الفيسبوك
التويتر
اليوتيوب
الانستغرام
لينكدإن
تيلكرام
بنترست
بودكاست
الحوار المتمدن
- موبايل
الموقع
الرئيسي
اوراق بنما خلت ومخلت صدر مغطى
جان نصار
2016 / 4 / 6كتابات ساخرة
بعدوه الواحد لليوم مش قادر ينسي تسريبات الوكيليكس اللي يادوب حفظنا الاسم, كن بطقعونا تسريبات العن واطقع اللي هي وثائق بنما وبقلولنا هاي اكبر تسريبات بالتاريخ.
البعض بقول انو هالاوراق هي فضايح تهربات ماليه وتبيضها وغسيل وتنشيف اموال لزعماء سياسين عايشين واشي مرتحمين ومشاهير ورياضين ومن تعدلكو مين و ما خلت صدر مغطى الا وكشفتوه . بس انا بقول لا في بعد صدور وفخاد واشياء كتيري مغطايي وهاي جاي على الطريق او بشي فضيحه تاني انتظرونا فستجدون ما يسركم او يرفع ضغطكم.
اكتر شي بعجبني في اي خبر السؤال البايخ اللي بطرحوه بعض الكتاب والصحافين والاعلامين قال يعني وكأنو سؤال ذكي كتير وبدل على الفهمني:
لماذا هذا التوقيت بالذات يعني ليش هلئ وهسع واسه وهلئيت وهالحين ودلوقتي صارت هالتسريبات.
نفس الشي راح ينسأل بعد او قبل بسني سؤال بايخ ومسئع ومسرمج وكانوا راح تفرق يعني.. وبذكرني بسؤال:
لما بفوت واحد عند الحلاق وبشوف 5 او 6قاعدين وبسأل انتو جاين تحلقوا؟... وبجاوبوه لاء والله احنا لجنة تقيم جاين نشوف ونقيم اداء وعمل الحلاق.
اكيد جاين يحلقوه يا فهمان
وفي كمان سؤال بايخ كتير منا بسألوه لما يجي فرد من افراد العائلهعلى البيت ومنسألوه انت اجيت يابا يا حبيبي ؟كن بجوبك ابنك لاء يابا بعدني هناك.
منرجع لموضوعنا اكيد كل اللي بتعلق بزعمائنا وسياسينا وحكامنا وملوكنا مش اشي جديد غير الارقام .ما احنا من يوم يومنا عارفينهم انهم لاهطين كل مقدرات وثروات بلادنا,, وبعدين الجماعه على القليلي بسرقوه من اوطانهم يعني وطنين ومخلصين لسرقة شعوبهم .اي نعم في شوية صفقات وعمولات اجنبيه بس الانتماء لسرقة الوطن هو هاجز الحكام والملوك والسياسين.
نقعد نسمي مين من الحكام والسياسين والملوك فاسدين من 100 سنه لليوم مش راح نخلص وبنعدوش حتى على الاله الحاسبه الافضل انو الواحد يذكر مين كانوا نضاف ومش حراميه وهدول يا دوب ينعدوا على الاصابع.
اكيد مش راح اسمي لاني لو سميت النزيهين منهم راح يطلعللي 100 معترض على كلامي ويقولك: هاد كان نزيهه وشفاف ومش مختلس هاااااااا وهات حيكها.
منرجع للعنوان ليش انا قلت انها خلت وما خلت صدر مغطى؟
لانه ولا اسم امريكي او اسرائيلي طرح بهاي الاسماء معقول هاي الشغله تصير, والا الجماعه بسرقوه بس ببلادهم وحساباتهم بفتحوها ىبسويسرا او ببلادهم.
هداك اليوم حوكم رئيس وزراء اسرائيل الاسبق اولمرت على الاختلاس وكلها شقفة فيلا بمليونين دولار عيب الواحد يحكي فيها.بس بيناتنا على القليلي في حساب هاي كمان رئيس الدوله الاسبق كساف محكوم 7 سنين على تحرش واغتصاب ..,
عمرنا سمعنا عن رئيس اسبق او سياسي علي القيمه حالي في بلادنا حوكم على اختلاس او نهب او تحرش واغتصاب؟؟؟. ولا يمكن احنا زعمائنا وحكامنا وسياسينا اشرف من الشرف ذاتوه.
شوفوا يا جماعه قصة مؤامره وطبخه امريكيه يمكن ومش بعيده رغم اني ارفض هاد موضوع المؤامره اللي على الطالع والنازل بس كل شي جايز حتى جواز العجايز.
شو هي المؤشرات يا ترى؟
قال الاخبار بتقول انو صحفي الماني بالصدفه عثر على هاي التسريبات وصحيفه المانيه تبنت ونشرت الخبر.
