الحوار المتمدن - موبايل
الموقع الرئيسي


بيغ بن تدق ايضا لصادق خان ومليا

جان نصار

2016 / 5 / 9
كتابات ساخرة


يا جماعه هاد انتصار للديمقراطيه والعداله الاجتماعيه وانو الجميع في الغرب الكافر بالدوله العلمانيه لهم نفس الفرص.
الغرب كله بتحدث عن مهارات وذكاء ونجاح وتفوق البريطاني المسلم من اصل بكستاني اللي وصل الى احد ارفع المناصب الاجتماعيه السياسيه اي الفوز برئاسة بلدية لندن صادق خان والعالم الاسلامي مشغول بديانته اي اسلامه.
يا عمي هناك ما بتنحسب بهاي السخافه والعقليه انو ايش هادا او هديك دينهم ,, هناك محسوبه بتقيم الانسان وعلمه ومعرفته ووضع الشخص المناسب بالمكان المناسب.
يا ترى ليش هاد صادق خان نجح
يمكن لانه انسان عصامي درس واجتهد وتعلم وكان بدو يكون عنصر فاعل بالمجتمع. ويمكن لانه ما تقوقع وقعد يندب حظه كيف احنا يا هالمسلمين مهمشين وهمش حاله زي ملاين التنابل اللي بفضلوا يعيشوا على الضمان الاجتماعي والصحي. يمكن لانه كان طموحه اكبر من وسواسه انو البلد والانكليز تحديدا همي عنصرين وبكرهوا الاسلام وعايشن بس على وهم الاسلاموفوبيا وحب يجرب حظه ولاقى انو بالفعل هاي البلد فيها عداله اجتماعيه ولا تفرق بالاديان بل بابداع وذكاء وعمل وخبرة الانسان.
يمكن البعض يقول انو الانكليز عندهم عنصريه وكراهيه للمسلمين والعرب والاجانب واحنا منقول ومين قال انو ما في عنصريه لكنها لم تستطع ان تتغلب على الديمقراطيه والعداله الاجتماعيه وما كانت فوق القانون ومساواة الحقوق للجميع بالفعل مش بالحكي والقول.
ليش دخلكم العرب والمسلمين هم ملائكه ما في عندهم عنصريه ولا كراهيه.
هاي يا اخوان المسلم بقتل اخوه المسلم في كل بلاد المسلمين من سوريا الى العراق الى ليبيا الى اليمن الى مصر وبقية الدول العربيه.وبدناش نحكي عن قتل المسلم للاخر المختلف في سوريا والعراق و و و. لسه لو واقفت على الكراهيه والعنصريه احنا منكون بالف خير.
يعني بنفس الباكستان ما في قتل الاخ لاخوه الانسان القتل والتفجيرات والارهاب مهو هناك لابو موزه .
اما اللي انا مش فاهمه ليش الكل هلل لفوز صادق خان وما ذكرت بنفس التهليل والقبول والتغطيه الاعلاميه ل مليا بو عطيه المسلمه الجزائرية الاصل المواطنه الانكليزيه اللي فازت برئاسة الاتحاد العام لطلبة الجامعات في بريطانيا وهاد منصب كبير ومهم واعداد الطلاب بالملاين.
يا جماعه حتى التغطيه الاعلاميه بتفرق اذا كانت لمرا او زلمي. منقدريش الدكتور موصينا نهتم بالرجال اكثر من النسوان واكيد مش من خلفية المجتمع الذكوري او خلفيه دينيه لاسمح الله.
تخيلوا لو هاد البكستاني او ابوه كانوا بالسعوديه او قطر او او ,صدقوني لو قعدوا 400 سنه مش راح يتمكنوا من الحصول على غير قوت يومهم ويا دوب يحوشوا اكم قرش للمستقبل هاد اذا قدروا يحوشوا ويدخروا.
القنوات الفضائيه مثل الجزيره تبعت قطر والعربيه تبعت السعوديه اتحفونا بتحليلات وتصورات اشي غريب عجيب .منها كان في تحليل انو صادق عميل للغرب ومنها كان في تحليل انو تأثير المسلمين واول الغيث قطره وقربت على رئاسة الوزراء واحتلال قصر بكنغهام وبريطانيا كلها عضة كوساي وتصبح جمهورية بريطانيا الاسلاميه قبل ما تتحول فرنسا كمان الى بلد اغلبها اسلامي وحكمها بالشريعه.
يعني من الاخر في ناس عندها احلام يقظه وفي ناس بالفعل هيك بتفكر.
الباكستاني والعربي المسلم اول ما بوصول على السعوديه بدو كفيل ويادوب اعلى منصب يكون استشاري بالمصاري بكون شاري.
اما قطر اللي من على منبرها الجزيره بفسخوا بنياعهم فالاجنبي والمسلم يعامل معاملة العبيد ويصادر جواز سفره وهناك شي مليون بتمنوا بس يخلصوا من العبوديه ويعودوا الى اوطانهم احياء مش بتوابيت وعظمالله اجركم بقولوا لاهله.
يعني المقارنه بين السعوديه وقطر وغيراتهم مع الغرب الكافر اكيد اللي بكسب فيها وبجيب اعلى العلامات قطر واختها السعوديه.
الامارات يا اخوان مش كتير احسن اسألوا الهنود والبكستانين والافارقه وحتى العرب.
صادق خان راح يكون رئيس بلديه لكل المواطنين وهاي بالامس شارك هاد العميل المرتد الجاليه اليهوديه بذكرى الهولوكوست الله لا ويطرزلوه.
من الاخر انتصار المسلم على اليهودي بمشاركة الناخبين الانكليز بكل اطيافهم المسيحين واليهود والسيخ والبهائين واللادينين هاد بسموه الامميه وانتصار الانسانيه على كل القيم ومن ضمنها الدينيه.
افهموها ساعة بيغ بن اللنديه بتدق اجرسها لكل مواطنيها بدون استثناء يعني فش خيار وبندره ,, وهناك الخيار للافضل وفي اوطاننا الخيار بس بالسلطه.





