الحوار المتمدن - موبايل
الموقع الرئيسي


**دارميات**

ميسون نعيم الرومي

2018 / 7 / 5
الادب والفن

دارميات
ميسون نعيم الرومي

بشليلي الم انجوم وانثر دربكم
والگمر ضوَّه الليل يمشي بثركم
***
حروفك ترافه اوهيل عنبر سحرهه
بحر العشگ مفتون حاير بمرهه
***
غصبا واهيد الروح مگدر عليهه
خلتني چن مجنون كله امن اديهه
***
ضايع گمرنه الچان يزهي ابسمانه
عينه تصد للغير راح اونسانه
***
حاير واعاين ليك يوليفي يالصد
مدري الورد بالإيد مدري على الخد
***
اتعثر ابممشاي والدمع يهمل
اسأل وادور اعليك يالانت لجمل
***
قوس اوقزح لعيون حرت ابوصفهن
اهوايه تره حلوات وانتِ گمرهن
***
اتنطرك كل يوم عيني على الباب
هايم انا حيران والعشگ چذاب
***
مولح صبيهه العين والدمع وشـٓـل
راح اوإجه رمضان .. ياريتك اتهل!
***
خليني اعاين ليك لن روحي بيدك
چا هيـّه مو بالكيف گلبي يريدك
***
لملم اگليبك هاذ روح اشرد ابعيد
لاينفع ابره اوخيط لا حتى تجديد
***
گمره اوربيع اليوم حلوه اوضويـّـه
وامطرزه ابنجمات اسمانه اوزهيـّه
***
ياذيني هذا الليل مخاوي ونيني
يچيم جمر بالروح كلما يجيني
***
نار الگلب تنور ماتطفه بدموع
تربي تظل لعيون بس تبچي وتلوع
----------------------------------------
تموز/ 2018
ســــــــــتوكهولم

---

---

---

التعليق والتصويت على الموضوع في الموقع الرئيسي

---

.. لتسليط الضوء على محنة أهل غزة.. فنانة يمنية تكرس لوحاتها لخد


.. ما هي اكبر اساءة تعرّضت لها نوال الزغبي ؟ ??




.. الفنان سامو زين يكشف لصباح العربية تفاصيل فيلمه الجديد


.. الفنان سامو زين ضيف صباح العربية




.. صباح العربية | الفنان سامو زين ضيف صباح العربية