فهمونا كيف بالصدفه والحكي بتكلم عن اسراربالغة الاهميه تطال اكبر زعماء وحكام العالم ومشاهيرهم.
ايش لاقاهم بالشارع على الطريق مزتوتين بشي حاويه يعني بالزبالي او لاقاهم عند بائع تحف وانتيكه قديمي.
هدول يا جماعه 11.5 مليون وثيقه بدهم عشرين سيارة شحن ما بحملوهم.
اللي فهمنا انو هناك مجموعه من الصحافين الاستقصائين اللي صارلهم سنوات بشتغلوا على هالموضوع على اساس انهم من سبعين دوله. رغم انو المؤشرات تشير الى ان الكثير منهم عملاء للسي اي ايه والمخابرات الامريكيه.
بعدين هدول اخبار وتسريبات 4 عقود يعني اربعين سنه يوم بيوم لغاية 2005 بس الغريب انها طالت زعماء مشهورين ومعروفين على مستوى العالم اليوم بصراحه انا مش كتير فاهم شو اللي عمال يصير يعني اخبار سلطه من هنا وهناك.
تصريحات مكتب المحاماه موساك فونيسكا الشهير اليوم في بنما بتقول انو في اختراق امني حاسوبي لوثاقهم السريه وقدموه فيو بلاغ للنيابه بانتهاك الخصوصيه يعني كل هالحكي بنسف موضوع الصدفي للصحافي الالماني. بس انفراد الصحافه الالمانيه بالخبر بداية ببرء ساحة الامريكان وبطلعوا بصوره سلفي ملونه لا تطالهم لا من قريب ولا من بعيد, وملعوبي كتير حلو واكيد التعبت علينا كشعوب ومشي الحال.
عفوا يا حضره الكاتب اليوم بطل في اوراق وملفات في كومبيوتر وحوسبه واشي بقولو يو. اس .بي مش اكبر من البعبوص .و5 او عشر بعبوصات من هال يو. اس. بي بتجيب الدور لوزارة الدفاع الامريكيه والبنتاغون يعني اكيد بكفوه. الموضوع بدو قرصنه مرتبه وتكون على اعلى المستويات.
يعني يا حضرة الكاتب كل هاي الفضايح تأليف واختراع من الامبرياليه والصهيونيه واليد العليا فيها لامريكا وفش اشي منو؟؟.
لاء يا جماعه في منو ومنو في كتير وخصوصا اخبار جماعتنا بس في ضرب تحت الحزام يعني على البيض وفي بعض الاخبار لغايه في نفس يعقوب المحبوب اللي روح قلبي فيه بدوب العم سام.
مثلا من الاسماء المطروحه الملك سلمان ابن عبد العزيز الحالي وسؤالنا :
ما هو ملك وهل يحتاج الى تبيض اموال وهوبحاله مع وزنه اموال.ليش في ضرايب للاسره الحاكمه السعوديه وليش في مين يحاسب.الملك اللي قاعد على الكاش ريجستر تبع المملكه وموضوع اللهط طال كل الاسره. مش الراحل اللي قبله عبدالله يعتبر اغنى اغنياء العالم .
في بالسعوديه قانون للاسره المالكه بقول: من اين لك هذا.
اسم الملك طرح لعدة اسباب :منها انك تحت الوصايه والهيمنه الامريكيه واحنا شايفين وعارفين وانت من غيرنا ولا حاجه وممكن انو انحرق كرتك وحضر حالك على الباي باي وبلاش عنطزي انت وكل اسرتك مسجل خطر عند الاداره الامريكيه .
هاي رساله للسعوديه والخليج لا تلعبوا بالنار وانتو مش ادنا وفكروا كتير منيح هو اذ ذا بوس.
اسم الرئيس الصيني والرئيس الروسي ولو انها لم تطالهم شخصيا لكن اسماء المقربين اليهم هاي مشان الدردكي والتشويش على اكبر زعماء منافسين لاميركا خربطة الرأي العام الصيني والروسي والتحريض عليهم من قبل شعبهم ومعارضتهم ومشان ادخالهم بالحيص بيص.
من الاخر امريكا تعلن انها زعيمة العالم وتترئس النظام العالمي الجديد.
كوريا الشماليه وسوريا وايران قال هدول الدول المارقه شكلوا شركات وهميه مشان مصالح بلادهم .اشي مشان يستورد تكنولوجيا وقوي نوويه مثل كوريا واشي مشان يشتري نفط مثل سوريا واشي مشان يبيع النفط مثل ايران.وغيرها من الاسباب وهاد طبيعي طالما انو هاي البلد-ان عليها مقاطعه وحصار دولي.
