الحوار المتمدن - موبايل
الموقع الرئيسي


صورة للذكرى

حمدى عبد العزيز

2019 / 6 / 17
سيرة ذاتية


أنا باحب عبد الناصر
بس مش اكتر من الراجل ده

الراجل ده
مات راجل ..

مات شهيد ..
اتقتل تحت آثار التعذيب في سجن الواحات في 15 يونيو 1960 ..

الراجل ده
ماكانش مسلح غير بفكره الإنساني التقدمي وبرأيه الحر ، وإيمانه بقضايا عمال وفلاحين شعبه ، وبمستقبل بلده ..

ماكانش - كمفكر ومثقف وطني تقدمي يساري - يملك غير قلمه وكلمته
وهيه دي كل مضبوطاته ..

الراجل ده
مات وهوه واقف قدام جلاده
اللي قاله قدام رفاقه المعتقلين معاه :

- قول أنا مره

(وأنا مره هنا .. مش معناها إعلن عن تغيير النوع الجنسي .. لأ دي معناها وقتها يعني تراجع عن كل افكارك وتخلي عن مبادئك ، وعن استحقاقك لمعني الرجوله اللي هيه برضه معناها مش الذكوره وانما الشجاعه والجساره وتحمل المسئولية ، وقول أنا نادمان وكل اللي عملته واللي بافكر فيه غلط)

وبالمناسبه
أنا مش باقول كلام كتب وخلاص ، دا كلام عرفته وسمعته بودني من ناس شهدت واقعة استشهاده

كان ليه استاذ وصاحب وزميل ورفيق عمر اسمه (فؤاد العتال) ، هوه كمان عاش مناضل ومات مناضل ، والراجل ده هوه اللي دخلني العمل السياسي الحزبي

فؤاد العتال ده كان وقت الإعتقال الواسع لقوي اليسار المصري (1959) شاب لسه مخلص الثانويه العامه ، وكان لسه منضم يدوب من أيام أو شهور لأحد تشكيلات تنظيم(حدتو) في الأسكندرية واعتقل معاه ، وحضر واقعة تعذيبه وقتله في يونيو 1960 ، لأنها كانت حفلة تعذيب جماعيه له ، وللي معاه ذي حفلات التعذيب الجماعية اللي صورها المرحوم عاطف الطيب في فيلمه (البرئ) اللي لعب بطولته احمد ذكي ومحمود عبد العزيز وإلهام شاهين وصلاح قابيل وجميل راتب وإلهام شاهين وممدوح عبد العليم ..

علي فكره اللي كان بيحصل في فيلم البرئ هو نفسه اللي كان بيحصل في معتقل الواحات مع اليساريين (اللي مفروض إنهم حلفاء طبيعيين لأي نظام تحرر وطني مش معتقلين بالشكل ده) ..

، و "حدتو" للي مايعرفش هيه اختصار ل(الحركة الديمقراطية للتحرر الوطني) يعني كان وقتها الشهيد شهدي عطيه الشافعي اللي بنتكلم عنه ده أحد قيادات (حدتو) التاريخية ، وبالتالي قيادة (فؤاد العتال) اللي عرفته وعاشرته وزاملته من آخر السبعينيات لغاية وفاته في النص الأولاني من التسعينيات ..

المرحوم فؤاد كان عنده آثار ضربة شومه في دماغه (كان دايماً يورهالي) والجرح ده كانت ضربة شومه وقعت علي راسه يومها في حفلة الضرب والتعذيب اللي راح ضحيتها شهدي عطيه الشافعي ..

السجانين المجرمين كانوا عاوزين يكسروه قدام زمايله اللي ذيه واللي معاه ف السجن ..

الشهيد
اتحدي جلادينه ، ومارضاش يقولها
ضربوه لغاية مامات ..
ومات من غير مايقولها ..

والجلادين ماتوا
من غير مايسمعهوها حتي من أي واحد من زمايله اللي كانوا معاه واللي ذيه مانكسرتش إرادتهم بالضرب والتعذيب ..

الراجل ده
شهدي عطيه الشافعي شهيد الحركة الوطنية المصريه ..





التعليق والتصويت على الموضوع في الموقع الرئيسي


اخر الافلام

.. طلاب إسرائيليون يهاجمون داعمين لفلسطين بالألعاب النارية في ج

.. -قرار بايدن- يغضب إسرائيل.. مفاوضات الرهائن في خطر




.. هل الميناء العائم للمساعدات الإنسانية سيسكت جوع سكان غزة؟


.. اتحاد القبائل العربية في سيناء برئاسة العرجاني يثير جدلاً في



.. مراسل الجزيرة: استشهاد ثمانية فلسطينيين نصفهم أطفال في قصف ع