الحوار المتمدن - موبايل
الموقع الرئيسي


نصائح للسعاده الزوجيه لك يا ادم

جان نصار

2016 / 7 / 12
كتابات ساخرة


بقولك انو الرجال نص حياتهم ببحثوا عن طرق لاكتشاف الوصفه السحريه للسعاده الزوجيه. ومع انها للبعض تعتبر الشغل الشاغل الا انهم مع الاسف ما بوصلوا للسعاده المنشوده.
ليش؟ لانو السعاده غايه لا تدرك عند الكثير من النسوان والرجال وبما اني رجل حسب ما مكتوب بالهويه وهيك اقنعت حالي اني ديك مش دجاجه فانا بكتب من هاد المنظور وهاي الزاويه بعد خبرة زواج دقوا على الخشب اكثر من 30 سنه .
من الاخر النظريه شكل والتطبيق اشي تاني بالمختصر هناك اختلاف بين الرؤيه والواقع بين الحقيقه والخيال بين التنظير والتقطير والتنفير والتفكير والتعكير والتصغير والتكبيروالتصفير والتجبير والتحرير والتخدير والتنقير والتشفير وهيني سامع بعد ترديد عشر كلمات بعض التشخير فما بالكم بحياه طويله لسنوات فيها نقار ونقير.
بقولك انو على الرجل يقع العاتق الاكبر من ادخال السعاده على زوجته.. مين اللي تفتق ذهنه بهالفكره صدقوني مش عارف وعلى اي اساس بنى نظريته,, ومع هيك منجموط هالحكي وهالمقولي ومنساير النسوان ليوصلوا لبر الامان.
معك حق:
اذا كان في قضيه خلافيه بينك وبين المدام وانت صممت على فكرتك وهي صممت وبالاخير اكتشف انها كانت على صواب فاعترف ولا تتردد وقل لها من يوم ورايح راح تحترم رأيها .
هيك المفروض تعمل وتحمل يا خوي تحمل لاخر حياتك بتصير هي دايما على حق ولو انخرب بيتكم ,,,بس هيك المنرز والاخلاق والاداب بتطلب وتحمل عيني تحمل.
اقبل عيوبها قبل مميزاتها
هاد اذا كان في بالاصل مميزات وخبرها بقبولك الها بكيج ديل يعني كلك على بعضك حلوي يقبرني اللي خلق القالب الغالب.
اذا في شغلات مش عاجبتك فنبها عليها بطريقه غير مباشره مشان السعاده تبقى ترف على بيتكم الزوجي .
اكيد نص الرجال بدجوا دج ملاحظاتهم وهات حيكها.
كلمات المديح
بقولك كلمات المديح لها مفعول السحر على اذن المرأه حتى لو لم تكن واقعيه بس لازم تقولهم بصدق مشان جرعة الثقه والطمئنينه,, وفهمها للمدام انك ولا يوم ندمت على اختيارك الها.
نفسي اشوف زلمي ماشي على هاي النصائح اللي بذكرها مشان اعملوا تمثال.
شو مالك
تحتاج المرأه لسماع هاي الكلمه لما يقولها الزلمي بحنان واهتمام مشان لما تمر حرمه بازمه نفسيه تتخطى نقاط ضعفها واحباطها .. وفهمها عزيزي الزوج انك لها على طول وغنيلها انا لك على طول خليك لييه.
لا استطيع الحياه بدونك
في اي موقف عصيب او مصيبه المت بكم كزوج وزوجه فهمها يا عزيزي ادم للست حوا انو الحياه بدونها ما الهاش طعمه حتى لو كان عندك عشيقه وصديقه او جاره حنوني وما الحب الا للحبيب الاولي ..طبعا هاد الكلام حتى لنفسك عزيزي ادم لا تقولوا او حتى تحلم فيه انت وبس والباقي خس.
انت جميله
على الطالعه والنازلي اتغزل بالمرا وخبرها عن جمالها وقصة او تسريحة شعرها ولون فستانها وجمال قوامها ورشاقتها وان الغزال اكيد جنبها راح يطم حاله
من الاخر عمي الزوج لحلحلي حالك وافتح تمك وانطق اكم جوهره وبلاش البخل حتى بالكلامات وبحبح الغزل والهيمان والعشق وزيد عليهم شطه .
اي حرقت دمي يا ادم وانا بفهمك كيف تتعامل مع حوا وبعدين معاك.
اعتذر
ما ترد عزيزي على قصيده شاعرنا الاكبر محمود- درويش لا تعتذر عنما فعلت, لانه الله يرحمه لم يكن مزواجا سعيد, ونصيحه اعتذر فالاعتراف بالذنب من شيم الاخلاق ولا تتكبر على المدام ومرقها.
مع الاعتذار منك عزيزي الزوج,, الشاعر درويش كان وسيما وفي مليون امرأه كانت تتمنى ان تكون بين ذراعيه اما انت فاشكر ربك انك لاقيت وحدي تلمك وتحواك.
اظهر احتياجك لها
على كل الاصعده ورغم اختلاف الطقس بالصيف والشتاء وكل ايام السنه اظهر مدى احتياجك لزوجتك لانو واقع الكلام اشد من واقع الحسام والسيف على اللحم والاذن تحتاج الى السماع احيانا.
رايك يهمني
فهمها انو رايها كتير مهم في اختياراتك وشغلك وملابسك مشان طناجر الطبيخ لا تتوقف عن المناده لمعدتك , تخيل اكم وجبه طبيخ طبخت لك زوجتك خلال ال 30 عام.
واكم بنطلون وبلوزه وقميص غسلتلك واكم واكم واكم وبلاش ندخل بالغميق
عزيزي ادم اذا لم تتحمل معدتك كل هاي النصائح فبلاش تتجوز احسنلك او اتجوز واطلع كل عقدك ونواقصك وامراضك النفسيه بشريكة حياتك والا كيف سموها شراكه .
الشراكه هي مشروع على الربح والخساره
اذا قالولك انو الزواج هو مقبرة الحب والسعاده في منو هاد الحكي لاني كل اللي كتبته الله وكيلكم مقدرتش انفذ نصه واذا نفذت يوم طقعت اشهر ومع هيك مشي الحال.
لا تنسى بين فتره والتاني انك تهديها شي ورده او زجاجة عطر وان كنت مقتدر مش غلط خاتم الماس اليوم هاد الخاتم صار يعمل العجايب على زماننا كان خاتم النحاس ويا دوب.
اذا عملت بكل هاي النصائح وفش فايده فعلى حياتك الزوجيه السلام او انك بالاصل مش عايش فشوفلك طريقه واختصرها ولو بعد 30 سنه جواز او اتحمل والك الله وانتظر الفرج.





