الحوار المتمدن - موبايل
الموقع الرئيسي


يوميات زوج مطحون

طارق ناجح
شاعر، قاص، وكاتب
(Tarek Nageh)

2018 / 9 / 4
كتابات ساخرة


يُصدِر التليفون المحمول ، الخاص بالأستاذ زكي ، رنَّات متتالية مزعجة مُعلِنَةً أَنَّ الساعة السادسة و النصف صباحاً .. على الرغم من ذلك يَغِّط الآستاذ زكي في نومٍ عميق ، مما دفع زوجته زكيه  أن تَصرُخ صائحةً :-
- ما تقوم يا منيِّل على عينك .. ده سكان المريِّخ صحيوا ، و قالوا بِتصَحُونا ليه .. ده لِسَّه الساعة عندنا واحدة و نص بعد نص الليل  .. قوم يا راجل  .. يعني لازم كل يوم تطلَّع حِسِّي .. يا راجل قوم قبل ما الجيران يتصلوا  بالشرطة و يعملُولنا محضر إزعاج .. 
تَمطَّى زكي و لا السيد قشطة في زمانه .. فأصدر السرير صريراً و أنيناً و كأنه يقول " يا جدعان حد يرحمني و يتصل بالوِنش علشان يشيل الداهية اللي نايمه عليه " . فَرَك زكي عينيه بقوَّة حتى يستطيع أن يفتحهُما ، لينظر إلى زوجته القابعة إلى جواره في إشمئزاز و غيظ صائحاً :-
- إيه يا وليَّه الغاغه اللي إنتي عملَاها على الصبح دي .. إنتي كل يوم هتسمَّعيني الموشَّح ده .. ده بدل ما تقوُلِيلي إصحى يا بَابِي .. إصحى يا دبدوبي .. و تدلَعِيني زي نيرمين الفقي لما كانت بتدلَّع مصطفى فهمي في مسلسل " حياة الجوهري " و لَّا سُميه الخشاب في "الحاج متولي" .. 
زكيَّه تمصمص شفتيها قائلةً :- 
- دبدوووبي .. آه فعلاً .. من أنت شبه الْدُّبْ .. قال مصطفى فهمي قال .. إش حال مكنتش شبه برميل الطرشي .. 
زكي:- يا وليَّه إختشي .. و خللي يومك يعدي على خير ..  
زكيَّه ساخرة  :- حاضر يا سي رشدي أباظه .. قوم يا خويا .. و إبقى كَمِّل نومَك في الشغل ..
زكي :- أنام في الشغل إيه يا وليَّه يا مَخبوله .. هو أنت فاكره علشان نقلت شغلي من الصعيد .. و جينا هنا الغردقة .. يبقى سَلِّموني فوطة و مايوه و شيزلونج  Sun lounger و صن بلوك sun block علشان  أدهن بيه جِسمي علشان أعمل تان tan  .. لأ ياختي ..  آلتان ده من الشمس اللي قَوَرِت دماغي و أنا رايح و أنا جاي من الشغل .. 
أزاح زكي الغطاء من فوق جسده  و نهض من سريره ، و قد وضع إحدى قدميه في الشِبشِب بينما تبحث قدمه الأخرى ، كالعادة ، عن "الفردة" الأخرى تحت السرير .. ذهب إلى الحمام ليقضي حاجته ثم يغتسل .. عاد إلى الغرفة وهو يرفع سرواله المنزلق من فوق كِرشهِ  . و قف أمام المرآة محاولاً شَدْ عضلات بطنه ليبدو كرشه أقل حجماً .. ثم رَبِّتَ عليه بكف يده و كأنه يُرَبِّتَ على أحد أبنائه ، قائلاً له  "كنت فين من عشرين سنة"  .. أكمل إرتداء ملابسه .. و قبل  أن يخرج من باب الشقة .. كان قد أشعل سيجارة ليبدأ بها يومه الذي لا يعلم ماذا يُخبئ له .. 





التعليق والتصويت على الموضوع في الموقع الرئيسي


اخر الافلام

.. أنغام بتغني على المسرح بنفس جودة الأستوديو.. شاهد تفاصيل حفل

.. عادل إمام 60 سنة فن..الفنانة لبلبة:مافيش فنان زيه..وكان مهمو



.. مهرجان كان السينمائي: حضور ياباني واسباني وأمريكي في أفلام م

.. تجهيزات ولا أروع لديكور العرض المسرحي -فرايداي-.. المخرج الم



.. أغنية الحب الحب من أبطال مسرحية فرايداي هتخطف قلبك ??