التعليق والتصويت على الموضوع في الموقع الرئيسي


التعليقات

1 - العزيز جان نصار الورد
عبد الرضا حمد جاسم ( 2016 / 5 / 9 - 19:37 )
تحية طيبة
الفرق كا الفرق بين
خان بالباكستاني الي ما اعرف معناها
و خان بالعربي
و خان باللهجة العراقية
اكرر التحية

2 - الغالي عبد الرضا حمد جاسم المحترم
جان نصار ( 2016 / 5 / 9 - 19:51 )
خان بالعربي القديم او الفصحه مضافه او فندق او مكان للمبيت على شكل البانسيون اليوم
اما خان اللي اعرفها هي بيت الدعاره او الماخور
المهم اننا نؤمن بالتعدديه والامميه والانسانيه والدين هاي شغلات شخصيه ولو انو في بلادنا يسيس ويومذهب
لا انكر اني انتقد سلبيات الاديان لكن ليس لي مأخذ على المتدينين فقط اذا اراد احد ان يأخذ روحي فاسمح لي بالصراخ على الاقل
انا واياك في السيف سيد الانسانيه اولا وثانيا وعاشرا
اهلا بيك يا خويا يا عبد الرضا
تحياتي وابتساماتي

3 - الأخبار العربية
شيخ صفوك ( 2016 / 5 / 9 - 22:49 )
اخي جان انصحك ان لا تسمع الأخبار من القنوات العربية لانها بتجيب الأجل بسرعة و تودي الي سوفان في عظم الترقوة و انفصام في الشخصية المهلهلة أصلاً ويصبح الشخص يمشي و يتحدث مع خشمه وكذلك تودي الي رجفة في العمود الغير فقري وارتجاج في اللغلوغ الأيسر من الجهة اليمني وتحياتي يا اخي الوردة

4 - لماذا هذا الانحياز؟
سمير ( 2016 / 5 / 10 - 02:11 )
يعني سيد جان, ليش ما تذكر الخبر اللي تناقلتو وكالات الانباء اليوم من انو مسيحي صار رئيس بلدية مكة! شنو ما تصدك ؟ بس اتمنى لو انو اخواننا لما يذكروا الغرب يشيلو اللاحقة(الكافر) من وراها, والاّعليهم ان لا يستعملوا الحبوب الزرقاء التي ينتجها (الكافر) يلله اروح ارتب المزة اهو دقت ساعة الثوري. احترامي

5 - الاستاذ سمير المحترم
جان نصار ( 2016 / 5 / 10 - 07:03 )
يا اخي حتى زوجتي الاجنبيه اللي بتحكي عربي مكسر صارت على الطالعه والنازلي تقولي احنا الكفار ورايحه عند الكفار شخصيا هاي المفرده التصقت بعقلي وصارت مفرده طبيعيه ولا احرج وكذلك صارت هويه تعريف
الاسم جان نصار الكافر .صار عندي قلق يا ترى اكيد راح اروح النار فش بارقة امل تزبط معي وادخل بس لاكم يوم على الجنه
الحبوب الزرقاء مع الجوني وكر هاي نعم انعمنا بها مش يمشي الحال والا .....
تحياتي وابتساماتي