التعليق والتصويت على الموضوع في الموقع الرئيسي


التعليقات

1 - الغالي الاستاذ افنان القاسم المحترم
جان نصار ( 2016 / 7 / 12 - 10:18 )
على ما يظهر ان القلوب عند بعضها كنت بالامس اقول اني بصدد كتابة مقاله خاصه لك وانتظرها غدا
انا ايضا اشتقت لك جدا
حتى نلتقي
تحياتي وكل عاو انت والجميع بالف خير

2 - اخي جان
شيخ صفوك ( 2016 / 7 / 12 - 12:26 )
أحب ان اعلق ولكن لا املك الوقت بسبب العمل
أتابعك دائماً

3 - عزيزي شيخ صفوك المحترم
جان نصار ( 2016 / 7 / 12 - 12:41 )
يكفيني ان تكون بصحه جيده وارجو ان لا تطيل الغيبه علينا
المهم على الاقل هناك عمل
تحياتي وابتساماتي

4 - شكرا للعزيز جان
قاسم حسن محاجنة ( 2016 / 7 / 12 - 14:18 )
وتحياتي لك ولخفة دمك
ولكن الأهم من كل ذلك
هو عودة الأستاذ افنان ليطمئننا عنه
وانا اضم صوتي لصوتك وأقول له اشتقنالك يا راجل وين هالغيبة ؟
اشواقي ومودتي

5 - عزيزي قاسم المحترم
جان نصار ( 2016 / 7 / 12 - 14:53 )
انا بكره كاتب مقال لحبيبنا واستاذنا افنان القاسم .
مطلب جماهيري هو عودة الاستاذ افنان على السريع وبلا غنوجي الى الصفوف الاماميه من جبهة الحوار لاننا نعتمد عليه لانه راس الحربه والمهاجم الخطير للابداع الادبي والثقافي والمعرفي .
كل عام وانت بالف خير ارجو ان يكون اللهط على العيد على اد المناسبه ولو انك ما خليتلي حصه
المهم ان تكونوا قد قضيتم العيد على خير

من عندنا عمي احمد وخالتي صفيه وجارتنا انشراح يهدوكم السلام
تحياتي يا ورده

6 - لم يبق إلا أن تقول (عقل النسوان جوزتين بخرج) !
ليندا كبرييل ( 2016 / 7 / 12 - 15:55 )
روح الله يسامحك يا جان، يعني طلّعت المرا نص هبلة وعقلاتها جوزتين بخرج ، والدليل عبارتك
اقبل عيوبها قبل مميزاتها
هاد اذا كان في بالاصل مميزات
وأيضاً
اتغزل بالمرا وخبرها عن جمالها ..... ورشاقتها وان الغزال اكيد جنبها راح يطم حاله

