الحوار المتمدن - موبايل
الموقع الرئيسي


اتجوزها تتخلف له ولد

زاهد عزت حرش
(Zahed Ezzt Harash)

2021 / 5 / 1
الادب والفن


زاهد عزَّت حرش
هيك حال الدنيا والعباد، وما زينة الدنيا إلا المال والبنون. وصاحبنا ابو انوّار تجوز من عشر سنين، وصار عنده شلّعت بنات، وانفطر قلبه تيجيه ولد صبي يحمل اسمه، لا خلى طب ولا دوا.. ولا بصاره ولا براجه ولا فتاحة مندل، إلا وأخذ مرته لعندها، حتى يلاقي طريقه تمرته تحبل وتخلف له ولد يحمل اسمه.. ما كان يبخل لا بالمال ولا بالهدايا.. وما في نتيجة! وصاروا يقولوا له تجوز عليها! بس ابو انوّار زلمه بخاف الله، وما كانت تهوّن عليه العشرة، ومرته آدمية وبنت ناس، كيف هيك يعني، يوخذها لحمه ويرميها عظمه! وقديش حاولوا يقنعوا يتجوز مره ثانية، ما كان يقبل! وقال: رح اظل أحاول، واذا الله ما بريد يطعمني صبي بكون هذا نصيبي.
وبيوم من الأيام كان قاعد بقهوة عزيز السرياني، قدامه فنجان قهوة.. وراسه بين ايديه وزعلان قدر الله!! وكأنه كل هموم الدنيا فوق راسه! شافه واحد ختيار من القاعدين بالقهوة، وهذا الختيار بيكون من اصحاب ابوه لأبو انوّار.. قام من محله، واقترب من ابو أنوّار وسحب الكرس اللي قباله وقعد عليها! انتبه ابو أنوّار انه في حدا قعد قباله على طاولته، رفع راسه من بين ايديه، شوي شوي!.. تفاجأ لمن شاف ابو الجليل قدامه.. حاول يوقف احترام لأبو الجليل وعشان يسلم عليه.. حط ابو الجليل ايده على كتف ابن صاحبه وقال له:
- اقعد عمي اقعد.. شفتك من بعيد على هالحاله قلت تاجي اشوف شو صاير معك!
- اهلين عمي ابو الجليل.. والله يا عمي ابو الجليل انا بعزّك على ريحة الوالد، ومكانتك محفوظة.. بس شو بدي احكي، خليها بالقلب تجرح ولا تطلع لبرا وتفضح!
- يا ابن الحلال، بتقول اني بمعزة الوالد الله يرحمه! واذا ما حكيت اللي أنا لمين فيك تحكي؟ عمي، احكي لي هَمَك، بلكي الله بساعدني وبلاقي لك حَلّ، مش بقوله الله بوضع سِرُه بأضعف خلقه!! احكي عمي احكي وفش قلبك، على القليله يمكن ترتاح!
- يا عمي ابو الجليل، قصتي واضحة مثل الشمس، صار عندي كومة بنات، ونفسي بصبي يحمل اسمي، والمخلوقة اللي عنده فضلها على راسي، وصار اللي معي واللي عليّ يقول لي طلقها او اتجوز عليها! وانا مش ممكن اشرب من البير وارمي فيه حجر، والحرمه بنت ناس أوادم، ومش طالع معي ارميها آخر هالزمن!
- انت اصيل يا ابن اخوي، وما بطلع منك غير العمل الطيب. على كل حال اتكل على الله واسمع كلامي واعمل شو بقول لك، وبإذن الله بصير عندك صبي!!
فرفح قلب ابو انوّار، وبحلق بأبو الجليل، مش مصدق شو عم بِسمع وقاله:
- عمي داخل على الله وعليك، يعني في أمل؟ ما انتي عارف، ما خليت طريقه وما جربتها ودُق المي وهي ميّ!
- استهدي بالله يا عمي واسمع شو رح اقولك، لا حياء في الدين والعلم يا ابني!
- والنعم بالله عمي ابو الجليل، يعني انتي فيك تساعدني؟
- اتوكل على الله واعمل شو بقول لك
