الحوار المتمدن - موبايل
الموقع الرئيسي


المبادره الفرنسيه بارقة هبل مش امل

جان نصار

2016 / 6 / 5
كتابات ساخرة


جمعاتنا الفلسطينيه كالعاده بطوشوا على شبر مي وتوسموا بالمبادره الفرنسيه لحل القضيه الفلسطينيه انها راح تجيب نتيجه ولحلحة الحال , وقال الاخ صائب عريقات اللي انا مش عارف شو بالتحديد وظيفتوا .هو منسق هو كبير مفاوضين هو امين عام اللجنه التفيذيه هو متحدث هو لاعب تعزيز او احتياط هو وزير هو وكيل الرئيس والا نائبه ولا وريثوا الله وكيلكم الزلمي 7 صنايع بس البخت ضايع. قال الاخ شايف بارقة امل بهاي المبادره.
من عندي يا خوي انا شايفها بارقة هبل او سيبان وقمل او بناء قصور من الرمل ,, وبقولك خود الجمل بما حمل وتعطيناش ولا امل ,وخليك تمنى لانك من برج الحمل. شو كل المبادرات السابقه اللي اقترحوها كانوا همل وهاي الفرنسيه راح تنجز العمل وتعمل اللي ما انعمل.
اذا اليوم بقولك الاداره الامريكيه والست موغريني الاتحاد الاروبي والسيسي كمان بثقوش بكلام نتنياهو. واجى على البيعه ليبرمان وحكومة يمين راح ادوخ الفلسطينين زي مهمي متعودين. يعني بوخدوهم على البحر وبجعوا عطشانين.
قال المبادره العربيه 2002 فيها ايجابيات بس شويه تعديلات وتزبيطات وترقيعات , والاشيا راح تبقى معدن.
يعني الجولان انسوا ارجاعها.واللاجئين خليهم باماكنهم لاطين.والقدس موحده للاسرائيلين مش للفلسطينين وحدود السبعه والستين مش راجعين وموضوع المستوطنين تبادل اراضي والله بعين .
الجنرال السعودي المتقاعد انور عشقي بقول ان اذا قبلت اسرائيل المبادره العربيه بعد 50 سنه من التعديلات والنقاشات والمفوضات والشروحات راح انطبع تطبيع مطبع طبيعي مع اسرائيل واولهوم راح يكون الملك سلمان السعودي اذا مد الله بعمره هو ووريثه في العقود القادمه.
قال يعني هلئ مفيش تطبيع وترقيع وتطقيع وسمعونا تسميع .
ما علينا خلينا بالمبادره الفرنسيه اللي راح تحل القضيه بالضربه القاضيه خصوصا بعد قمة وزراء خارجيه العرب في الجامعه ىالعربيه اللي شارك فيها الرئيس عباس وشدد على اننا مرفض احنا نموت قلولهم راح نبقى. ورد عليه نبيل العربي وقال اسرائيل دوله فاشيه وعنصريه .معقول يا جماعه هالحكي اي والله عيب.
الاحلى والالذ انو في فرنسا راحوا المعازيم وما راحوش العريس والعروس والاهل من الطرفين يعني الاسرائيلين والفاسطينين غايبين. وكأنوا الفرنسين راح يفصلوا والاسرائيلين والفلسطينين راح يلبسوا على الجهاز.
نتيناهو بقولولو المبادره الفرنسيه بقلهم في نقاط ايجابيه بالمبادره العربيه.
يا عمي هاي مبادره جديده اسمها المبادره الفرنسيه صحصح معانا وجمع برجع برد وبقول:طيب انا بدي محادثات ومفاوضات ثنائيه بين هو وهي ومنرجع لدق الميه وراح تبقى ميه.
يا جماعه كل المبادرات السابقه من الامريكان والرباعيه وكامب ديفيد 1 و2 ومبادرات على كل سن وضرس لون ما حققت اشي اليوم الفرنسين راح يحلوها.اي همي يحلوا مشاكلهم يا دوب يحلوها.
من الاخر يا بكون في حل يفرض فرض وتنحل القضيه باجماع دولي واجبار الطرفين على القبول بحل عادل وكامل وشامل يا منبقى على فكرة دوخوني يا لموني وحبني اليوم وانساني بكره.
نتنياهو كلامه زي شباط ما في عليه رباط وكمل النقل بالزعرور وانضم ليبرمان واليوم التنين بغزلوا ناعم لكن الاقوال لا تنطبق مع الافعال.
ابو مازن موافقق على اي مباده حتى لو كانت مبادره من باب الحاره راح يقترحها ابو عصام المهم انو ىيكون في مبادرات.
وكالعاده عباس موافق والجبهه الشعبيه والديمقراطيه ويمكن الشيوعيه والنخب الاسلاميه من حماس وجروالنخب الشعبيه هدول كلهم رافضين ومتحفظين.
يمكن القارئ يقول طب يا عمي انت هاي سخريتك لوينتا بدها تبقى وشو الحل.
اول اشي لازم نعمله تغير كل الطاقم السياسي لكل الشعب الفلسطيني وخصوصا الفتحاوي والحمساوي ونقلهم كفاها الله خلينا نغير اللاعيبه وطريقة اللعب.
تاني اشي انتخابات شفافه لانتخاب لعيبه ىجدد.
تالت اشي تغلبوش حالكم هلئ بالتفكير رمضان جاي ورمضان كريم ومنشوف بعد عيد رمضان 2020 كيف الوضع وساعتها منقيم.
عزيزي القارئ عوده الى الرمانسيه اللي منفتقدها. اهديكم هاد الرابط لفنانه فلسطينيه من بلدي حيفا بجوز يتعدل المزاج ونشوف كيف اخرتها في حل او ما راح تنحل
https://www.youtube.com/watch?v=qqLtPbEmbJs
وهلوا عيني هلو ورده وكيفك انت.
بيناتنا الاغنيه افضل من المقال هاد رأي