أنتهز الفرصة لأتقدم إلى أستاذنا القدير أفنان القاسم بباقة ورد والترحيب بعودته الطيبة
أهلا بك والحمد لله على سلامتك

أهدي التحية أيضا إلى الأستاذ الغائب عن الحوار الحاضر في قلوبنا شيخ صفوك، والعمل يُجَوهر الإنسان
كذلك تحية طيبة للأستاذ محاجنة المحترم
وطاب يومكم أيها الأصدقاء

7 - الاستاذه ليندا كبرييل المحترمه
جان نصار ( 2016 / 7 / 12 - 17:12 )
هاي النقاط هي تحليلات نفسيه ومجرد دراسه ومحسوبك كالعاده البهارات وكتر اللعي مشان يطلع مقال ساخر على الاخر مش اكتر.
نفس الشي المرا شايفي الزلمي ومش شيليتوه من ارضه يعني الحب متبادل ومو غلط انو النسوان تكتب عن خفة عقل وطرطقة الرجال.
بقدرش اكتب اشي جاد وملتزم وفوق ذلك يكون ساخر واكيد مش كل اصابعك واحد وهيك النسوان والرجال
وين الغلط لو كتبتي عن هذا الموضوع بشكل عكسي وبعدين كله كوم وسبب خروجنا من الجنه هي حوا باعتراف كافة الاديان وهيك الخرافه بتقول فبدك تطولي بالكلاني بعتبر كل المصايب اللي نازلي علينا رف سببها النسوان
سعيد بحضور الاستاذ افنان وارجو ان يعود الى نادي الحوار قريبا
تحياتي ومودتي

8 - إلى الغالي قاسم محاجنة والغالية ليندا كبرييل وكل:
أفنان القاسم ( 2016 / 7 / 13 - 09:50 )
الباقين... أثرت كلماتكما وكلمات الغالي جان وكلمات الذين يسألون عني في قلبي، نحن بنينا صداقتنا صرحًا مش ليومين ولا لتلاتة... غيابي لن يطول كثيرًا، على الأقل هذا ما أتمنى، لأني سئمت الثرثرة المجتاحتنا التي لا دم خفيف لها (نحن في بيت أستاذ السخرية) وعزمت على القيام بخطوات عملية أولها التأسيس لمؤسسة المؤتمر وليس آخرها لقاؤنا، لكني لم أحل بعد مسألة التمويل، وبما أنني لم أعد مستعجلاً بما أن كل شيء واقف في بلد العم السام بسبب الانتخابات، فلم أقطع الأمل... تحياتي لكل من يسأل ولكل من لا يسأل؟

9 - اشتقنالك استاذنا
سمير ( 2016 / 7 / 13 - 13:41 )
وين هالغيبة اخي؟ انه شخصيا جربت انو المرة اذا تشتريله فستان عنده احلى من ان تقله انتي حلوة. هي الأمور تمشي حلو لمن تكون حماتك مسافرة لاميركا او للعالم الاخر، ولهالسبب سيدنا آدم كان سعيد. يلله لاتروح المرة تدخل الموقع وتقره تعليقي وأروح بسبعين داهية. تحياتي

10 - الاستاذ سمير المحترم
جان نصار ( 2016 / 7 / 13 - 14:13 )
شوف عيني انا عندي ميزه انو المرا اجنبيه وما بتقرا عربيلهيك بتلاقيني نافش ريشي وعامل عنتر
لما بتيجي الاوامر محسوبك بصير ارنب فخليها على ربك يا مواطن
انا ايضا اشتقت لك فارجوك داوم على الحضور وما تقطعنا
يا اخي كمان بدل ما تشتريلها الورد اشتريلها ضمة نعنع وبقدونس للسلطه او التبوله الواحد بدو مازه مع الكاس عيني
تحياتي وهلا بيك يا ورده

اخر الافلام

.. بدء التجهيز للدورة الـ 17 من مهرجان المسرح المصرى (دورة سميح

.. عرض يضم الفنون الأدائية في قطر من الرقص بالسيف إلى المسرح ال



.. #كريم_عبدالعزيز فظيع في التمثيل.. #دينا_الشربيني: نفسي أمثل


.. بعد فوز فيلمها بمهرجان مالمو المخرجة شيرين مجدي دياب صعوبة ع



.. كلمة أخيرة - لقاء خاص مع الفنانة دينا الشربيني وحوار عن مشو