الحوار المتمدن - موبايل
الموقع الرئيسي


ذكريات..ما بلاش نتكلم في الماضي! عمرو دياب (1992)

محمود عبد الله
أستاذ جامعي وكاتب مصري
(Dr Mahmoud Mohammad Sayed Abdallah)

2017 / 3 / 26
الادب والفن


ذكريات..ما بلاش نتكلم في الماضي! عمرو دياب (1992)

محمود محمد سيد عبدالله (أستاذ المناهج وطرق تدريس اللغة الإنجليزية المساعد - بكلية التربية - جامعة أسيوط)

مع إن "العودة إلى الماضي" عكس إللي بتقوله الأغنية الجميلة دي..لكن خلينا نرجع شوية للجو التسعيناتي الجميل ده..وبالتحديد في 91 أو 92 لما كانت موضة "الأغاني الشبابية" في عزها..وكان "الفيديو كليب" لسه في بدايته..بيستخدم عناصر بسيطة في المشهد - زي القلة والزير - ما كناش فاهمين (ولا زلنا) المغزى من وراها..وأعتقد المخرجين والمطربين ما كانوش فاهمين برضه! ههههههههههههه ..لكن كنا بنحبها ونتمنى إذاعتها باستمرار وفي أي برنامج ترفيهي..أصلي ما كانش فيه فضايات ولا قنوات مخصصة للأغاني والكليبس زي دلوقتي..

كمان كان من الحاجات الغريبة التناقض ما بين الموسيقى الراقصة وشجن الكلمات..بس آلة "الساكس" (وخصوصا في الأغنية دي) كانت بتظبط المود شوية وتدي إحساس بالشجن في ظل هذا الإيقاع الراقص..وكانت الآلة الموسيقية دي موضة كبيرة في الفترة دي (من أوائل إلى منتصف التسعينات)..واللي استخدمها عمرو تاني - وبشكل مؤثر - في أغنيته الجميلة "حبيبي"..

من ناحية اللبس ، كانت السوالف الخفيفة المتقلمة (والمتعلمة) كويس والطويلة نوعا موضة جميلة أيامها - وعن نفسي ما زلت متمسك بيها إلى الآن..وكمان الألوان السودا والغامقة موضة في بدايتها..وده واضح في لقطات كتيرة في الأغنية..واستمر الحال لغاية ما انتشر الموضوع ده (اللبس الأسود كاملا دون تدرج ودون أن تخالطه أي ألوان أحرى) بشكل غريب ومخيف بعد منتصف التسعينات لدرجة إن الكبار كانوا بيتريقوا علينا ويوقولولنا: "مالكم مغمقينها ليه كده؟ شباب زي الورد في مقتبل العمر ما كملش عشرين سنة وكل لبسه أسود في أسود!"..وانتهى المطاف بالموضة دي إلى أقصى تطرف بظهور ما كان يسمى "بعبدة الشيطان" ونوع متطرف من الموسيقى الغربية حاربه الإعلام المصري بقوة آنذاك.. يمكن كتير من جيلنا يفتكر أيام "قصر البارون" واللي كان بيحصل هناك في السهرات دي وكده..

المهم الأغنية جميلة والكلمات حلوة والإخراج كويس - على قد إمكانيات وتقنيات الفترة دي..أتمنى تستمتعوا بيها..
https://www.youtube.com/watch?v=-tH1ngB1usc





التعليق والتصويت على الموضوع في الموقع الرئيسي


اخر الافلام

.. وفاة زوجة الفنان أحمد عدوية


.. طارق الشناوي يحسم جدل عن أم كلثوم.. بشهادة عمه مأمون الشناوي



.. إزاي عبد الوهاب قدر يقنع أم كلثوم تغني بالطريقة اللي بتظهر ب

.. طارق الشناوي بيحكي أول أغنية تقولها أم كلثوم كلمات مش غنا ?



.. قصة غريبة عن أغنية أنساك لأم كلثوم.. لحنها محمد فوزي ولا بلي