الحوار المتمدن - موبايل
الموقع الرئيسي


في متابعه لمسلسل المصالحه الفلسطينيه يا ترى

جان نصار

2016 / 4 / 21
كتابات ساخرة


مش عارف يا جماعه كيف بعده مسلسل المصالحه الفلسطينيه بين فتح وحماس مستمر للسنه التاسعه رغم عزوف الفلسطنين انفسهم عن متابعة احداثه الممله والمكرره واللي بلا طعمه.
كل يوم والتاني بطلعلنا شي مسؤول مش مهم فتحوي او حمساوي وبقولنا انهم راح يجتمعوا وقربت تفرج,, وشد يا خويا شد قربت الرمله على اللد.
لاء والجماعه قابضينها جد ومفكرين انها مطلب جماهيري فلسطيني. قال يعني اذا اتفقوا راح تنحل القضيه وتقام الدوله العتيده.
على بال مين يللي بترقصوا بالعتمه.
اليوم قال مسؤول فتحاوي بدوش يذكر اسمه وكانه هلئد مهم اسمه والناس سأله, بصرح انو الرئيس عباس راح يلتقي مع خالد مشعل من حماس بالدوحه... يا حلالي يا حلالي.
اللي انا مش فاهموا ليش لازم دايما شي دوله عربيه او حتى اجنبيه تسعى للمصالحه وبوس اللحي بين هدول الفصيلين اللي همي ومصالحتهم واحد لانها لا راح تقدم ولاتأخر.
يوم مصالحه برعايه مصريه ويوم سعوديه ويوم قطريه ويوم ويوم وهات حيكها وفد رايح ووفد جاي من الطرفين وبقولك بعد في شوية عقبات ومسائل راح تنحل والجماعه يصتلحوا.
اذا حابين تعرفوا اي عاصمه عربيه في عالمنا العربي فيها خدمة الاوتيلات يعني الفنادق هي الافضل فأسلوا خبراء ووفود المصالحه الفتحو حمساويه هم خير من يجيب لانهم مخلوش ولا فندق 5 نجوم في عواصم الوطن العربي والدول الاجنبيه الا وجربوه .
اليوم اللي بنافسهم على ذلك وفود النظام السوري والمعارضه.
ليش لازم حد يصلحنا وشو دخلو.اكيد مشان دفع فواتير الاقامه بالاوتيلات وشوية دعم مالي لمعشات التنابل من قبل الفصياين مع حبة املاءات وتوصيات ونصائح.
اذا كان الخلاف بين الاخوه فتح وحماس صارلوا 9 سنوات تعى ولا تيجي وقبلها ذبحوا بعض واللي انقتل واللي انسحل وانقسمت غزه عن الضفه وهناك حماس وهون فتح ومش متفقين ولا راضين يجبوها البر وكل محاولات الاصلاح فارطه وما راح تنجح,,, لعاد لليش زعلانين على اسرائيل بدهاش تصتلح معاكوا.
اذا الفلسطينيه مع بعض وهمي اخوه مختلفين ومش متفقين كيف يا عمي بدكم تصتلحوا مع العدو واللي في بيناتكم تارات وتتفقوا انتو وياهم.
قربت العشر سنوات الخلاف الفتحو حمساويي اذن شو الغريب بالخلاف الاسرائيلي الفلسطيني بعده شي 70 سنه وشويه بس.
نفسي اشوف شجاعة القياده الفلسطينيه ان كانت فتحويه او حمساويه او جبهويه او جهاديه اوبدون هويه تعترف على الملئ وتقول للشعب الفلسطيني يا جماعه احنا مش طالع بايدنا نعمل اشي .
احنا مجموعه من الفاشلين المرتزقه الفاسدين والمرتشين وتحملتونا وتحملتوا قرفنا طوال عقود واحنا نضربكم بمخدرات الشعارات والمزاودات اننا راح نحل ونربط بهالقضيه وعبس,.
مكانك يا ريت راوح لا بل رجعنا لورا وراحت البلد. حتى شعار انقاذ ما يمكن انقاذه مش قادرين انفذه,, لهيك احنا مندعوا لانتخابات حره ونزيه بعيدا عن شراء الاصوات والزمم تمتاز بالشفافيه لتختاروا ممثلينكم الحقيقين اللي بالفعل جادين لحل القضيه باقل الخسائر,, هاد اذا في بعد شي نساوم عليه.
نوعدكم ان الانتخابات ما راح تفرز غيرنا فتح وحماس وبقية الشله طبعا بنسب متفاوته من هون احنا مستمد شجاعتنا ومنقولكم انو ولا الله راح يخلصكم منا.
بيان الى الشعب الفلسطيني:
لا تستنوا ولا تنتظروا اي مدد لا من القمم والمؤتمرات العربيه لاننا مش فاضينلكم عنا قضايا مثل قضاياكم واحدث, ففي القضيه السوريه والقضيه العراقيه والقضيه اليمنيه والقضيه الليبيه واللبنانيه ومن هون ليخلص كاتب هالمقال عد بالقضايا راح تطلع قضايا جديده لتقولوا بس.
كمان لا تنتظروا ولا تستنوا اشي من مؤتمرات القمم الاسلاميه لانو موضوع السنه والشيعه وايران مستحوذ على كل طاقاتنا.
السعوديه زعيمة العالم السني مشغوله بكتير قضايا وعندها كتير ملفات وبخصوص القضيه الفلسطينيه فهيي مش ناسيتكم لدرجة انها تقيم علاقات مع اسرائيل سريه وعلنيه وكله مشان عدو عدوي صديقي اللي هي ايران .
اذا بدكم اي اشي او مصلحه خفيفي من اسرائيل والاخ نتينياهو فلا يهمكم السعودين راح يتواسطوا و يحلوها للمشاكل الصغيره,, مش حل القضيه نفسها.يعني فلوس معاملات في.اي.بي وتصاريح وترخية الحبل مش اكتر.
المجتمع الدولي كمان مش فاضي ومن الاخر ماراح يضغط على اسرائيل.. شوية مقاطعه للبضائع هون وهناك بمشي الحال ثم اروبا طلعلها مشاكل الهجره والاقتصاد والوحده ويادوب يحلوا مشاكلهم.
امريكا وروسيا مشغولين بمشاكلهم وداعش ويناطحوا بعض ,والانتخابات الامريكيه على الابواب وسوري وي ار بيزي.
من الاخر يا فلسطينيه هلئ حل القضيه مش وارد خلوها بالفريزير, فش حد ممكن يضغط على اسرائيل.
الدول العربيه يادوب تتحل مشاكلها فحلوا المشاكل الحياتيه اليوميه هاد اذا لاقيتولها حلول, مثل قضية معاشات المعلمين.قضية الضمان الاجتماعي .قضية حرية الاعلام.قضية الغلاء بشكل عام فواتير الكهرباء والماء والهواء والجوال والانترنت وقارعوا اذلال جنود الاحتلال على الحواجز وطبعا مشاكلكم العائليه . تنسوش اتابعوا المسلسلات التركيه ووين وصلت مشاكل احلام والعرب عايدول.
يرونها بعيده لكنني اقول انها قريبه واستوا فرج الله.





