الحوار المتمدن - موبايل
الموقع الرئيسي


عمدة كفر الهنادوة يعيد ترشيح نفسه

فاروق عطية

2018 / 1 / 22
كتابات ساخرة


أعلن عمدة كفر الهنادوة ترشيح نفسه لدورة عمودية ثانية. إنقسم مواطنوا الكفر بين مؤيد ومعارض، ومعظم المؤيدين هم من فئة الطبالين والزمارين المنتفعين من نظام العمدة الذي أغرقهم في خيراته، إضافة لأولاد المسلمانية الوهابية الذين زاد نفوذهم وجبروتهم في عهده دون رادع أو حتي مؤاخذة لما يفعلونه في أولاد المسيحانية لدرجة القتل وحرق الممتلكات والتهجير من حواريهم لحواري أخري بعيدة، ومنهم ايضا أغلب أولاد المسيحانية ليس حبا في جنابه ولكن خوفا من عودة العمدة الأخونجي السابق أو أحد أتباعه فيزداد التمييز عليهم فيقعوا بين شقي رحي الإخونجية والسلفية الوهابية. أما المعارضين لترشحه هم العلمانيون الذين سئموا أن يعيش الكفر منذ حوالي سبعة عقود تحت الحكم العسكري المسيطر عليه منذ خمسينات القرن الماضي أتباع شيخ الغفر والمؤيد بتحكّم رجال الدين الذين يحللون للعُمد ما يفعلون طبقا للمقولة التي بها يتشدقون: أطيعوا الله والرسول وأولي الأمر منكم. كما يعارض ترشحه فئه غير قليلة من أولاد المسيحانية المقيمين بالكفر أو المقيمين في الكفور البعيدة الذين أغضبهم تراخي العمدة المستمر في حماية أهاليهم من خطف أولادهم وطلب الفدية أو القتل وسبي نسائهم وحرق متاجرهم وممتلكاتهم وتهجيرهم بعد جلسات عرفية ظالمة التي زاد معدلها في عهدة عشرات المرات عما كان عليه في عهود العُمد السابقين له، ويرون أن تقاعسه قد يكون خوفا منهم وتلك كارثة او موافقته الضمنة لما يفعلون وتلك كارثة أشد وأنكي.
الواد عوضين أبو لسان زالف كعادته كان قاعد علي قهوة العواطلية علي ترعة الكفر مع مجموعة من شباب الكفر يحتسون الشاي الاسود اللي زي الزفت، ويتبادلون غابة الجوزة ويشدون ويحرقون المعسّل ويخرجون دخّانها من فتحات أنوفهم في انشكاح وانبساط، والواد حمدته صبي المعلّم واقف زنهار حداهم لتغيير حجر الجوزة عند اللزوم. الواد حمكشة اللي غاوي يسأل أسئلة هايفة زيّه قال: إيه رأيك ياض يا عوضين في قرار جناب العمدة عبد الوهاب السمسمي في ترشحة لدورة عمودية تانية ؟ الواد عوضين أبولسان زالف شد نفس عميق وأخرج الدخان من نغاشيشه وقال: حقه سِبر بلدنا يدّيه الحق في التَرَشُح مرتين، لكين برضه يدينا الحق في الموافقة أو الرفض، كمان يدي الحق لكل مواطن صالح في الكفر يرشح نفسه دون اعتراض ما دامت تنطبق عليه الشروط. قام الواد برعي أبو زبيبة زي حدوة الحمار علي نفوخه قال معترضا: مين ده اللي يرشح نفسه قصاد سيدنا وتاج راصنا عبوهاب السمسمي؟ رد عليه أبو لسان زالف وقال: سيدك انت وتاج راسك انت، إحنا مش عبيد عند حد، العمودية وظيفة لخدمة أهل الكفر يعني هو اللي شغال حدانا ياض يا عكر يابو مخ مقفول. الواد برعي مسكتش واستمر في اللماضة: يعني عاجبينك قوي اللي مرشحين نفسيهم قصاد جناب العمدة، قال ايه حامي حنّان اللي كان من معية شيخ الغفر السابق وكمان الجماعة المنحلة موافقة عليه وكفر الأماركة مذكياه عاوز يحط راسه براس جناب العمدة، ولا التاني خالف علي اللي عمل بصوابعه حركات وعليه قضية مخلة بالشرف قال عاوز يخش الانتخابات، كمان مرفوضي مهزوم اللي جاب داغ نادي المهالك الأرض وخلاه يتغلب من طوب الأرض قال عاوز يبقي عمدة كفر الهنادوة عشان يخيّبها خيبة نادي المهالك.
الواد عوضين أبو لسان زالف بصله بصة غضب وشَخَط فيه وقال: ياض انت روح لامك تعشيك يا ابو مخ ضلم باينّك ماطفحتش من يومين، أنا أفطّنك يمكن تفهم، من حق أيتها فرد فيكي يا كفر يرشح نفسة زي ما قلت لك ما دام ماشي حسب القانون وما عليهوش جريمة واللي مش عاجبه واحد منهم ميديلوش صوته ويديه للسخص اللي داخل نافوخه، كمان بالنسبة لقضية المرشح المنتظر خالف علي المحكمة حكمت بالبراءة بعد ما اتنورت وعرفت إن الصورة بتاعت الصوابع إياها فوتوشوب معمولة لتشويهه بعدما تحديه جناب العمدة اللي سلم الجزيرتين لكفر السعادوة وأثبت بكل المستندات إنها هنادوية 100% والمحكمة حكمت بكده، أما بخصوص المرشحين المنتظرين الآخرين فدول تبع جناب العمدة ونازلين بعلمة عشان الطبخة تتسبك يعني بالمفتشر اتنين كُمبارس.