- اتفضل، انا قدامك للبحر، وانشا لله اقدر اكافيك
- اصبر يا عمي ولا تقول فول حتى يصير بالعدول
- على راسي وعيني.. شو وصيّتك احكي لي
- بتعرفني بحب قراءة الكتب، وقريت شغلة وصرت مجربها مع اكثر من عيلة.. في كتاب "اطفال تحت الطلب" لواحد من دار القباني، هو حكيم وكتب أكثر من كتاب عن الحياة الزوجية!
- الله يهديك اهديني على الطريق بلكي بيكون الخير على يدك
- اسمع، الحرمه عندها العادة الشهرية، مظبوط؟
- اكيد مظبوط عمي ابو الجليل، وبعدين
- واجمالاً بتكون ما بين ثماني وعشرين يوم، او اقل او اكثر.. ولما بتجيها بتستمر حوالي اربع تيام.. يعني هيك شي على الأغلب
- مظبوط..
- عليك أنك تسجل اليوم اللي بنص الفتره اللي بتيجيها.. يعني بتعد اربعتعشر يوم.. يعني نص فترة الحيض
- طيب
- وما بين يومين قبل ويومين بعد، بتراقب درجة حرارة جسمها، لأنو بهذه الفترة بترفع حرارة الحرمة أكثر شوي من المعدل الطبيعي، وبصير معها شعور غير عادي، بهذه الفترة بتكون الحرمة عندها بويضه مخصبة! فاهم عليّ؟
- يعني تقريبًا.. بس انا شو ممكن أعمل مش فاهم؟
- طول بالك.. المهم تحفظ التفاصيل عشان يكون الإشي مضمون
- انتِ كمل كلامك، وبس تخلص برجع بعيد عليك شو فهمت، واذا الأمر احتاج بكتبهن على ورقة.
- ماشي، وين صرنا.. صرنا عند نص فترة الحيض، بهذول الايام الأربعة، يعني يومين قبل ويومين بعد، بتكون الحرمة بحالة تفقيس بويضه مخصبة، هون بيجي دورك بتتوكل على الله وبتعمل واجبك، بس قبلها بأكم يوم بتوكل أكل مغذي عشان يساهم بالنتيجة!
- طيب كيف ممكن نضمن انه تكون النتيجه صبي؟
- زرع الرجل بيكون نوعين، نوع انثوي ونوع ذكري، النوع الأنثوي عمره أطول من عمر الذكري.. واذا ما كان عند الحرمه بويضه مخصبة بوقتها، الزرع الانثوي عمره أطول، حتى لو امتدت الفتره لكثر من يومين ممكن يوصل ويتم الحمل، اما الزرع الذكري فهو اسرع بكثير من الأنثوي، واذا كان في عند الحرمة بويضه مخصبة.. بوصل قبل ما يوصل الزرع الأنثوي، وهيك بتم الحمل بجنين صبي. وهذه الشغله صُرت معلمها لأكثر من واحد، واللي عرف كيف يتصرف، الله رزقه صبي!
- يا ريت يا عمي ابو الجليل.. والله ان صار عندي صبي لأسميه على اسمك!
- طول بالك، تايجي الصبي منصلي عالنبي
- طيب .. رح اسجل اللي قلت لي عليه، واتكل على الله وعليك.
- ماشي .. ونشا لله بصير خير
راحت الأيام ودارت دورتها.. وابو انوّار حفظ الدرس على الاصول. عمل مثل ما قال له عمه ابو الجليل، وكل الوقت قلبه على نار تيعرف شو النتيجه.. وبعد شي عشر شهور من يوم ما التقى بالعم ابو الجليل.. حرمته خلفت له صبيّ.. ويا فرحتك يا ابو انوّار.. كانت وسع الكون واكثر، وبعد ما اطمئن على حرمته وابنه!! ترك المستشفى مثل المجنون، وركب سيارته، ودوس دغري على البلد لعند ابو الجليل.. وصل قدام دار ابو الجليل وصار يزمر وينادي..
- يا عمي ابو الجليل.. يا عمي ابو الجليل / والدمعه تفر من عينه وقلبه يرقص من الفرح
