الحوار المتمدن - موبايل
الموقع الرئيسي


خالتي ...والانتخابات

عبد الرزاق حرج

2005 / 12 / 28
كتابات ساخرة


في العطل الرسميه عادتا ...افتح النت صباحا ...لكي أراجع وأقرأ بعض المقالات والدراسات في المواقع والجرائد الآلكترونيه...لكن خلال البحث في هذه الصحف الآلكترونيه ...جاءت لي دعوه مستعجله في الميسنجر بأسم ...>أرحيمه 2 لوتي هوتمايل دوت كوم>...تركت كل شئ ولحقت هذه الدعوه المستعجله ...فتحت الميسنجر بأسرع وقت ...كنت فرح وأقول مع نفسي >أضرب رزاق وأيدك بالدهن راح تحجي مع عنوان جديد صاحبتها >...أمرأءه....طلع لي الميستجر صورة كره ...لكن في أسفل حقل الكتابه الصغير ...كلمات تقول أفتح الكاميره والصوت ..عجلت لهذا الطلب ...وأذا تخرج لي الصوره بعد دقائق الاستجابه ...صورة أمرأءه في ملايه سوداء >الملايه عندنا في الجنوب ...العصابه السوداء وهي قطعة قماش سوداء تلف حول رؤوس النساء الجنوبيات >...لكن الغريب من ذلك الامر كان المايك معلق حول أذنيها ...كان صوتها متقطع وهو يناشدني في السلام والترحاب ....توقفت لبعض لحظات على هذا المشهد الكوميدي والحوار المباغت ...قلت اللعنه ..انها خالتي أم أصبيح ...بدأ الصوت ينتظم وصورتها تتوضح أكثر لي !!!!...قالت ...ها خاله أشلونك أشلون صحتك بعدك بالسويد ......أتمر على عمامك بالسوده والبيضه في العماره لو لالا ...طبعا اولادها قالوا لها ان السويد هي ولايه تبعد عن ناحية السوده والبيضه حسبت اسويعات ...قلت لها ...خاله الحمده الله ..بس أنتي صدك خالتي >أرحيمه أصبيح>..أخوك السواها...شوف انت حلفتني بروح لوتي أبوي ...وأضن ماتعرف لوتي زين ...لوتي ريال زين وكليط عشيره وحرامي سلف..جان كل السلف أيحبه ويحلف أبراسه ...لان جان من أيبوك من غير سلف أيوزع الغنيمه بالتساوي على كل السلف ...ومن مات ..جانت الهوسه وره الجنازه والبيارغ والفشك أتهلهل ...والهوسه ظلت تاريخ بسمه ...هي >شت عكل الله وموت لوتي نترس راس العباس أفشك >..هذول الزلم جا,,,مو جاي ايعرس ...قلت لها خاله ...رحتي للانتخابات لو لالا ...هزت راسه والمايك معلق على الملايه السوداء ... قالت ولك رزاق سالفت الانتخابات ماتسولف ...قلت سولفي خاله ..أبروح لوتي عليج ...هذا العزيز...قالت خالتي ..تعرف من رحت بالآوليه للآنتخابات ..جان أوياي ..أصبيح ...وانه أعرف دكات أصبيح ...كلت ولك يمه أصبيح ...بس وصلني للبيب ما الانتخابات ..بس هاي أريدها منك ...كال ..أصبيح ..خوش ..أمشي يالله ...توزرت أوزار النسوان الزينات وتوكلت ومشيت مع أوليدي ..>أصبيح >...كول وصلنا الى الباب ...كلي يمه هاي وصلتي الى الانتخابات ...بعد أشتردين ...كالت ..أوكف ولك أصبيح ...باوعت على الباب والناس رايحه جايه على الانتخابات وأصابعهم مصبوغه ...كلت ويه روحي هاي المره صدكت أصبيح ..وتوكلت على الله لكن ...جان واحد واكف بحلك الباب وبركبته معلك هويه ..كلت احضر ياعلي هذول الحكومه الجديده والعباس !!!!..وكفت يمه ...كلت الله يساعدك يمه ...رد عليه ذلك الولد الزين ..كلي هلا بالحجيه أتفضلي يمه كولي ...يمه أنا جايه أنتخب وأريد منك أساعدني ...كال ألي أبشري يمه ..