الحوار المتمدن - موبايل
الموقع الرئيسي


الموتى السائرون... مسلسل لا نهاية له

ميلاد سليمان

2019 / 11 / 10
الادب والفن


عارف انت لما تكون في علاقة حب وكل شوية تواجهكم مشاكل ومطبات بتديك إشارة ان العلاقة قربت تنتهي، ومع ذلك انت مستمر فيها، وعمّال تلتمس الاعذار وتقول يمكن الأمور تتحسن، يمكن هرمونات اختلاف الفصول... دا كان احساسي مع الحلقة الأخيرة من الموسم الثامن من مسلسل "الموتى السائرون" The walking dead. في البداية كنت واحد من المخلصين المحافظين على تتابع الحلقات من الموسم الأول مع حضرة الظابط "ريك غرامز" ومعركته المصيرية في البحث عن الاحياء والمحافظة على حياته وحياة من معه، هو وزوجته وإبنه وصديقه اللي هيخونه مع زوجته، مع تقدم الحلقات عشان الحبكة تدخل في منحنيات شاعرية نفسية اكتر، ما هو احنا بردو مش هنفضل كل الحلقات بنموت في الزومبي وخلاص. شوي شوي وقدرنا نطوّع الموتى "الزومبي" ونقضي عليهم باسهل وابسط الطرق، لدرجة ان "ميشون" قدرت تخلي عندها عبيد زومبي بيخدموها وبيشلوا لها المعدات بتاعتها.
ولكن مع الموسم الرابع والخامس، معادتش المعركة ما بين الأحياء والموتى، ولكن انتقلت لصراع بقاء ما بين الأحياء والأحياء في زمن الندرة والقحط، واللي ممكن انسان يقتل انسان عشان ثمرة فاكهة او سيجارة، ومن معارك فردية إلى معارك مع مليشيات، بنوصل للموسم السادس والسابع، وأقوى موسمين تقريبًا، وهو صراع جماعة "ريك غرامز" مع جيش مُنظم قوي "الناجون" بقيادة بهيّ الطلعة القائد "نيغان" اللي بيملك قوات نظامية تم تدريبها على القتال ومعاه سلاح ناري وحالف يُخضع أي حد في أي حته لسلطته، بنخلص من المعركة المصيرية الحتمية اللي بتنتهي في الموسم والثامن ولكن ليس بموت "نيغان" بل بأسره وحبسه لأن الطيبيين مش بيحبوا يعوصوا إيديهم دم، بالتالي هيبقى أسير عشان نفرّج عليه المجتمع الجديد، باعتباره السفاح اللي كان هيقضي على الحضارة اللي بتتكون وبتتولد بالتدريج.
الموسم التاسع ككل، هو خلاصة من الملل والمطاردات والتطويل والمط، وأحداث تخلص في حلقة تفاجيء انها بقيت في 3 حلقات!!، مش بس كداا، الموسم كان استعراضي اكتر من اللازم، ويبدوا ان المخرج الخاص بالمسلسل حب يواكب الاحداث والحركات السياسية واليسارية في العالم، فجمع كل ما هو ما بعد حداثي في الموسم دا، بقى عندنا رجالة بتحب بعض وتنام مع بعض، وستات نفس الشيء، وعندنا طبيب هندي، وعندنا مسلمة محجبة، وعندنا أمريكي اتجوز افريقية وخلف منها كمان، بقينا مجتمع بلا هوية فيه عولمة وإذابة لكل خصوصية فكرية وثقافية. وطبعًا المعارك شبه اختفت، والصراع انعدم، و"نيغان" في السجن، ورجالته بتتمرد بالتدريج لأن من الصعب احتواءهم في المجتمع الجديد، والتقسيم للناس "ألفا " و "بيتا" ومن يستحق النجاة والحياة، ومن لا يستحق، و "ريك" اختفى في الهليوكوبتر اللي ظهرت من العدم وذهبت للعدم، ولم يظهر بعد ذلك، وظن الجميع إنه مات في انفجار الجسر.
وبنوصل حاليًا، للموسم العاشر، والمرة دي بقى عندنا بشر زومبي "الهامسون" بيسخلوا جلد الزومبي ويرتدوه كقناع على الوجه، عشان يقدروا يحركوا قطعان الزومبي لأي مكان لمهاجمته والاستيلاء على خيراته... و"نيغان" هرب من السجن، وراح انضم لهم، وفي انتظار ما يستجد من احداث...





التعليق والتصويت على الموضوع في الموقع الرئيسي


اخر الافلام

.. فيلم #رفعت_عيني_للسما مش الهدف منه فيلم هو تحقيق لحلم? إحساس

.. الفيلم ده وصل أهم رسالة في الدنيا? رأي منى الشاذلي لأبطال في



.. في عيدها الـ 90 .. قصة أول يوم في تاريخ الإذاعة المصرية ب

.. أم ماجدة زغروطتها رنت في الاستوديو?? أهالي أبطال فيلم #رفعت_



.. هي دي ناس الصعيد ???? تحية كبيرة خاصة من منى الشاذلي لصناع ف