الحوار المتمدن - موبايل
الموقع الرئيسي


المجموعتان العربيه والاسلاميه تطلبان اجتماعا طايرا

جان نصار

2016 / 5 / 21
كتابات ساخرة


يا جماعة بدكم ما تواخذونا هو الاجتماع اللي كان مطلوب طارئا بس انا كتبت خصوصي طائرا لانو بالفعل هدول المجموعتين عقولهم طايره.
الاجتماع الطارئ كان بدهم اياه جماعتنا العرب والمسلمين والفلسطينين جماعتي باسم مندوبنا بالامم المتحده على السريع مع ابو عيون ناعسه بوكي مون الشهير ب بان كيك مون. مشان يحتجوا ويشجبوا ويدينوا ويرفضوا ويمنعوا نشر تلات ملصقات قامت الدوله العبريه هاي اللي اسمها اسرائيل بعرضهم في المعرض الاسرائيلي واللي بخالفوا مبادئ قرارات وسياسة الامم المتحده وخصوصا الملصق اللي فيه صورة الحرم الشريف وكتابوا عليه العاصمه الروحيه والفعليه للشعب اليهودي.
والله والله يا بنو اسرائيل لنعملكم طعم للسمك لهون وصلت معاكوا الوقاحه والاستهتار والتحدي والاستفزاز صورة الحرم الشريف ينكتب عليها هاد الحكي وين الملاين, الشعب العربي وين والدم العربي وين وين وين وين الملاين(ممكن موسيقى اذا سمحتوا).
يا جماعه صدقوني مش عارف ابكي والا اضحك الطم واصوت واجمع كل الحاره علي ويقولوا الناس عني اني هسترت وانجنيت.
هدول الجماعه بذكروني بهداك الواحد اللي لاقى مرته بتخونه مع واحد غريب ومزعليش على اشي غير ليش هداك الزلمي اللي نازل رقع بمرته لابس بجامته.
هلئ الاحتلال كله مش سائلين عنه من 70 سنه وبطل حد يحكي عن القضيه ويجيب سيرتها, وكل الدول العربيه ليل مع نهار بطبع وبترقع وبستفقع وبطلتع مع اسرائيل.
السعوديه بتنسق مع اسرائيل ليل مع نهار في العلن والخفاء وعدو عدوي صديقي نكايه بايران.
والاردن في معاهده سلام وسفاره وكمان محادثات وتفاهمات. مصر السيسي تلفونه مبطلش يرن بتل ابيب وعند صديقه نتينياهو ودول الخليج كلها الها علاقات مع اسرائيل,, وتركيا وماليزيا واندونيسيا وغيرهم من دول العالم الاسلامي في تفاهمات ومحادثات ومفاوضات.
علقت على هدول الملصقات تركتوا الحمار وتشاطرتوا على البردعه.
طب هدول الملصقات هلئد مهمين اكثر من الاحتلال والاستيطان واعداد السجناء ورفض حل القضيه واخرها حتى مقترح فرنسي للسلام .
رفض كل الحلول اللي عرضت مشان السلام ان كانت عربيه او دوليه وحتى سعوديه (هاي اليوم بطلت دوله عربيه هاي دوله كبرى وعالميه) وطالبتوش اجتماع عاجل ولا طارئ.
الاحلى انو بان كي مون خبر الجماعه انو هو غايب ومش هون ورايح يحضر مؤتمر في تركيا اسمه القمه الانسانيه لانو الفلسطينين والمجموعه العربيه والاسلاميه هدول مش اهم من القمه الانسانيه .
القمه الانسانيه راح يناقشوا فيها كيف تصبح انسانا وما هي اسرع الطرق للانسنه وما هو اهم الانسان ام الحيوان .
طب يا ترى القضيه الفلسطينيه ومعاناة الفلسطينين هاي مش موضوع انساني والا خلص زهقتوا منو وشايفين انو ما في حل انساني لهالقضيه.
سؤالنا اليوم لو تركنا اسرائيل على جنب هدول المجموعه العربيه والاسلاميه دخلكم شايفين انو عند العرب والمسلمين كل القضايا محلوله ومفش اشي او قضيه مهمه في وطننا العربي والاسلامي تحتاج لاجتماع طارئ وهمنا الملصقات.
ليش مفيش اجتماع طارئ لحل الحرب اللي باشرت فيها السعوديه على اليمن من سنه واكثر شو مع جرائم ابادة اليمنين.شو مع الحرب السوريه والقتال في ليبيا وشو مع المشاكل في العراق ومشاكل اللاجئين السورين والعراقين ومن كل بلاد المسلمين وايش وليش ولويش وبقديش.
الامه العربيه والاسلاميه عندهم مليون وخمسميت الف مشكله ومضليش طلب لاجتماع طارئ غير ملصقات اسرائيل.
لنفرض مثلا انو صار في اجتماع من هالنوع شو راح يتمخض عنه وما هي انجازاته ونصره السياسي .
يعني بوكي مون راح يمنع تعليق الملصقات ويقول لاسرائيل عيب يا جماعه احترموا مشاعر العرب والمسلمين والفلسطينين وبلاش ولدني.
اي دخيل اللي خلئكم مفش اشي اهم من هاي الملصقات .
مش شايفين المصايب بالعالم العربي والاسلامي واللي صايب الفلسطينين غير هالملصقات.
اكيد في كتير شغلات اهم لاجتماع طارئ من ملصقات اسرائيل. مثل ان اسرائيل سرقت الملكيه الفكريه لاختراع الحمص والفلافل من الامه العربيه والاسلاميه او انها سرقت فكرة البوريكس من الاتراك والكسكس من المغاربه .هدول الشغلات بدهم اجتماع طارئ وعاجل واون ذا سبوت.
بيناتنا عن جد عن جد وشر البلية ما يضحك.
اي الوضع المأساوي في غزه بدو عشرين اجتماع طارئ من هيئة الامم .ملصقات قال.
القضيه الفلسطينيه ومصايب امتنا العربيه بدهم اجتماعات ليل مع نهار وطوال ايام السنه من هيئة الامم المتحده وشخصيا بقول انو لازم يكون في هيئة امم متحده بس للامه الاسلاميه والعربيه وصدقوني وعلى رقبتي ما راح اشي ينحل .
اهديكم اغنية انسى الدنيا وريح بالك اعزائي القراء.





