الحوار المتمدن - موبايل
الموقع الرئيسي


برنامج انتخابي

إبراهيم رمزي

2021 / 8 / 21
كتابات ساخرة


نفتح حوارا مع مرشح للمجلس ... ، لمعرفة آفاق برنامجه الانتخابي لتدبير الشأن السياسي.
ـ ف لأول تنشكركم عل الاستضافة، وإنما هو الانتخابات واجب وطني، وكلشي خاصو يشارك .. ويصوت عليّ .. واحنا جايين باش ندبرو على روسنا .. قلت: الشأن السياسي؟ علاه الحاجة اللي ما ليها شان، لاش تليق؟
ـ غاديين نسولوك على بعض النقاط اللي المرشحين ف الانتخابات تيتكلمو عليها .. كل واحد بطريقتو .. والسؤال الأول غادي يكون حول التنمية ..
ـ (مقاطعا) .. أعوذ بالله .. النميمة حرام وحتى واحد ما يبغيها ..
ـ التنمية ما شي النميمة !!!
ـ كيف كيف .. شوف آ وليدي .. إلى أنا تندير التنمية، وانت مخرج عينيك فيا .. ما شي نميمة هاذيك؟ راه داخل الانتخابات باش ننمّي ذاك الشي "اللي تحت يديا" باش يزيد يكبر.
ـ والبيئة، آش رأيك فيها؟
ـ هذ الموضوع مهم وخاصو السوايع باش نهدروا فيه ..
ـ مثلا: التصحر؟
ـ هذاك وقتو محدود ف رمضان .. وما تيخوفناش..
ـ التلوث الهوائي؟
ـ هذاك نازل من السما .. كون العباد مقادين مع روسهم ما ينزّلش عليهم الله التلوت .. واش غاديين نديروا ماكنات باش نصفّيوْا الهوا ..
ـ التغير المناخي، والاحتنباس الحراري؟
ـ خلق الله البرد والشتا، وخلق الصيف والحرارة، .. ومللي تتنزل الشتا على قدر النفع تنفرحو .. وإلى نقصات تنصيلو صلاة الاستسقا .. وإلى جا الصيف مزيان تنديروا لعراسات والمواسم، وتيكونو الشيخات والتبوريدا .. حْنا ما تنحبْسوا حدّ ع لفراجا ..
ـ وحقوق الطفل، آش رأيك فيها؟
ـ تْهَلّا فيه مْ حَدّوا صغير .. مللي يكبر شويا .. زيّْدوا يسْرح ..
ـ والمدرسة؟
ـ طفروه هاذو اللي قاريين .. تيقلبوا على الزرواطة ديما .. اللهم من صغرو اعطيه زريويطة يقابل بها البهايم ..
ـ وحقوق المرأة؟
ـ العرا والجوع باش ما ضّسَرْش؟
ـ هذ الشي اللي تتقول على الطفل والمرأة .. راه مخالف لمدونة الأسرة .. وخاصك تتحاسب عليه.
ـ باقي ما شدينا والو، وباغيين تبداو معنا ف الحساب .. إلى بغيتو تْهنِّيوْا روسكم وتهينونا، ميْكو على حقوقهم، والسلام.
ـ وما رأيك في فك العزلة عن العالم القروي؟
ـ هذاك الشي عندو مواليه اللي قادّين بيه.
ـ بحال آش؟
ـ كاين اللي عندو ترانزيت .. كاين اللي عندو بِّيكوب .. كاين اللي عندو الكاميو .. وكلهم تيفكوا العزلة عن العالم القروي ..
ـ ولكن خاص إنشاء الطرق .. واش وصلت عندكم شي طريق مزفتة ؟
ـ القبيلة كلها زفت !!!
ـ ماذا عن ثقب الأوزون
ـ انت فين عايش آ صاحبي؟ .. الدرهم هو العملة ديالنا، والموزونا ما بقاتش، واللي كان مثقوب هو الگرش ولا الصولدي ..
ـ وتقوية البنية التحتية؟ ..
ـ واا .. عواجْ ليكم الحساب .. علاه هاذي مْيات سنة باش كانوا الناس عايشين؟ وكيفاش كانوا عايشين؟ كلكم دابا بغيتو المنتخَبين يديروا للناس كل شي، ..
ـ في النهاية: ما هو انطباعك الأخير؟
ـ راكم تْلفْتوا وما بقى عندكم شغل، غير حاضيين المنتخَب وتتحنززوا فيه، وما خليتوه يدير حتى شي حاجة لراسو ..

إبراهيم رمزي ـ في: 26/06/2021





التعليق والتصويت على الموضوع في الموقع الرئيسي


اخر الافلام

.. ياحلاوة شعرها تسلم عيون اللي خطب?? يا أبو اللبايش ياقصب من ف

.. الإسكندرانية ييجو هنا?? فرقة فلكلوريتا غنوا لعروسة البحر??




.. عيني اه يا عيني علي اه?? فرقة فلكلوريتا مع منى الشاذلي


.. أحمد فهمي يروج لفيلم -عصـ ابة المكس- بفيديو كوميدي مع أوس أو



.. كل يوم - حوار خاص مع الفنانة -دينا فؤاد- مع خالد أبو بكر بعد