والولد الي وياج شنو شغله ..كلت له ..ماعليك من هذا الولد أنا أنتخيت بيك ..كال كولي انا عد عيناج يمه ...كلت يمه اريد منك ادليني على الغوائم الي تشرب عرك والغوائم الي ماتشرب عرك ...كال انتي حجيه شنو الي تردينه ..كلت أله الغوائم الي ماتشرب عرك ..كال وصلتي قوائم الساده ...كلت أي ابروح والدك ذلك الزين ..بعد ماحلفته بالعباس غيد اسمي ويه غوائم الي مايشربون عرك ....وجابني أصبيح وهو أيدردم عليه ..وأنا فرحانه ..كلت أله ولك أنا أنتخبت الساده أشوف تاليه ..راح أيبطوكم بط ...كول أشت الحكومه مالت الساده ..وانا نذرت للعباس خبز أعروك وجاي حار وزعته على حبايبي ..وانا أمكيفه راح تجينه الكهربه والماي ..بعد الساده كلهم أمان ...لكن مرت أيام وراحت أيام ...بس كثرت الغرايات وصور الآئمه والمحابس والسبح والزيارات الى مراقد الائمه المعصومين سلام الله عليهم ...بطرك هاي ...أنا أيست من شفت رحيم هيم وحسين ترهيم بجيش المهدي ...كلت يمه أنبكنه ..هذول راكبين سيارات ماشايفتها كبل ...ويكولون للناس والله احنا راح انبلط ألكم شوارع بغداد كلها ...كول النتيجه عصينه بالبيوت بعد مانكدر نطلع على المصايب ماالله علينا ...أصبيح ..كركع راسي ..هذول ربعج ...كل ما أريد أحجي على الطراكيع ماألله ..يجاوبني وينتر بيه ...هذول الي خبصتيني بيهم ...ما أطول عليك السالفه ...أشت موعد الانتخابات الجديده ...صحت على أصبيح وكتله يله أخذني أنت على عرفك بلكي ألله يحل مشاكنه ...جابني أصبيح يم الغوايم ..وكال يله وقعي بهاي القائمه ...كتله يمه ...أصبيح ...بس علمني هذول شنهو ...حتى أكدر أفرزن الزين والموزين ..ولك أبني أبني ولك أنكطع كلبي .....كالي خوش أنا جبتج أتوقعين على قائمه بيها ..>كلشي وكلاشي >..بيها سنه وشيعه ومسيح واكراد وشيوعيون وكل الطوايف بيها... يمه ...كلت ولك لاجذب عليه ...بس أحلفك .بالعباس ابو فاضل ابو راس الحار الي تحلف بيه الحراميه ...يمه صدكي هاي أحسن القوائم ..اتوكلت على الله ووقعت >على غايمة الكلشي وكلاشي >..بس من شفت العريس بالصوره بالغايمه لعبت روحي ...يمه رزاق .....جا شو هل الايام طلعت سوالف مايلبس عليها ثوب ....ناس اتكول زوورو الغوايم وناس أتكول أيحلفون بالوادم بالغران الكريم على أمود أيوغعون بغوايمهم ..وناس أيمسحون الحبر من الاصابع حتى أيوغعون مره أخرى ...وناس أيكولون أمطببين غوايم مزوره من أيران ....أذكرت سالفت ...شنيشل ...قلت لها ..شنهو سالفت ...شنيشل ...بروح لوتي ذاك الزين ولو انا تعبتج ...لا يمه أشو أحنا كارصين بكبورنه يمه خلينه عاد أنسولف وياك بالفلزيون لله أنطانياه تالي وكت .....سولفي يمه ...كالت يمه رزاق ...مره صدام حسين ..راح الى ضواحي العماره بيام الحرب الايرانيه العراغيه ..وتدري طلعت الناس أزغيرها وجبيرها تستقبل> صدام >..تتراكض من غصبن عليها ...وتهوس الناس بهوسات أهنا الى صدام ....وكف بين الناس وظل يرغي ويكول يجب ان ننتصر على العدو الفارسي وأحنا العرب لازم نتوحد ...بعد فتره أتوقف عن الكلام ..وكال منو عنده سؤال ...محد حجه ..باوع صدام على الناس ..شاف واحد شايل أيده ويلولح بيها ...كاله ...