معقول انو كوريا الشماليه وفي عليها مقاطعه دوليه تنزل على الصيدليه وتصرف روشته مشان تشتري 2 كيلو يورانيوم مثلا.او انو ايران النفط اللي عندهم يخليلوه ويعملوا منو مخلل او حتى ينشفوه ويبيعوه على اساس نفظ خالي الدسم ويعلبوه ويكتبوا عليه انتاج الاتحاد الاروبي كمان مثلا.
معظم الدول والزعماء اللي في بينهم وبين امريكا عداء وعدم انسجام ومعارضه واختلافات كانوا بالضربه الاولى من التسريبات وكلها في من وراها ان ومن وعن ولان وكأن.
فينزويلا رساله للمعارضه اللي امريكا بتشجعها قالتلوهم انو الرئيس السابق شافيز مشبوه وفاسد والحالي من نفس حزبه والعيار يللا حضر حالك على الباي باي .
فرنسا واللعب على المكشوف تصوروا هولند مبسوط المرتشي من ال سعود والاخ فرحان باسترجاع ضريبي وضرب اليمن الفرنسي بكل اطيافه من مارين لوبين لساركوزي دعايه انتخابه وتحضيرللجوله القادمه لصالحه لانو حبيب الامريكان وماشي مع توجهاتهم عدل.
شو بدكم بالطويله امريكا وبس والعالم الباقي كله خس.
يا جماعه شخصيا قاعد بخرا على حالي من الخوف اذا فضحوني وكشفوا كل اموالي المهربه بالخارج وممتلكاتي في اروبا وامريكا اللاتينيه غير البيت اللي انا قاعد فيه بالاجار في القدس.
المسخم اول زعيم طارمن هالتسريبات هو رئيس وزراء ايسلندا.يللا مهي جزيره عدد سكانها بطلعوش اكتر من 400 الف مواطن ومع هيك الاخ لاهط ملاين.اوعدنا يا رب قبل تسليم الهويه اتصور شي سلفي جنب المليون حتى لو كان مليون دينار عراقي لانو انا زلمي بحب اخوتي العراقين كتير ودينارهم حوالي كتير اصفار.
|
|
التعليق والتصويت على الموضوع في الموقع الرئيسي
التعليقات
1 - زوبعة في فنجان
nasha
(
2016 / 4 / 6 - 13:58
)
الأخ جان المحترم
مجرد فرقة إعلامية مثل الويكيليكس وصدقني راح تطلع كلها فاشوش .
تتذكر ال 73 بليون دولار تبع حسني مبارك وبليونات القذافي وبن علي؟ وينها؟
ممكن يكون شوية تهرب ضريبي لكن تهريب أموال بالبليونات فلا تعقل وغير منطقية بالمرة.
انا بدي أفهم اللي يهرب بليون دولار شو بدو يعمل فيها؟
معظم الناس لا يدركون ما معنى الرقم بليون انه رقم خرافي .
تحياتي
2 - تحياات
قاسم حسن محاجنة
(
2016 / 4 / 6 - 14:14
)
يعطيك العافية
من إسرائيل مذكور 600 اسم
مدير دائرة ضريبة الدخل بقدر العدد اكثر من هيك
المهم قال حضرة المدير انه صارلهم يومين وهمي يتلقو -اعترافات- من متهربين من الضرايب ..
بااااي
3 - الاستاذ ناشا المحترم
جان نصار
(
2016 / 4 / 6 - 14:30
)
شوف عزيزي اكيد في شوية حقائق بس الارقام اللي زي ما حضرتك ذكرت الفلكيه اشي مش معقول وبعدين صارلهم اربعين سنه بجمعوا بالاخبا والارقام تجهزت الطبخه اليوم.الملك السعودي عنده بنك وبنوك امريكا وسويسرا على حسابه بدهاش كل هالدوخه لتروح المصاري على بنما وبعدين تترجع على بنوك سويسريه مثلا.
سيدي منتسلى والطفرانين اللي زي حالتنا منعد ومنحسب من فضاوة البل وبتوصلنا الملاين والمليارات تيمم
تحياتي يا ورده.
4 - عزيزي قاسم المحترم
جان نصار
(
2016 / 4 / 6 - 14:37
)
انا بدي اسماء تسقط حكومي مش اسماء فراطه.
هاي اللي كنت خايف منو طلعلي يا خوف قلبي يكون اسمي نازل بين هال 600 اسم وتلاحقني الضرايب.