الواد محفوظ البلعوطي قال: جناب العمدة اللي مش عاجبك ياض يا ابو لسان زالف هو اللي عمل للكفر قيمة ، كفايه إنه فتح ترعة جديدة عشان التجارة بين الكفور تبقي أسهل علي المراكب، كمان هو اللي بني دوّار جديد للعمودية علي نضافة وبني جمبه جامع وكنيسة. رد عليه الواد عوضين أبو لسان زالف وقال: مين ياض قال لك إن جناب العمدة مش عاجبني؟ أنا منساش فضله في تنحية العمدة الأهطل بتاع الجماعة المحظورة، لكن لينا مطالب يوعِدنا بتنفيذها واحنا كلاتنا وراه ومستعدين الكفر كلاته يطلع في الشوارع والميادين لتأييده. وقبل ما اقولك علي المطالب أحب افطنك إن الترعة الجديدة لا هي ترعة ولا يحزنون هي مجرد تفريعة صغيرة وملهاش أي لازمة في الأيام السودة دي اللي فيها التجارة بين الكفور تكاد تكون معدومة، وعشان يعمل التفريعة دي لمّ تحويشة عُمر الغلابة ووعدهم بفايدة كبيرة 12% والحقيقة الغلابة خسروا أكتر من 50% من فلوسهم لانخفاض قيمة العُملة الهنادوية أمام العُملة الأماركية، كان الدوبار الأماركي يساوي 8 لحلوح هنادوي دلوكيت الدوبار الأماركي يساوي 18 لحلوح هنادوي. أما بخصوص الدوار الجديد ده مش معمول للغلابة اللي زيينا ده معمول لكبارات الكفر من المحاسيب بدليل السور العالي اللي محاوطه ومش ممكن اختراقه، وكمان اللحاليح الملايين اللي اتحطت فيه كان أولي بيها التعليم المتدني والمستشفيات اللي زي زرايب البهايم لا مؤاخذة ولا يدوها للغلابة دعم بدل ما المِش غلي وبقي سلعة كمالية.
شد أبو لسام زالف نفس طويل من الجوزة وطلّع الدخان بالراحة من منخاره وقال: أنا كنت بَعَت جواب لجناب العمدة وقولت له علي المطالب اللي أهل الكفر طالبينها من جنابه عشان يقفوا كلاتهم مسلمابية ومسيحانيه وراه في الانتخابات، ومافيش مانع إقول لكم علي أهمها: أول هام يلغي دستور الإخوان اللي مليان بنود ضد بعضيها ويتعمل دستور جديد يشرف علي عمله أساتذة القانون، يؤكد المواطنة الكاملة لكل أهل الكفر والمدنية الكاملة للحكم ولا يحتوي علي بنود دينية. تاني هام يلم كل الإخوانجية اللي مزروعين في كل مصالح الكفر ومعطلين مصالح الناس حتي يجبروا الناس علي كراهية جنابه ويفعّل الأحكام اللي صدرت ضد قياداتهم ويعدم اللي اتحكم عليه بالإعدام ويوفر الوز والبط اللي بيطفحوه وقاعدين في سجون سبع نجوم واحنا مش لاقيين العيش الحاف، وكمان يعلن أنه ضد السلفية الوهابية اللي مرحرحة في البلد وماده رجليها علي الآخر وفتاويها عاملة مشاكل طائفية مستمرة في الكفر وهم أيضا المحرضين لكل الإرهابييين المنتشرين في حارة السيناوية وبيقتلوا أبناء الشعب. تالت هام تفعيل القانون ولازم يطبق علي الكل الكبير قبل الصغير ويوقف تماما الأحكام العرفية الظالمة اللي ابتدعها بيت العار اللي اسمه بيت العيلة. رابع هام تحجيم دور جامعة الأزهر واقتصارها علي الكليات الدينية وباقي الكليات تحوّل لوزارة التعليم العالي، ويعامل شيخ الأزهر معاملة أي موظف عام يمكن محاكمته وعزله إذا أخطأ والحد من الميزانية المهولة المرصودة له دون فايدة، وتحويل جميع المعاهد الدينية المنتشرة في كل مناحي الكفر إلي مدارس لتخريج الصنايعية والحرفية والأيدي العاملة المطلوبة للكفر بدل كونها مفرخة للإرهاب الموجه لكل الكفور بلا استثناء.
الواد عوضين أبو لسان زالف بعد ما قال اللي في نفسه شد كام نفس من الجوزة وشخط في الواد حمدته صبي معلم القهوة وقال له: غيّر الحجر يابن اللئيمة بدل وقفتك فاشخ خشمك وانت مش فاهم حاجة زي اللطوخ دول اللي حوليا، جاتكم الهم عالم مخها مصدي.. وقبر يلم العفش..!!