6 - عزيزي شيخ صفوك المحترم
جان نصار ( 2016 / 5 / 10 - 09:50 )
ا عيني شكرا على النصيحه اصلا ان ما بشوف قنوات عربيه غير اللي بتهتم وبتجيب اخبار الرفيقه احلام صاحبة الجمال الطبيعي
هاد مجرد تنويع مصادر يا اخي حتى المصادر الاجنبيه مش كتير احسن انا بكتب موضيعي لانو صار عندي خرف وقرف ومجرد التدريب على الكتابه واشوف اذا عقلي بعد بودي وبجيب وافضل من ما اتفشش بالمرا.
كل الامراض اللي ذكرتها وزياده عندي كولكشن بياخد العقل من الامراض لكل المناسبات والفصول
صباحك قشطه على توقيت بيغ بن الخلجيه
تحياتي ومودتي

7 - تعليق من الاستاذ ناشا المحترم
جان نصار ( 2016 / 5 / 10 - 10:15 )
الاخ جان نصار
Tuesday, May 10, 2016 - nasha

دول العالم الاسلامي تُحف عالمية وقصص نجاح منقطعة النظير.
انا بدي افهم شو دخل السعودية وايران وتركيا بالفلسطينيين واليهود!!!!
شو جاب ام الفارسي الايراني او ام السعودي البدوي او العصمنلي على المشكلة بين الناس.
افتهمنا اميركا هي قائدة الحضارة البشرية ولها فضل على العالم بمنجزاتها العلمية والتكنولوجية ويمكن اعطائها الحق في الدفاع عن انجازاتها الحضارية والتدخل في الشؤون السياسية العالمية .
لكن شو دخل ايران والسعودية وتركيا في الموضوع ؟؟؟؟؟؟؟
مهما قلت يا عمي جان عن العرب والسعودية بس يبقى العرب بصورة عامة اقل عنصرية وفاشية بما لا يقاس من الفرس والاتراك.
اللي علّم العرب العنصرية والفاشية هم الفرس والاتراك,
بالنسبة لي ابتدأت اقتنع ان من اخترع الاسلام اصلا هم الفرس وليس العرب.
وما قصة محمد والاسلام الاّ قصة فارسية الصقت بالعرب زوراً لاستغلالهم والسيطرة عليهم ولذلك القيادة منذالعصر العباسي كانت بيد الشعوب المجاورة من فرس وعثمانيين وغيرهم من سكان اواسط اسيا.
تحياتي
ه

8 - الاستاذ ناشا المحترم
جان نصار ( 2016 / 5 / 10 - 10:29 )
اعتذر لكني من خلال الايميل وجدت انو تعليقك سمح له بالنشر ولم ينشر لذا اضطريت اعمل اعادة نسخ ونشرته.
بالفعل تركيا وايران شو دخلهم بفلسطين وبالعرب لكن على ما يظهران الحنين الى امجاد الدوله الفارسيه والدوله العثمانيه لازال يدغدغ مشاعر الاتراك والايرانين.
يعني داخلين من منطلق ديني اللي بفتح اتخن ابواب مغلقه ,,وشعوبنا عاطفيه ومشاعرها فياضه كلمه بتوخدها وكلمه بتجيبها وبصورلنا البعبع الامبريالي والغرب الكافر انو لطيلنا على الابواب وبدو يفترسنا لهيك وحدة الدين هي المحرك الاساسي.
فلسطين طول عمرها شماعه الكل رافع شعارها مشان تغيب الشعوب عن مصايبها الداخليه انو في قضيه اهم ,, بدك تقول قميص عثمان ,اللعب بهاي الورقه بعده الو تأثير
بعدين على مين بدهم يتشاطروا الايرانين والاتراك غير العرب
تحياتي ومودتي

اخر الافلام

.. ما حقيقة اعتماد اللغة العربية في السنغال كلغة رسمية؟ ترندينغ

.. عدت سنة على رحيله.. -مصطفى درويش- الفنان ابن البلد الجدع




.. فدوى مواهب: المخرجة المصرية المعتزلة تثير الجدل بدرس عن الشي

.. الأسطى عزيز عجينة المخرج العبقري????




.. الفنانة الجميلة رانيا يوسف في لقاء حصري مع #ON_Set وأسرار لأ