التعليق والتصويت على الموضوع في الموقع الرئيسي


التعليقات

1 - فاقد الشيئ لا يعطيه
nasha ( 2016 / 4 / 21 - 13:17 )
الأستاذ جان نصار المحترم
سؤال: هي فلسطين في أي زمن كانت دولة مستقلة؟
الثقافة العربية الإسلامية ثقافة عشائرية قبلية عرفية لا تدعم فكرة الدولة الوطنية وفكرة الديمقراطية بعيدة كل البعد عن هذه الثقافة ولذلك يستحيل أن تتكتل دولة من مجموعات قبلية تحت حكومة واحدة إلا بالقوة الجبرية وبواسطة قائد شمولي عسكري قوي.
المصالحة بين فتح وحماس مستحيلة لأن الأساس الفكري متناقض . انها ممكنة الحدوث بالقوة فقط. ولكن حتى استعمال القوة غير ممكن بسبب البعد الجغرافي بين الفصيلين.
المسألة واقعيا صعبة ولا يمكن أن تتم بتبويس اللحى.
تحياتي

2 - طالع لك يا عدوَّي طالع
شيخ صفوك ( 2016 / 4 / 21 - 13:36 )
ِمن وراء الميكروفونات والشاشات و المؤتمرات
ِوالمرسدسات و الهمرات و البورشات
ِوالفيلات و الشاليهات و البلاجات
وانتم يالنسوان حبيباتِ
طالعلكم
ِمن تحت القريولات و التختات و البطانيات
ِما تكفيني لا واحدة و لا ثنتين و لا تلاثات الاَّ اربعات
اعطني كلاشنكوفي و مخزن فياكرا و شوف بطولاتِ
شو مالك يا شعب ما عرفتني انا هو نفسه من زماناتِ
اخي جان هذا الشعرالمخربط كتبته و انا تحت تاثير الكحول بعيد عنك
فحياتي هو الخمر والخمر هو حياتي

