفي بكاء وشفت المرا عم تبكي فشارك بهاي اللحظه العاطفيه وولول والطم على خدودك واذا ولعت الامور فمزع ملابسك واواعيك من الحزن والبكاء هاي هي من اهم المشاركات الايجابيه.
اذا كان المسلسل او الفلم اللي جنابها بتحضروا كوميدي حتى لو ما كان يضحك اذا شفتها بتضحك فاضحك وقهقه لحد ما تشخ على حالك من الضحك مشان تشعرها اديش انت متفاعل معاها.
تنساش برامج الطبخ لانو اهتمامات النسوان بالطبيخ تحظى على نسب عاليه من المتابعه والمشاهده, واول على اخر فانت كرجل شرقي بتحب بطنك, اكتر من وطنك وامك وابوك وكل اهلك, فمش غلط انك تتابع بشغف زائد وتتفاعل مثل الاكسجين مع الهيدوجين .
مش غلط انك تعزم المرا على شي عشاء رزمانسي بشي مطعم مفتخر. ولانك شرقي وبتغار من خيالك حاول توخدها على مطعم بالصحرا او في منطقه نائيه..
.اذا اضطريت والمطعم فيو رجال كتير وحتى نسوان فقعد المرا بزاويه محشوره ومحصوره بحيث ما تشوف ادامها الا خلقتك لانها راح تؤرؤ راسك بالزن والحكي على الرايح والجاي وخصوصا على النسوان خوتها وملابسهم. بصير بدها زيهم ,او تقولك انو احلى انا والا هاي الفكحه او الهبله او المجعمصه او الحوله وبيصير تفكر حالها نفرتيتي او فينوس الهة الجمال.
جامل مرتك على الطالعه والنازلي وخصوصا على ملابسها مش غلط تقولها يا سلام هادا اللون عليكي يجنن(اغنيه لكاظم الساهر) او الاسود يليق بك(عنوان روايه لاحلام مستغنامي).
يعني كلمات الاغاني والمسلسلات استعملهم في اوقات الشده ولما بخلص عندك الكلام ونئي جمل وعبارات مفيده وفيها هيمان وحب وتوهان وكل اكسسوارات الغرام.
مش غلط انك تشتري لمرتك شي ضمة ورد بدل النعنع والبقدونس وخليها بين فتره والتاني .
على فكره ضمة الورد والعطر او لما بتغلى الاسعار شي خاتم او اسويره لما بتشوفهم المرا اكيد بتبدى بالشكوك وبتطرقك موال كنك عاملك عملي وبدك تداري عليها,, فيلا بلا الورد ولا الهدايا انسى تراجعت في كلامي.
عزيزي القارئ بديش اطول عليك اكيد كل واحد الو اسلوبه ,هاي بعض ما عندنا, حاول تطبق بعضهم وشوف اذا تغيرت الاحوال او لاء.
اذا ما تغيرت خليك على ما انت عليه والعمر لحظه واصبران الله مع الصابرين.
النصيحه الاخيره ساير حماتك اكتر من مراتك واكسبها لصفك.الحماه بتقلب موازين القوى واذا كانت بصفك فساعتها يا حبيبي ادلل علي ادلل وكول الاكل مع الخيار المخلل.





التعليق والتصويت على الموضوع في الموقع الرئيسي


التعليقات

1 - من المقوقس الي جان الغير مقوقس
شيخ صفوك ( 2016 / 3 / 18 - 23:43 )
اما بعد ..فقد وصل الي مسامعنا انكم تلفُّون و تدورون حول ملكة يميننا (مونيكا بلوشي)بنت ابي جحش العكرمي فويحك يا عدُّو الله فاني وبعد التشاور مع اهل الحل و العقد قد عقدت العزم علي الزحف عليكم **وعندما يصلك كتابي هذا الذي كتبته علي جلد الببغاء الاعور اكون قد لبست شروالي و انتعلت نعالي و فرشت اسناني و اسنان حماري الازعر و سرجته و امتشقت سيفي و رمحي وزوادي فاستعد لملاقاتي يا هذا عند مشارف خيمتكم المهلهلة ::وعندما تحين الساعة واصيح بك هل من مبارز فاخرج الًّي و لا تختبئ من بطشي و رائحتي عندها سوف يكون ضرب الرقاب واذا لم تكن لك رقبة سوف اركًّب لك واحدة .ولن تاخذ مني لا رحمة و لا شفقة و لا فلافل و لا كوسة باللًّبن. فماذا انت فاعل ايها القزم المتجبَّر يا زير النساء
اكيد انت الآن تتحس رقبتك او انك اغلب الظن قد شخخت علي سروالك الفظفاظ او اختبآت في الثلاجة.لا تبعث لي رسولا لاني سوف افصل خشمه عن وجهه و الصقه عل صلعته الحلال
والسلام علي من اكل الدزّيرت بعد الغداء


