الحوار المتمدن - موبايل
الموقع الرئيسي


وعند اسرائيل الخبر اليقين

جان نصار

2016 / 6 / 22
كتابات ساخرة


يعني موضوع الاحتلال والاستيطان اسرائيل ما بتنكره وفيما عدا ذلك اذا بدك الاخبار الصحيحه والمؤكده دايما خدها من الاعلام الاسرائيلي وخصوصا بكل ما يتعلق بالفلسطينين قيادة وشعبا وخفايا واخبار وما بين السطور وشو راح يصير وما يصير.
ليش؟
لانو اعلامنا مصفق ومهوي وبطوش على شبر مي ومش عارف وين الله حاطته ومعتمد على العاطفه اكثر من العقل والمهم عنا تفسيخ النياع والجعجعه والمثل اللي بقول خدوهم بالصوت.
قبل محادثات المصالحه الاخيره اللي هي محادثات المصالحه المئه بعد الالف بين فتح وحماس اعلنت الصحافه الاسرائيليه انو ما راح يطلع من وراها اشي وجماعتنا كانوا متاكدين انها راح تجيب نتيجه ونزلو فتح وحماس ردح لبعض وتخوين انتو واحنا وولعت بيناتهم كالعاده ورجعوا بخفي حنين.
شخصيا ومعي الملاين من الفلسطينين كنا متأكدين انها محادثات عبثيه زي المفاوضات العبثيه والمقاومه العبثيه والسياسه العبثيه والقرار الفلسطيني العبثي ويمكن للصبح اكتبلكم عن العبثيه .
صحافتنا واعلامنا والعارفين ببواطن الامور قالوا انو خالد مشعل مش راح ينتخب لقيادة حماس ورشحوا الزهار وابو مرزوق وهنيه اما الاعلام الاسرائيلي قال يحيي السنوار وهو سجين سابق افرج عنه بعد صفقة شليط.. والتزمت حماس الصمت واليوم هو المبين على الساحه وقال هو العدو الاول لاسرائيل ومتشدد وراح جماعة حماس يمشوا على العجين ما خربطوهوش.
وبقولك هو اللي راح يحررها.اسرائيل بتعرف اكثر من قيادة حماس نفسها مين زعيمهم القادم
مش عارف اكم عدو اول من حماس لاسرائيل الضيف والزهار وهنيه والجعبري ومشتهى و و و.
الكل اليوم بفتش على خليفه للرئيس ابو مازن والاسماء المقترحه كتيري بس الصحافه الاسرائيليه شادين على الجوكر محمد الدحلان وبقولك هو اللي راح يجيب السبع من ديلوه.
حماس تبحث عن ممولين وهاي هم بتوجهوا لايران والشيعه بعد ما السنه والسعوديه قطعوا الحبل فيهم.
وبقولك انو تركيا لحست شرط رفع الحصار عن غزه لانو مصالحها القوميه بتطلب التطقيع للفلسطينين والمسلمين ويوم الاحد راح يوقعوا اتفاقية التطقيع عفوا التطبيع. الضروريات تبيح البوظيات عفوا المحذورات.
اكدت وسائل الاعلام التركيه ان التطبيع بين انقره وتل ابيب سيجري قريبا وهادعلى لسان صحيفة حرييت.
كانت شروط تركيا ثلاث وهي الاعتذار العلني عن الاعتداء على سفينة مرمره ومقتل 9 اتراك والتعويض ورفع الحصارعن غزه.
شرط رفع الحصار طار والشرطين التانينين بمشوا مع الاخبار .
واسرائيل طالبت بتقليص وجود جماعة حماس للمنموم يعني الصفر ولهيك ايران يا حبيبتي اعدتي لي ميزانيتي.
طب سؤال هيك على الماشي احنا يا هالفلسطينيه لو صار عنادوله كيف يا ترى راح يكون شكل هالدوله على ارض الواقع
اعطوني بس شكل دوله عربيه معقوله قابله للحياه كمثال من عالمنا العربي مشان اللي خلقكم.
اي احنا بدون دوله مدبحين بعض وجماعتنا اشي لفه والجوق من اسفل لفوق فاسد ومرتشي ووصولي وانتهازي وانبطاحي وزئبقي.
بردون يعني قبل ما نبني الدوله يا ترى مش لازم نبني الانسان السوي والعاقل والمتزن والمتعلم والمتقبل للاخر,, والا الشغله سبهللي بس نازلين ليل مع نهار طخطخه وجعجعه بدنا دوله.
يا جماعه اسرائيل هي المسؤلي عن الكتير من المصايب اللي حالي علينا في عالمنا العربي والاسلامي والفلسطيني تحديدا ولهيك شخصيا بحملها المسؤوليه الكامله على كل مصيبه بتحصل ان كانت عامه اوشخصيه.
فمثلا الغلاء اللي كل سنه بستفحل برمضان وتجارنا برفعوا اسعار المواد التمونيه وبنهبونا وبشلحونا اوعينا سببه الاحتلال وصباحان الله انو بعد شهر رمضان الاسعار تعود الى قواعدها سالمه.
النهب والفساد والرشاوي عند حماس والسلطه كمان سببه اسرائيل .يا جماعه امبارح ولعت طوشي بيني وبين المرا على اساس انو الرز كان مخبص وناقصه ملح وادخلت بيناتنا قوات حخرس الحدود واكتشفنا انو ايدي اسرائيل الخفيه كانت وراء هاي الطوشي.
الحر والشوب ودرجات الحراره المرتفعه وتقلبات الطقس سببها اسرائيل واحتلالها.
داعش واخواتها همي افراز الاحتلال الاسرائيلي وكمان بصبوا بمصلحتها.
من الاخر انا فكري نشوف طريقه احنا والاربع دول اللي صوتوا لاسرائيل بانها تكون بلجنه من لجان الامم المتحده وعلى رأسنا السعوديه نشكل تحالف ونهجم على اسرائيل بليله مفش فيها ضو قمر ونخلص عليها..
يا جماعه هدول الجزيرتين تيران وعصافير والا صنافير ليش ما نعطيهم لاسرائيل ونفض الخلاف بين مصر والسعوديه وينعمل عليهم مشاريع سياحيه تعود بالفائده على الجميع وتكون شراكه بين مصر والسعوديه واسرائيل





