الحوار المتمدن - موبايل
الموقع الرئيسي


تسكن إبيت أبوذية

جبار عودة الخطاط

2017 / 4 / 15
الادب والفن


وارد ابشرك كل شي راح
الجبر راح
الصبر راح
الامس راح
اليوم راح
وباجر التنطر انفاسه
ذب جرش
وي الامس غفلاوي راح
و العمر كوطر وسافر
حركته شموعك وراح
والبلم كسر مجاديفه
برمل هيمة ايامك ..تالي راح
و الجسر ما ظل جسر
يا وسفه راح
و النهر لملم الروج
ودكم جروفه و عبرني هناك راح
والقطار ألما اجاني
قبل ما يوصلني راح
والحلم
حتى الحلم
طرك عباته الململ وهاجر وراح
البخت راح
الدرب راح
الباب راح
وتبجي رازونتنه راحت
وذيج صفصافتنه
هيه والفخاتي
رفرفت اغصانها وللحلة راحت
وصار بيتك سجن
تتوسل حياطينه السماح
وتالي روحك
رافكت كلشي اللي عافك
تسرسحت وي اللي راحوا
وصار كسرك الها من شاغت جناح
وكلشي راح
وما صفت لك
بس ابو اذيتك السمرة
هي جرحك
وهي روحك
وهي تربة وهي خمرة
هي امك
هي بتك
وهي بيتك
جا بعد شتريد
بيتك بيت ابوذية
بناه داخل حسن
والناي فاسه
البيها دك طابوك حايط
اشكد عليه مرت عواصف
بقه ثابت
والضلع بالضلع طاح
جا بعد شتريد
بيتك بيت ابوذية
وتدك بابه مواويل المسه
بعتبة صباح
بيت ابو ذيه
وتشم بحطب صبره
بخور من رماد كل شيء
راح منك واستراح ..
وظلت ارواح اللي
راحوا عطر جوه الجلد فاح
وظلت ارواح اللي
راحوا شعر جوه الجلد صاح





التعليق والتصويت على الموضوع في الموقع الرئيسي


اخر الافلام

.. فيديو يوثق اعتداء مغني الراب الأميركي ديدي على صديقته في فند

.. فيديو يُظهر اعتداء مغني الراب شون كومز جسديًا على صديقته في




.. حفيد طه حسين في حوار خاص يكشف أسرار جديدة في حياة عميد الأد

.. فنان إيطالي يقف دقيقة صمت خلال حفله دعما لفلسطين




.. فيديو يُظهر اعتداء مغني الراب شون كومز -ديدي- جسدياً على صدي