2 - الا الحماة
سمير ( 2016 / 3 / 19 - 00:02 )
ليش ياعمي جان مو كنه صحابة, طيب تريدني احب حماتي حتى مرتي ترضى عني؟ البابا فرنسيس حكه مره نكته, قال انو فد يوم هو بحديقة الحيوانات فجا واحد قلو حماتي وقعت في حوض التماسيح , قلو شو تريد اسوي؟ قلو صلي للتماسيح! سبب العنوسة انو البنات امهاتهم على قيد الحياة!!!!! احترامي

3 - تمن و مركة
شيخ صفوك ( 2016 / 3 / 19 - 00:13 )
هذه الاكلة هي اشهر اكلة في العراق
زوجتي العزيزة دائماً تبحث عن كل جديد فيما يتعلق بالاكلات الجديدة و تتابع بدون كلل او ملل كلًّ جديد ولكن و اكرر و لكن كل مرًّة ارجع من الشغل و ان احلم بالستيك اند مشروم او روزتو وذ برونس
فاذا بيَّ اصطدم بالتمن و المركة وهكذا دوليك
حتي تمكن من الياس و سقط شعر خشمي من القهر و الحزن
و سلامي لك يا اخي العزيز جداًّ علي قلبي

4 - الصدق هو الحل
nasha ( 2016 / 3 / 19 - 01:43 )
الاخ جان انت تاخد موضوع الاطراء بسخرية شديدة وبالحقيقة هو مضوع مهم جدا وخصوصا بين افراد العائلة.
كل انسان رجل او أمرأة يسعد ويتشجع وتزداد ثقته بنفسه عندما يُمدح .
ولكن الاطراء سلاح ذو حدين . فهو من جهة يزيد الثقة بالنفس ويشجع الذي يقع عليه الاطراء وبنفس الوقت اذا اسيئ ستخدامه يؤدي الى الغرور والعنجهية الفارغة.
صدام حسين دمر العراق .وكان احد اسباب التدمير غرور صدام لكثرة الاطراء عليه.
اذا مدحت زوجتك بما ليس فيها فانت ستخرب بيتك بدون ان تدري واذا ذميتها على النازل وعلى الطالع فالنتيجة نفسها.
الاطراء مفيد ومشجع عندما يكون صدقاَ ولكنه هدم وتخريب عندما يكون كذباً.
تحياتي

5 - شو بصير إذا الأكلة مالحة؟ كول خيار وخلاص
ليندا كبرييل ( 2016 / 3 / 19 - 05:16 )
إيه ها!
هيك مقالات بدنا أستاذ

شوف أخي
فرجيني عربي واحد لا يهتم ببطنه
حطّوا المسكينة للطبخ والنفخ وتربية عرّ ولاد وبعدين جايين يحكوا عل لنسوان
طلعت الأكلة مالحة،كُلْ خيارة بروح الملح من جسمك
رز مخبّص؟للمعدة أرْيح
مو مستوي؟ كمان للمعدة تمرين رياضي لتشتغل وبلا كسل

ولحمتنا لها رائحة غير مستحبة والبهار ضروري
عندك قرحة؟لا تكثر من الطعام حتى لا تسمن واشربْ حليب للقرحة مفيد واحسن منه أفوكادو،كلْ ربع أفوكادوية كل صباح بتروح القرحة

وأكيد ميّة بالميّة طبخي أحسن بمليون مرة من طبخ حماتي، قولْ ليش؟
أنا جامعة تكنيك الشيف أنطوان ومنال وأيمن
وعندي كل الوسائل التكنولوجية
حماتي شو شافت من هالشغلات؟
بس هي القضية عناد وغيرة عالرجل
هاي بتقول جوزي وهاي بتقول ابني
والأهم مثلنا الرائع:
أمك متل ما ربّتك ومراتك متل ما علمتك

ودخلك شو بسير لك إذا بكيت معها شوي على مسلسل تركي؟
على بنا أنت اشتراكي والمشاركة لازمة

والبيت قايم قاعد بسبب أولادك أستاذ مو بس أولادها
والشغل ببلادنا مو قاتل بعضو،الرجل العربي معدل عمله يوميا نص ساعة وبس، قوم حرّك عضلاتك ورتّب معها البيت
وشاركها بتعليم الأولاد عالترتيب
وجايين تحكوا
هه