صدام ..كول ...كال الذي يسأل ..سيادة الرئيس .أنت أب الكل وأحنا نريد منك ...لامن غيرك ياسيادة الرئيس ..كاله ..صدام أطلب ....ياسيادة الريس ..تعرف أحنا قريه مكطوعه أنريد توصلون الكهربه والماي القريتنه ...التفت على الحرس صدام ...قال سجلوا مطاليب هذا الرجل ..بعدها أستمر صدام بالحجي على الفرس وينفخ بالعرب ....وكف عن الكلام ...وكال منو عنده سؤال أستفسار ...الناس لاحس ولانفس ..الا من أيد أشنيشل ...كاله ...صدام كول ... ..كال شنيشل ..سيادة الريس ,,أحنا ماعدنا غيرك والله بعد أحنا نطلب من والدنا ...قال صدام ...أطلب ...قال ...أشنيشل ...أنريد أتبلطون الشوارع مال القريه ..حتى من أتهلون علينا مانطير هذه التربان ...التفت صدام على الحرس وقال سجلوا الى هذا الرجل مطاليبه ....أستمر صدام حسين في الحجي عن النخوه العربيه والشجاعه والكرم وبين كل سافه وسالفه ..أيكول أحنا عرب صاحبين مروه ...بعدها وكف عن الكلام وكال انا راح اودعكم وان شالله انشوفكم منتصرين ......منو عنده شئ أيضيفه قبل ماأنروح ...محد حجه من الناس الا من أيد شنيشل رافعها ...باوع عليه صدام بترس أعيونه ...كال صدام ..كول ...سيادة الريس أنت أبونا ونمون عليك ولو كثرنا مطاليبنا عليك لكن انت أب العراقيين ...قال له ...تعال وأتقرب اولا ..مشى شنيشل وهو فرح في هذه الاستجابه التاريخيه ...وصل قرب صدام حسين ...ساله صدام ماهو أسمك وماهي مطاليبك ...أجابه سيادة الرئيس ..أنا أسمي شنيشل ...اما مطاليبي ألاخيره هي لو تبنون لنا مدارس جديده لان هذه المدارس قليله تعدادها بالنسبه للقريه ...هز رأسه صدام وقال الى الحرس ..أخذوا أشنيشل وياكم حتى هو يستلم كل مطاليبه بيده ...أخذوا أشنيشل وياهم يمه أرزوقي ....بعد سبعة أسنين مر صدام حسين بنفس هاي القريه ...وتعرف طلعت التاس تتراكض لاأستقبال الريس .....هم وكف وسطهم وراد يحجي ..وأذا وحده من النسوان صاحت بعلو صوتها ...يمه يهل الريس وجاءت تزحف ازحوف على أركبها بعد ما أشر صدام الى الحرس أن تأتي هذه المرأءه ..أقتربت من صدام وكالت ..يمه ألله أيطول عمرك يمه يهل الريس ...أنا ماخليت مستشفى ما دورته ولا مر كز ولا دائرة امن بكل العراق فريت حكه ومكه ..على أوليدي أشنيشل من راح وياكم لحد الان ما رد أنه...يمه يهل الريس أحنا لا أريد كهربه ولا ماي ولامدارس ولا تبليط شوارع أنريد أوليدنا أشنيشل ...صفن الريس وكال الى العجوز يوصلج أبنج ...لكن أنقره عليه السلام يمه رزاق .هسه كلشي ما أريد... أريد حلنه يرجعنه ,,قلت لها كيف خاله يرجعلج حلج ماأشوفين صارت عرس واويه ..ودعتها وهي تقول لي يمه على الجايات سولفي سالفت عرس الواويه..وهي تضحك





التعليق والتصويت على الموضوع في الموقع الرئيسي


اخر الافلام

.. -لقطة من فيلمه-.. مهرجان كان السينمائي يكرم المخرج أكيرا كور

.. كواليس عملها مع يحيى الفخراني.. -صباح العربية- يلتقي بالفنان



.. -بين المسرح والسياسة- عنوان الحلقة الجديدة من #عشرين_30... ل

.. الرباط تستضيف مهرجان موسيقى الجاز بمشاركة فنانين عالميين




.. فيلم السرب لأحمد السقا يحصد 22.4 مليون جنيه خلال 10 أيام عرض