التعليق والتصويت على الموضوع في الموقع الرئيسي


التعليقات

1 - رائعة
سمير ( 2016 / 6 / 5 - 17:44 )
عاشت ايدك يا صديقي العزيز على هالاغنية, انا دائما اقول لو انو الشعب الفلسطيني يركز عالفن الشعبي والحديث ومعارض للاعمال الشعبية وعروض الملابس الفلسطينية التراثية والاغذية وسير الشعراء والكتاب الفلسطينيين وتاريخ فلسطين والعمارة الفلسطينية والتعايش اللي كان سائد بين المسلمين والمسيحيين واليهود , راح تسوي شغل اكثر من الالعاب النارية اللي يدزوها الجماعة على الاعداء او التصاريح الرنانة والتي يتوعدون بها احفاد القردة والخنازير بالموت الزؤام! عمي قبل نصف قرن ضحكو علينا ب(ال) اضافوها للترجمة الفرنسية وعبرت على 19 دولة . شخصيا يعجبني لما المتحمسين يصرخو (حتى تحرير كافة الاراضي الفلسطينية). خليهم عايشين عالقضية الفلسطينية بدل ما يشوفولهم (قضية) اخرى يلعبو بيها على حد قول غوار. احترامي حبيبي

2 - عزيزي سمير الورد
جان نصار ( 2016 / 6 / 5 - 19:29 )
انا متذوق للفن والاغاني من ايام الدراسه يعني من زمن السفر برلك ومع الاسف حتى الفن حرمونا منو ودايما مأسي وويلات وحروب ونزاعات.
قررت ان ارسل رابط اغاني تعجبني في بعض مقالاتي.
مشكلة الفلسطينين
انهم طوال تاريخهم عاشوا ومازالهم عايشين على المزاوده وهاي جابتلهم ضيقة النفس .
فش زعيم فلسطيني تجراء على تقديم تنازلات مؤلمه خوفا من فلسطيني الشتات او حتى الداخل الكل جبان يوافق على حل .مش ممكن ارضاء الجميع لكن يمكن القبول بحل مقبول.لكن بالمقابل الاسرائلين عرفوا يلعبوا على الفلسطينين وراهنوا على المزادين من الفلسطينين ونجحوا
اليوم ما في حد من الدول العربيه بضغط على اسرائيل حتى السعوديه بطبع علاقاتها وكل دول الخليج ماشين على هادا الحال
لذلك احنا بالسيف سايد وكيفك انت ماللى انت
تحياتي وهالو

اخر الافلام

.. تفاعلكم | أغاني وحوار مع الفنانة كنزة مرسلي


.. مرضي الخَمعلي: سباقات الهجن تدعم السياحة الثقافية سواء بشكل




.. ما حقيقة اعتماد اللغة العربية في السنغال كلغة رسمية؟ ترندينغ

.. عدت سنة على رحيله.. -مصطفى درويش- الفنان ابن البلد الجدع




.. فدوى مواهب: المخرجة المصرية المعتزلة تثير الجدل بدرس عن الشي