3 - اتفق العرب على ان لايتفقوا
سمير ( 2016 / 4 / 21 - 13:58 )
كيفك عمي جان, شو صحيح انك اشتريت جزيرة في الكاريبي؟ من شان اجيب المرة والاولاد نبقه عدكم كم يوم. خويه هو مشكلة السقيفة لي هسه ما انحلت تريد مشكلة فتح وحماس تنحل؟ احنه ما عدنه حل وسط, يا حرب يا وحدة, كلما يتفق بلدين عربيين على مشروع وحدة نكول الله يستر! ثاني يوم يكولون اكتشفته مؤامرة خبيثة وتبدأ المعارك بالنعال الابيض. الحل برأيي المتواضع هو (اهل الكهف) العرب ينامو كم قرن ويرتاحو ويريحو. يعجبني انو الخلجان وايران صايرين يصالحون العرب, يداوي باللتي كانت هي الداء, السعودية تشن حرب عاليمن ,والكويت شريكتهه بمجلس التعاون تصالح اليمنيين! احترامي مولانه

4 - الاستاذ ناشا المحترم
جان نصار ( 2016 / 4 / 21 - 14:10 )
يا عزيزي والله عارف انهم مش راح يتصالحوا بس صرعوا سمانا وكل يوم خبر عن المصالحه
شوف من ناحية كان في دولة فلسطين بمفهوم الدوله الحديثه لاء كان في شعب فلسطيني والمنطقه كانت تسمى فلسطين وكان في بيوم من الايام امل في ال1948 لو وافقوا على قرار التقسيم يكون في دوله.
وبعد الانتفاضه في معاهدة اوسلو تحدثوا عن دوله فلسطيني بعد خمس سنوات.
يعني الناس حلمت واتأملت واتوهمت وتمنت ودعت وفكرت ورغبت وجمعت وطرحت وقسمت بعد ما ضربت يكون في دوله
المنطق بقول انو لازم شي حل يعني احتلال وسيطره على الفلسطينين من قبل اسرائيل لابد الابدين صعبه شوي.
من الاخر منقول عسى ولعل وربما مين بيعرف
تحياتي يا صديقي

5 - عزيزي شيخ صفوك المحترم
جان نصار ( 2016 / 4 / 21 - 14:21 )
والله وسلامات وتحيات وهات من عندك هات
مش غلط يكون في بيناتنا تفاهمات
في موضوع النسوان والمسكرات
المهم انك تحضر البطلات والوسكيات
وتنساش المكسرات الفستقات واللوزات
وحضر طاوله بكل انواع المزات
واليوم خمر وبكره كل انواع الخمرات
خلي بيناتنا مش بس كاس بل مجموعة كاسات
وكاسك خي صفوك بصحتك وصة كل اللي بحبوك
فكرك هل رأى الحب سكارى مثلنا
ايه اكيد اكيد

6 - الاستاذ سمير المحترم
جان نصار ( 2016 / 4 / 21 - 14:36 )
انا مليح كتير يا خوي يا سمير هات العائله كلها وتعالوا عندي على جزيرتي بالكاربي وراح نولعها هش ونش وشوي ولحوم ودواجن واسماك الصيد عنا شغال .يللى خلي الاولاد ينبسطوا.على فكره انا قصدي بسطه فلسطينيه يعني يتونسون مو بسطه عراقيه ينسون فيها اسمائهم ترى في فرق بين بسطه وبسطه ها.
اصلا انا مش مستني الحل الله لا يباركلهم للجوز حماس وفتح اللي بقول انو في فرق بيناتهم غلطان الفرق بش بالمزاوده وطرح الشعارات.
انا اصلا بكتب عن مجريات واحداث القضيه الفلسطينه كنوع من الكتابه ورفع العتب والرياضه لانه المقال اللي كتبته قبل 4 سنوات هو نفسه مقال اليوم بس غيرت التاريخ
تحياتي وهاي انا قاعد على الشط بستناك انت والفاميليا

اخر الافلام

.. حلقة خاصة مع المخرج الفلسطيني رشيد مشهراوي وأسرار وكواليس لأ

.. بعد أربع سنوات.. عودة مهرجان عنابة للفيلم المتوسطي بمشاركة 7



.. بدء التجهيز للدورة الـ 17 من مهرجان المسرح المصرى (دورة سميح

.. عرض يضم الفنون الأدائية في قطر من الرقص بالسيف إلى المسرح ال



.. #كريم_عبدالعزيز فظيع في التمثيل.. #دينا_الشربيني: نفسي أمثل