الحوار المتمدن - موبايل
الموقع الرئيسي


اليوصف العسل مو مثل اليضوكه

عباس طريم
كاتب - وشاعر
(Abbas Trim)

2019 / 5 / 26
الادب والفن


اليوصف العسل مو مثل اليضوكه
__________________
عباس طريم
__
اليوصف العسل , مو مثل اليضوكه
وليدور الحجي يشريه من
سوكه
+
ودروب الغرييبه , وما سلكهه انسان
مومثل الدروب الحيل
مسلوكه

+
والنخل العزيز , البي ثمر للناس
امبين من بعيد , امدندله
اعثوكه
+
والسلعه اليبيعوهه ابفلس بالسوك
ما تقبل نقاش , السلعه
مبيوكه
+
والحمار اليطب اوياكل الزرعات
الذنب مو بيه , لا بويه
باليسوكه
+
الشجر من يذبل , وكل ثمر ما يطيك
دور عالسبب ,تلكاه
بعروكه
+
واليحبك صدك , ينعرف من ملكاه
من سيماء وجهه ولهفته
وشوكه
+
الجايب شوك , حته ايبزك ابمكفاك
لياحد كلي تبقه اتشلع
ابشوكه
+
عدو هذه , ومكانه ابخانت الشمات
وبالنسبه الك اوراقه
محروكه
+
الحياة اتغيرت , والناس موش الناس
وحته الكاع , جانت كاع
مبروكه
+
شوكت شعب العراق , ايشوف راحة بال
ويشيل الحمل والضيج من
فوكه
+
يصيح اويستريح , ابن البلد هاليوم
ومن يصرخ , صرخته ابحلكه
مخنوكه
+
الحكومه ابوادي , والشعب الفقير ابواد
والافلام متهندسه
ومسبوكه
+
عليمن نعتب , وجلمة لصوص , الزوك
بكصة كل حرامي اوعفن
ملزوكه
+
بصراحه , ما يحك نعتب عله الكرعان
التالي اعمارهم لبسو
الباروكه
+
جان الواحد انعرفه , فقر وافلاس
والجواه كله انعرفه
والفوكه
+
وابطانة اجيوبه , امصفره المسكين
وبالدفعات جان ايدبر
اريوكه
+
وانعاله , اليلبسه ايصيبه داء الفيل
والدشداشه من الذيل
مشكوكه
+
جا هاي القصور , اليمتلكهه امنين
وكل هاي الملاك , ايصير
مبيوكه ؟
+
حته الكاع ما سلمت , اخذهه ازناد
ومن انكله ليش ؟ ايكول
متروكه
+
وحك الشعب ضاع , اهل اللفط باكوه
بعد ياهو اليجيه , ويطلع
احكوكه
+
عراق وللاسف , كلما نزوره انشوف
دنياه بس معارك نار
معلوكه
+
فلشوه النشامه , ابمعول اوجاكوك
ما سلمت بديهم ولا
طابوكه
+
والحصه اللي جانت , عامره بكل خير
هسه العدس بس
ومحد ايضوكه
+
حرامية كبل , عدهم خلق وانصاف
ايبوك امن الغني ويحلل
البوكه
+
وينطون الفقير , وعنده كومه اعيال
ومن مال الغني ايسدون
الحلوكه
+
شيسوي العراقي , ايدك عله الابواب
والابواب ماتنفتح
مغلوكه
+
هذه الحال .. ناس من الفقر والعوز
تشكي , وناس مشغولين
بالهوكه
+
بالذ العيش ناس , اللحم والتشريب
وناس اعله الخبيزه , وبيضه
مسلوكه
+
بلد صار الفقير المنسحك , جواه
واللص الحرامي المرتشي
فوكه





التعليق والتصويت على الموضوع في الموقع الرئيسي


اخر الافلام

.. نور خالد النبوي يساند والده في العرض الخاص لفيلم ا?هل الكهف


.. خالد النبوي وصبري فواز وهاجر أحمد وأبطال فيلم أهل الكهف يحتف



.. بالقمامة والموسيقى.. حرب نفسية تشتعل بين الكوريتين!| #منصات


.. رئاسة شؤون الحرمين: ترجمة خطبة عرفة إلى 20 لغة لاستهداف الوص



.. عبد الرحمن الشمري.. استدعاء الشاعر السعودي بعد تصريحات اعتبر