6 - تعليق
جان نصار ( 2016 / 3 / 19 - 13:19 )
اعتذر على الاطاله في الرد من الجميع من الصبح لحد الان والمقع محجوب ومانو مرغوب هلئ بالاخير بان الحبوب وبرد على كل تعليق وما هو مكتوب
تحياتي وابتساماتي

7 - عزيزي شيخ صفوك المحترم
جان نصار ( 2016 / 3 / 19 - 13:39 )
لاقيني باب الساحه يا ابو سماحه وها انا اصيح زي الديك الفصيح هل من مبارز, مين قال انا.
ويحك اتتحداني في عقر داري .اني ارى رؤوس قد اينعت فحان قطافها واني لصحابها.
انتظرني اني قادما بالجيت الخاصه والتي تحمل فرسي وسيفي المقوقع والمسنن والمدبدب والحاد القاطع المازع .سالقاك في عاصمة الرشيد
صدقني يا زلمي هدول النسوان ربنا ما بفهم عليهم مع الاعتذار منهم بس هاي خلف الخلاف عندي جايبتلي الدور.مالو التمن الرز والمرق وخصوصا لما تغرف بالايدين بدون معالق وشوك
الطبخه اللي بطلبها بسنة 2012 امبارح طبختها بال2016 وكان في عزومي وللضيوف بس.تغديت تيمم وعلى الريحه وقلت اني عامل رجيم ودايت وحميه.
خليها على ربك يا مواطن
تحياتي يا صديقي

8 - الاستاذ سمير المحترم
جان نصار ( 2016 / 3 / 19 - 13:48 )
في مقال سابق كتبت من الافضل ان تبحث عن زوجه بلا حماه او ان تسفر حماتك هي وحماك الى القمر لكن اذا وقع الفاس بالراس فما الك الا الدبلوماسيه للخلاص
في واحد سألوه ايش رأيك في حماتك ومراتك
قال الاتنتين زي الزفت
التفت ولاقاهم وراه
قال والتلاتاء قرف
والاربعا ء زهق والخميس لا يطاق
والجمعه والسبت منقعد بالبيت مشان نقابل الحلوين هدووول
تحياتي ومودتي يا الغالي

9 - الاستاذ ناشا المحترم
جان نصار ( 2016 / 3 / 19 - 14:02 )
شوف يا صديقي معظم اللي بكتبه في مقالاتي الاجتماعيه وعن العلاقات الزوجيه هو تنفيس مش اكثر هو الواحد بالبيت بقدر يتخنفس
ارجوك يا عزيزي خليني افضفض وانطلق. الميزه اللي عندي انو زوجتي اجنبيه ما بتقراء عربي والا فكرك انا ممكن اكون منفتح لهالدرجه
اصلا ليش كل كتاباتي فيها نقد لانو حرية الكلمه المقدمه الاولى للديمقراطيه على قولة عبد الناصر عندنا مفقوده
انا زلمي على الطالعه والنازلي بالبيت بمدح وسيل من الاطرأت نازله على المرا زي زخ الشتا.
ابقى سلملي على الصدق لانو عنا انتهت مدة صلاحيته وكل واحد بنام على الجنب اللي بريحه
تحياتييا عزيزي

10 - الاستاذه ليندا كبرييل المحترمه
جان نصار ( 2016 / 3 / 19 - 14:20 )
فكرك انا عندي الجراه اقول انو الاكل مالح او ناقصه ملح او رز مخبص او مش مستوي نو نو ولا يمكن كله اكل تمام وصحي وعلى المسطره وبتجاوب مع المقايس العالميه للجوده.
على فكره احنا بشهر اذار وكل عام وانت وكل نساء العالم بالف خير وصحه وسلامه وبعد يومين في عيد الام كمان تهنئه على البيعه لانه عندكم زي ما شرحتيلي راح يكون العيد الابيض
فعيد سعيد عليكي وعلى كل اخوتنا في الانسانيه اليابانين.
مقالاتي هاي مشان غيري يتعلم ويحفظ الدرس وما يوقع بالاخطاء.
انا حتى سندويش اللبنه بشيد فيه وبطعمه وكانه طبخة اوزي
زمن الجعمصه والدلال حول اليوم انا في مرحلة كول واشكور
تحياتي ومودتي اسعدني حضورك والاحبه المعلقين.

اخر الافلام

.. تفاعلكم | أغاني وحوار مع الفنانة كنزة مرسلي


.. مرضي الخَمعلي: سباقات الهجن تدعم السياحة الثقافية سواء بشكل




.. ما حقيقة اعتماد اللغة العربية في السنغال كلغة رسمية؟ ترندينغ

.. عدت سنة على رحيله.. -مصطفى درويش- الفنان ابن البلد الجدع




.. فدوى مواهب: المخرجة المصرية المعتزلة تثير الجدل بدرس عن الشي