يا خوي يا قاسم بطل في امان. احسن شي اخبي مصرياتي بالمخده او تحت البلاطه بش خايف من الفيران .شو رايك احولهم سبائك ذهب ليش ليلى الحمرا مرت الرئيس التونسي الهارب بن علي محملتش السبائك على طيارة الهيليكوبتر شو هي احسن مني بأيش
تحياتي مع ملياراتي
5 - مثل شغلة النفط العراقي
سمير
(
2016 / 4 / 6 - 14:49
)
كيفك عمي جان, امريكا ضلت تقول انو نظام صدام كان يهرب النفط ابو ال 10% عمولات, بس ما شفت حد قال لمين كان ينباع النفط؟ يعني صحيح ان النفط ما مكتوب عليه( ميد ان اراك) بس الناس تعرف انو نفط خفيف ويرهم للمصافي الامريكية, انه ما اتهم امريكا حاشا. العم سام عدم صدام وره 30 سنة على حادث ما اعترض عليه وقتها , جماعة موالية لايران اطلقت النار على صدام . عدنه مثل بالعراق يقول انو اليهودي لما يفلس يطلع دفاترو القديمة, يعني يا خلجان ويا عالم النايم , , اذا نظرت نيوب الليث بارزة فلا تضنن ان الليث يبتسم! خاطرك وكل بنما وانت بخير
6 - الاستاذ سمير المحترم
جان نصار
(
2016 / 4 / 6 - 15:13
)
لسه يا خوي سمير بقولك ما خفي اعظم وفي هوايا شغلات مخبايه وعندنا بقولوا اللي بيحضر السوق بسوق
المهم يا عزيزي انو مكانتي ومكانتك ومكانة اصدقائنا الا جاويد ما تنهز وخصوصا امبرطورياتنا الماليه
خوش وللامانه انا ما كنت من مريدي صدام بس الزلمي راح فيها على تهمة مخالفة سير اللي هي اسلحة دمار شامل والاخ ما كان عندوه من هالاسلحه منوب.
طول عمري وانا بقول الامريكان بفصلوا واحنا منلبس
تحياتي وهلا بالغالي
7 - عزيزي جان: سأقول لك ليش الأمريكان ما فيش
أفنان القاسم
(
2016 / 4 / 6 - 16:18
)
أولاً لأن كشف الأوراق سيستمر حتى 17 نيسان/أبريل، فلننتظر القادم، وعلى أي حال إلى حد الآن هناك عشرات الأسماء الأمريكية (اللي مش مهمة)... ثانيًا هناك عقد شفافية مبرم بين الحكومتين الأمريكية والبنمية، وأهم الأهم يا صاحب الكلمات الظريفة متل: شو بدكم بالطويله أمريكا وبس والعالم الباقي كله خس! أصحاب الثروات الأمريكية الكبيرة تفضل ثلاثة أماكن كبيرة بمستواها: سويسرا ولوكسمبورغ وجزر قايين...
8 - تحية طيبة
عبد الرضا حمد جاسم
(
2016 / 4 / 6 - 17:55
)
http://ar.rt.com/hj74
9 - عزيزي الاستاذ افنان القاسم المحترم
جان نصار
(
2016 / 4 / 6 - 17:56
)
شعور داخلي وتليباتي توارد خواطر انبئتني انو على هذا المقل تحديد ستعلق ليش بعرفش.يمكن لاني امبارح قرأت مقالك عن النظام العالمي وكالعادي حبيبك كتار مش مخليلنا ولا حبة لايك واعجبني تفلت منك صحتين يا عمي ناس بتوكل جاج وناس بتوقع بالسياج.
اشمعنى 17 نيسان شو في هاي نبؤة نوستروداموس بتقول انو راح تولع والا نهاية العالم.طب كل هاي الاحداث والتسريبات راح تأثر علينا شي والا احنا بالسيف سيد وفخار يكسر بعضه.
اسعدني حضورك واتابع ما تكتب
تحياتي يا خوي يا افنان هلا عيني
10 - الغالي عبد الرضا حمد جاسم المحترم
جان نصار
(
2016 / 4 / 6 - 18:09
)
بصراحه غيابك الطويل اقلقني ولكني كنت اطمئن على مدخلاتك هنا وهناك والاهم اعادة نشر تحية الحزب الشيوعي العراقي.
اكيد محتفظ بحقك الصمت وعسى ان تكون بخير والباقي ولا يهمك؟
يا عمي واضحه بوتين والصين مقصودين مش لوجه الله تعالى ذكروا بالتسريبات.
لكن بوتين هاد فولاذ صعب كسره على الاقل حاليا وحايب ضيقة النفس لامريكا وصار لاعب اساسي وند لامريكا ورجعت ايام زمان
سياسة القطب الواحد حرق دمها اوباما وبوتين بقول نحن هنا
تحياتي يا غالي
.. مرضي الخَمعلي: سباقات الهجن تدعم السياحة الثقافية سواء بشكل
.. ما حقيقة اعتماد اللغة العربية في السنغال كلغة رسمية؟ ترندينغ
.. عدت سنة على رحيله.. -مصطفى درويش- الفنان ابن البلد الجدع
.. فدوى مواهب: المخرجة المصرية المعتزلة تثير الجدل بدرس عن الشي
.. الأسطى عزيز عجينة المخرج العبقري????
