الحوار المتمدن - موبايل
الموقع الرئيسي


ع جناح الطير الشادي(قصيدة غنائية باللهجة اللبنانية المحكية)

لبنى شرارة بزي

2019 / 2 / 19
الادب والفن


عَ جْناح الطير الشادي(قصيدة غنائية)

١---)(ع جْناحْ الطيرْ الشّادي
رحْ ابعثلَكْ آهاتي
بَلْكِي بتاخذها هالرّيح
بتخفّف عنّي التِجْريح)
الرّيح لْ من عندك جاية
وبْصوتا أحلى حكاية
رحْ دفّيها بدَيّاتي
زِيدْ عليها همسَاتي
وإبعثْلَكْ معْها مِرسَالْ
يحكِيلَك عن سرّ القلب
يشكيلك شو عِمل الحبّ
بقلبي وروحي وبْذاتي
******************
٢---)(ع جناح الطير الشادي
رح ابعثلك آهاتي
بلكي بتاخذها هالريح
بتخفّف عنّي التجريح)
يا طير لْ طاير بالجو
مرِقْلك من صوبو مرْقة
احكيلو كيف حالي اليوم
ذابوا عيوني من الفرقة
دمعاتي لْ كانوا بالأمس
خبيهن بين كْفُوفِي
صاروا دمعاتي شلال
يِجري عَ خْدودِي بْ حَرقة
************
٣---)(ع جناح الطير الشادي
رح ابعثلك آهاتي
بلكي بتاخذها هالريح
بتخفّف عنّي التجريح)
طَير الِي مْسابق هالغيم
بالله تِرسملو صورة
قلبي لْ عمْ يكتب أشعار
داير بِ ها لْمَعْمورَة
يِسْرُق أنغامْ والحانْ
يغنّي للعشق غْنَانِي
ولما يطلّ الفجر بضوّ
يمحي العتمة ويمحي النَوّ
بتشرُق بسمة من عيونو
ع جبين الشمس تلالي
*********

٤---)(ع جناح الطير الشادي
رح ابعثلك آهاتي
بلكي بتاخذها هالريح
بتخفّف عنّي التجريح)
يا غايم لْ حامل غيثكْ
إمرقْ من صوبو شويّة
خبي هالشمس بظلّك
تا يغفى ب هالفيّة
وخبّر نسمات الحارة
منك بَسْ بإشارة
تِتْرأَفْ بِمحبوبي
لْ بعدو ضيّعت دروبي
**********

٥---)(ع جناح الطير الشادي
رح ابعثلك آهاتي
بلكي بتاخذها هالريح
بتخفّف عنّي التجريح)
محبوبي مْفَارق داري
مْحَوّل ليلي لنهاري
روحي سارقها مني
دخلك عنو طمنّي
تَ يحسّ القلبْ بأمان
وتبطّل عينِي تِبكِي
تِرجَعْلِي هاك الأيام
تِرسُم بِعيونِي الضِّحكة





التعليق والتصويت على الموضوع في الموقع الرئيسي


اخر الافلام

.. بل: برامج تعليم اللغة الإنكليزية موجودة بدول شمال أفريقيا


.. أغنية خاصة من ثلاثي البهجة الفنانة فاطمة محمد علي وبناتها لـ



.. اللعبة قلبت بسلطنة بين الأم وبناتها.. شوية طَرَب???? مع ثلاث

.. لعبة مليانة ضحك وبهجة وغنا مع ثلاثي البهجة الفنانة فاطمة محم



.. الفنانة فاطمة محمد علي ممثلة موهوبة بدرجة امتياز.. تعالوا نع