طلع ابو الجليل من باب الدار.. كانت الدنيا غياب (غروب) يا دوب يقشع مين اللي بنادي، وضوء السياره بعينيه، بس من الصوت عرف مين اللي بنادي!!
- هلا عمي هلا .. تفظل اهلا وسهلا قرب فوت
اسرع ابو انوّار وقرب من ابو الجليل..
- مسا الخير عمي، الله يعطيك تيرظيك، اعطيني ايدك تأبوسها
- العوذ بالله عمي .. خير شو صاير/ وسحب ايده ابو الجليل حتى ابو انوّار ما يبوسها
- الله جابها على ايدك وصار عندي صبي...
- الف مبروك، يجعله من اهل الحياة.. مش قلت الك الله كبير!
- دخل اسمه الله.. بس وحياتك ما صار نصيب الا من بعد ما عملّت مثل ما قلت اللي!
- مبروك عمي مبروك انشا لله الله بسعدك وبسعد ايامه وايامك بالخير...
- عمي ابو الجليل، من بعد اذنك بدي اسمي ابني على اسمك!
تبسم ابو الجليل بسمة محبة، وضم ابو انوّار لصدره وطبطب على ظهره وقال له:
- يكثر خيرك عمي، بس اسمح لي، اسمي ما بعطيه الا لحفيدي، بعدين كل الناس بعرفوك ابو انوّار.. والاصول تسمي ابنك نور، لأنه الله اكرمك ونور عليك.. اسمع مني اسم نور بنور حياتك انشا لله...
- انا تحت امرك عمي ابو الجليل، ومش ممكن اعمل الا حسب مشورتك.. الله يكثر خيرك ويعطيك شو بتتمنى
روّح ابو النور على اهله بعد ما اشترى بقلاوة وحلاويات مشكله حلوان الصبي.. وبعد كم يوم لما حرمته رجعت مع الصبي على البيت، قال ابو نور .. اسا صار واجب نروح نوخذ للعم ابو الجليل الحلوان، ونوفي النذر اللي علينا، اشترى صدر كنافة شامية وحمله وراح لعند ابو الجليل..
- مرحبا عمي ابو الجليل.. مبروك ما اجاني، والمباركه والحلوان الأول والأخير الك عمي!
- مبروك عمي ابو نور.. الف مبروك اتفضل...
- عمي ابو الجليل بدي اقول لك سر ما حدا بعرفه لليوم!
- يا ساتر .. شو هالسر يا عمي
- نذرت نذر انه اذا الله بطعمني صبي اعمده عن اخوانا المسيحيين.. وخايف اذا ما وفيت بالنذر الصبي يصير عليه اشي!!
- اسمع عمي.. الدين لله، وكل الديانات بتعبد رب واحد، واذا انت نذرت نذر لازم توفيه.. وانا معك، وانا بحكي مع الخوري طنوس وبرتب معاه موعد للعماد، وانشا لله ما بيصير الا الخير.. وتعملش حساب لحكي الناس.. لأن الله عالم ما في القلوب. امرق عليّ الجمعة اللي جاي بيكون كل شي جاهز.
بعد اسبوع تمت عمادة نور على يد الخوري طنوس ببيت ابو الجليل.. ولبَسّوا الصبي ثياب بيضا وصوروه هوي وحامله ابو الجليل، لأنه ابو الجليل كان الشبين (العراب)، وابو نور وزع الحلوان على كل الحضور.
ومثل ما الله طعم ابو نور صبي يطعَم جميع العايزين.

24.04.2021





التعليق والتصويت على الموضوع في الموقع الرئيسي


اخر الافلام

.. -بيروت اند بيوند- : مشروع تجاوز حدود لبنان في دعم الموسيقى ا

.. صباح العربية | الفنان السعودي سعود أحمد يكشف سر حبه للراحل ط



.. فيلم تسجيلي عن مجمع هاير مصر للصناعات الإلكترونية


.. جبهة الخلاص الوطني تصف الانتخابات الرئاسية بالمسرحية في تونس



.. عام على رحيل مصطفى درويش.. آخر ما قاله الفنان الراحل