الحوار المتمدن - موبايل
الموقع الرئيسي


جاسمية تفضح ربع ابو جاسم

مؤيد عبد الستار

2018 / 8 / 19
كتابات ساخرة


مشهد تمثيلي الحلقة 13
* دكن حيل خالاتي وياي ... جبته برجيح العين ومراجشف جلاي
- ها جاسمية ... مطربة اليوم .... ليش ما تروحين لـلتلفزيون بلجن تصيرين بمجان حضيري ابو عزيز .
* اي .. من نار البكلبي ..جا هي صايرة دايرة .. بعد كل ها العنجلية والطربكة وجيب قاضي ودي قاضي تطلع سالفة الانتخابات هيه هيه .. ما تكلي شلون دبرتوها .. شلون دسترتوها ؟ّ!
- النوب احنا دسترناها .. احنا ياهو مالتنا .. هو القاضي راضي .. المفتي شعليه .
* ماطول هيجي .. خلي القاضي باجر يفيدكم من تهجم الوادم على المنطقة الكشرة .
- لا تخافين علينا .. ماطول السفارة الجبيرة يمنا .. ما حد يكدر يهجم علينه .
* جا ، ما نفعت سفارة ابو ناجي نوري السعيد .. اذكرك لو نسيت ..يومن صاحبكم لبس عباية وسحلوه بالشوارع !!
- راح ذاك الزمان .. جان اكو شارع يفتهم يهز اكبر حكومة .. هسه الشارع ملتهي باكل بطنه .
انتي لا تظلين بعكل اهل كبل .. الدنيا تغيرت .. يا دوب تلكين واحد يقره ويكتب وشهادته ما مزوره .
* والله ما كو غير ربعك شهاداتهم مزورة .. ذولاك ربعنه كلهم شهاداتهم من صدك والعالم كله يعرفهم .. لاجن انتو ما تنطون للوادم طريق .. انتو ماكلين الاخضر واليابس بحجة الدين اللي برئ منكم ومن حيلكم .
- هسه ياجاسمية قابل اني حارف رويسه .. مو كل الوادم تبوك وتنهب الاخضر واليابس .. احنا شطايح بيدنا.
* شوف ابو جويسم .. كل شط واله جرف .. انتم ما تدكدرون تسون الشط مرك والزور خواشيك .. احنا تاليها ناخذ حقنا بايدينا .
- يعني جاسمية انتي تهددينا .. تره احنا مو تايهين ... احنا اولاد عشاير اجاويد .. اذا تهددينا نعرف شغلنه وياج !
* والله تعرف شغلك ما تعرف ... اولاد الملحة راح يسحلوكم بالشوارع واحد واحد .. حتى لو لابسين عمايم بلاك اند وايت .. وانا وياك على مد الله .





التعليق والتصويت على الموضوع في الموقع الرئيسي


اخر الافلام

.. أحمد حلمى من مهرجان روتردام للفيلم العربي: سعيد جدا بتكريمي


.. مقابلة فنية | الممثل والمخرج عصام بوخالد: غزة ستقلب العالم |



.. احمد حلمي على العجلة في شوارع روتردام بهولندا قبل تكريمه بمه

.. مراسل الجزيرة هاني الشاعر يرصد التطورات الميدانية في قطاع غز



.. -أنا مع تعدد الزوجات... والقصة مش قصة شرع-... هذا ما قاله ال