التعليق والتصويت على الموضوع في الموقع الرئيسي


التعليقات

1 - لابد من عدو وهمي
سمير ( 2016 / 6 / 22 - 15:50 )
عزيزي جان, ليش هالحسد؟ اي لولا اسرائيل كان خير ما بسياسيي العرب يسرح بعربية بطاطا! احنه بالعراق قبل ما اميركا(تحرر) العراق كان خير ما بسياسيينا يا يبيع مسابح يا حمله دار يا سايس خيل. تتذكر مزرعة الحيوان لاورويل؟ اي لازم يكون هناك عدو وهمي نلقي براسو فشلنا. بعد التطبيع بين تركيا واسرائيل انا قررت ان ارجع لنشاطي القومي, بطلت اشرب العرق التركي ورجعت للعراقي, ولو نحن لها, وكاسك ياوطن. احترامي

2 - عزيزي سمير الورد
جان نصار ( 2016 / 6 / 22 - 16:17 )
شوف احنا العربان من غير عدو وهمي اي شماعه مشان نعلق عليها اخطائنا ما بمشي الحال
صار النا اكتر من مئة عام واحنا منحمل الاستعمار والامبرياليه والصهيونيه كل فشلنا واخفاقاتنا ومش عارف لامتى ممكن يستمر الوضع على هذا الحال.
التخلف والجهل والفقر والاميه والاستبداد والبطاله وصولا الى الارهاب اليوم سسببه هدول المسببات.وعلي الطلاق من مرتي ما راح نحيد عنهم.
يا صاحبي اذا كنت زعلان على تركيا والعرق التركي اشرب اوزو عرق يوناني وارقص على لحن زوربا ولا حدا حوش.
العرق حامي بالصيف لهيك اشرب وسكي مع ثلج او بيره وكاسك خي سمير
تحياتي ومودتي

3 - الجان جان الفنان
عبد الرضا حمد جاسم ( 2016 / 6 / 22 - 20:08 )
محبــــــــــــــــــــــــــــــــــــــــــــــــــــــــة و ســــــــــــــــــــــــــــــــــــــــــــــلام
تركيا العضيمة المساندة للسسسسسسسورة السورية التي قادها العجايا في درررررررعا...اول مرة في التاريخ الاطفال يقودون ثورة ...هي في سوريا و من وين من ...درعاااااا..القريبه من البلاط المتعفن الهاشمي...الذي يقود نصرةالقدس و حامي القددددددددس
يعني عبببد الللللله ياللي هله هللللله هو حامي العرش المحمدي.............(ليش ما تسمية المناضلة العبد الراضي..) حتى تفوخ الحكه. العجيب ما مرة تكلمت عن البيت الهاشمي المصدي. و لا على العلاك الهاشمي...اعرف السبب لانها كانت تناضل هناك...!!!!!!!!!
الدولتين لو ما يباركها سيدهم ابن الانكليزية الهاشمي المحمدي الذي يصوم رمضان 24 عله 24 ما تكون...
الاقتراح ان ابو خازن او كازن او سازن او مازن يصير و كيل البيت الهاشمي القذر راح يكون احسن رئيس بعد احسن عرص ملك
ام الاربعة و الاربعين و صاحبها الاردني راح يفرحوا ان تكون دولتكم حدودها البحر و ما تطلع من البحر
.............
تحياتي يالغالي

4 - الغالي عبد الرضا حمد جاسم المحترم
جان نصار ( 2016 / 6 / 22 - 20:42 )
ربنا بلانا بزعماء برفعوا الراس من عبدالله الى محمد السادس الى البشير الى ابن سلمان الى السيسي وال طرشان وال خريان ونهييان ومضطرطان والبقيه تأتي وفوق كل زعمائنا العرب اجانا زعيم تركيا اردوغان كادو ورقصني يا جدع على الوحده ونص.
شعوبنا المسكيني والضايعه والمغيبه بتغني حالي حالي حال مالي مالي مال
يا خوي عبد الرضا قال لا تشكيلي ببكيلك وشر البلية ما يضحك
بقولك المغرب وقفت ضربها لليمن وسحبت قواتها من التحالف ورجعوا على بلادهم خايفين من تجدد القتال على الصحراء الغربيه مع جماعة البوليسايرو
كل هاد وغيرها مشان تحرير فلسطين وهينا مستنى وناطرين وموعودين
تحياتي يا عبد الرضا الورد

اخر الافلام

.. تفاعلكم | أغاني وحوار مع الفنانة كنزة مرسلي


.. مرضي الخَمعلي: سباقات الهجن تدعم السياحة الثقافية سواء بشكل




.. ما حقيقة اعتماد اللغة العربية في السنغال كلغة رسمية؟ ترندينغ

.. عدت سنة على رحيله.. -مصطفى درويش- الفنان ابن البلد الجدع




.. فدوى مواهب: المخرجة المصرية المعتزلة تثير الجدل بدرس عن الشي