الحوار المتمدن - موبايل
الموقع الرئيسي


العمق الإنفشاخي في علوم اللغة العربية

أيمن غالي

2021 / 12 / 3
كتابات ساخرة


مشكلة اللغويين العرب في تناولهم للنصوص العربية؛ إفتراضهم إن كل كلمات أي نص عربي من أصول عربية .. عندهم رفض تام وعناد عجيب إنه ممكن يلاقي في النصوص كلمات من أصول مختلفة ( ارسية، عبرية، سريانية، .. وغيرها)؛ مع إغفال الحقيقة العلمية إن 85% من كلمات معجم إبن منظور - لسان العرب - كلمات آرامية وباقي الكلمات من أصول مختلفة (حسب د. لهجت القبيصي، أستاذ اللغويات، جامعة دمشق) ..
أوم إيه؛ لما يلاقي كلمتين لهم نفس المعنى من ثقافتين مختلفتين؛ يقول لك الكلمة دي فيها عمق فنكوشي يعبر عن إنفشاخ في الهنتشة؛ أما الكلمة التانية فكمية الإنفشاخ الهنتشاوي أقل بسبب إختلاف العمق الفنكوشي .. وياخدك فوق وتحت، ويمين شمال؛ لغاية ما تدوخ وتقع منه، وتقول له آمين علشان يرحمك من الإسترسال ..
يعني مثلا لو أخدنا مرادف كلمة ereaser الإنجليزية؛ من اللهجة الإسكندراني "جومة gomma"؛ حا نلاقي لها في كل محافظة من محافظات مصر مرادفات مختلف؛ أستيكة، محّاية، مسّاحة، وهكذا وممكن نلاقي كلمتين منهم بيستعملوا في إسكندرية (جومة وأستيكة) ..
طبيعي لو أنا إنسان طبيعي؛ حا أقول إن جومة gomma أصلها إيطالي وأستيكة أصلها إنجليزي من Elastic، ومسّاحة ومحّاية من أصل عربي من الجذور مسح، ومَحي ..
لكن لو كنت لغوي من اللغويين العرب إياهم؛ حا أفتكس افتكاسات عمري وحا ألف وأدور، وحا أثبت إن الكلمات الأربعة اصولهم عربية وإن كل كلمة لها عمق إنفشاخي مختلف، وإن الجومة؛ يتقال عليها جومة لو بتستعملها بإيدك الشمال ومسّاحة لو بتستعملها بإيدك اليمين، ومحّاية لو بتمسح بيها كتابة بالعربي وأستيكة لو بتمسح بيها كتابات أجنبية ..
المهم- لو عاوز تشتغل في الدراسات اللغوية العربية - ضروري تهتم بالعمق الإنفشاخي في أي دراسات لغوية عرببة، وتلعب ألعاب قوي، وتدريبات للياقة البدنية؛ علشان تعرف تلف وتدور وتلف وتدور وتدور وتلف وتلف وتلف وتلف لغاية ما المتلقي يتهنتش منك في العمق الإنفشاخي ..





التعليق والتصويت على الموضوع في الموقع الرئيسي


اخر الافلام

.. -بيروت اند بيوند- : مشروع تجاوز حدود لبنان في دعم الموسيقى ا

.. صباح العربية | الفنان السعودي سعود أحمد يكشف سر حبه للراحل ط



.. فيلم تسجيلي عن مجمع هاير مصر للصناعات الإلكترونية


.. جبهة الخلاص الوطني تصف الانتخابات الرئاسية بالمسرحية في تونس



.. عام على رحيل مصطفى درويش.. آخر ما قاله الفنان الراحل