التعليق والتصويت على الموضوع في الموقع الرئيسي


التعليقات

1 - استفسار
نادية سمعان ( 2018 / 1 / 28 - 00:52 )
اه من الوادعوضين وكهنه.. بس حضرتك تقصد ايه من المقال استاذنا الرائع ؟

2 - الرد علي تعليق القارئة/نادية سمعان
فاروق عطية ( 2018 / 1 / 28 - 00:59 )
المقال عبارة عن مجرد نقد للانتخابات الديمو كراسية في بلادنا فقط لا غير، وتمنياتنا أن نرقي بها لتكون انتخابات ديموقراطية حقيقية

3 - أفضل من غيره حاليا
نادية سمعان ( 2018 / 1 / 28 - 01:52 )
بس أنا شايفه بجد خلينا نكمل مع السيسي اهو احسن من غيره حاليا، دا رأي الشخصي بالرغم في حاجات كتير حضرتك إحنا مظلومين فيها، انا عارفة بس لو واحد غيره انا احساسي الشخصي اننا هنبقي زي العراق او سوريا ولا حضرتك ليك رأي تاني؟

4 - الرد علي تعليق ثاني للقارئة/ نادية سمعان
فاروق عطية ( 2018 / 1 / 28 - 02:03 )
عزيزتي مصر محمية من رب الكون وتاريخها الطويل وحضارتها المغروزة في شعبها الطيب يجعلها لا يمكن أن تكون مثل سوريا أو ليبيا أو العراق. بلا شك السيسي أحسن من غيره في الوقت الراهن، وهينجح شئنا أو أبينا بانتخابات أو عيرها ولكن ما نكتبه ليس رفضا له ولكن فقط لنذكّره أن الشعب واعي ويريد العدل والديموقراطية الحقيقية لا ديموقراطية ديمو الكراسي بتاعة القذافي، تحياتي

5 - الطريقة غلط
نادية سمعان ( 2018 / 2 / 2 - 16:41 )

عند حضرتك حق، بس هي الطريقة اللي عاملوا بيها كل اللي ينوي او يفكر يرشح نفسة غلط مش عارفة ليه كلنا او معظمنا عاوز السيسي بس مش معناها نموت الي يترشح معاه. وانا اعرف ان قلب المُلك كجدول مياه في يد الرب حيثما يشاء يميلة يعني الرب هو الي يقرر مين يحكم البلد

6 - خفة دم
د.مريد جميل ( 2018 / 4 / 7 - 01:58 )
انا قريت المقاله الى نشرتها معبره عن الحاله وان كانت مصحوبه كالعاده بخفه الدم والسخريه تحياتى

اخر الافلام

.. مهرجان كان السينمائي: تصفيق حار لفيلم -المتدرب- الذي يتناول


.. إخلاء سبيل الفنان المصري عباس أبو الحسن بكفالة مالية بعد دهس



.. إعلان آيس كريم يورط نانسي عجرم مع الفنان فريد الأطرش


.. ذكريات يسرا في مهرجان كان السينمائي • فرانس 24 / FRANCE 24




.. الفنان السعودي سعد خضر لـ صباح العربية: الصور المنتشرة في ال