التعليق والتصويت على الموضوع في الموقع الرئيسي


التعليقات

1 - مصيبة كبرى
سمير ( 2016 / 5 / 21 - 22:12 )
ذكرتني هاي الحالة بحالة مشابهة في ثلاثينات القرن العشرين, راحو رجال دين مسلمين, ويجوز فيهم مسيحيين كمان, على الحاكم الانكليزي لفلسطين , قالولو وهمه متعصبين يا جناب الحاكم, هذوله المهاجرين اليهود من اوروبا الشرقية, قالهم شبيهم؟ قلولو يا جناب الحاكم, هذولي شيوعيين واحنه خايفين انو الشيوعية تنتشر في البلاد! الله اكبر, يعني المهم عقيدة المغتصب وليس الاغتصاب ذاته. في قصة مشابهة لذاك صاحبنه اللي شاف مرتو... الرجال صار عصبي وقال للي.... يا ازعر, تاني مرة جيب محرمتك معاك! الله يخليك

2 - عزيزي سمير الورد
جان نصار ( 2016 / 5 / 22 - 08:53 )
يصبحك بالخير الان الساعه التاسعه صباحا بتوقيت بعرفيش مش غرينيش.
اسمحلي اغير بعنوان الرد من الاستاذ سمير المحترم لعزيزي سمير لانو صرنا اصحاب اظني طبعا اذا بزعلكش او منرجع للرسميات.
شايف يا خوي هذول فاضين اشغال على الاشياء المهمه مش سائلين وبالشكليات داقين
فمثلا الفلسطينين بعدهم لليوم بقدموا رجل لقدام ورجل لورا في موضوع التوجه لمحاكم لهاي مشان يقدموا شكوى وقبل اسبوعين قال لساتهم بدرسوا ومكملش معهم الحوار مشان يقدموا احتجاج لموضوع الاستيطان والجماعه راحت لبلاد والعباد ولساتهم على بتحبني لاء ما بتحبني بتحبني لاء ما بتحبني.اروح او ما اروح اروح او ما اروح ومن الاخر الشعب الفلسطيني ما عاد فيه الروح
تحياتي ومودتي

اخر الافلام

.. أبطال السرب يشاهدون الفيلم مع أسرهم بعد طرحه فى السينمات


.. تفاعلكم | أغاني وحوار مع الفنانة كنزة مرسلي




.. مرضي الخَمعلي: سباقات الهجن تدعم السياحة الثقافية سواء بشكل


.. ما حقيقة اعتماد اللغة العربية في السنغال كلغة رسمية؟ ترندينغ



.. عدت سنة على رحيله.. -مصطفى درويش- الفنان ابن البلد الجدع