الحوار المتمدن - موبايل
الموقع الرئيسي


رجعنا لقصة الجواسيس

زاهد عزت حرش
(Zahed Ezzt Harash)

2006 / 9 / 1
كتابات ساخرة


هيك اشي عمبيصير مش بس عنا!!
ابتعتبر حالها إسرائيل دولة متمدنه.. شوفوا قديش متمدنه؟؟ حتى رئيسها الختيار بعده مليان شباب وحيوية, وطالع عليه اشاعه انه بلاحق البنات!! هو صحيح بهاي الايام صارت موضه.. وعندك كمان في عضو كنيست حليوه, مكيف على شبوبيته اسمه رامون.. علقان بهيك ورطه!! القصة انه عنا كمان بيصير هيك واقطع.. بس غلب وسترا ولا غلب وفضيحه!! على قولة المثل. يعني زي اللي قال فوق القرق صميله.. بكفيهاش انه اعتداء؟ كمان يلحقها فضيحة!! وبعلمك بتكون البنت شريفة.. بصير الحق كله عليها لو كان شو ما كان.. مش هي بنت؟؟ خلص هي السبب! مش عارف ليش بمجتمعنا البنات بيتبهدلوا ومرات بنقتلوا.. والطرف الثاني.. يعني الرجال.. ما حدا بيسألهن؟؟ شو يعني النسوان عندهن شرف والرجال ما عندهن؟؟!! عشان هيك بيصير اللي بيصير؟!! بس مش عن هذا الموضوع بدي اكتب اليوم.. على كل حال اعتبروا انه اللي قريتوه اشي بيشبه المقدمة.. ما علينا!!

القصة وما فيها انه ما لحْقَت وقَفت الحرب.. والحقيقة ما حدا عارف اذا انتهت او بدها تعلق من اول وجديد!! في اخبار بتقول انه اسرئيل مش مرتاحة من النتيجة.. وانه عندها شعور انها اتبهدلت.. يعني هاي عنجد مصيبة.. هي عملت الحرب عشان ترجع اشي من كرامة جيشها اللي ما بينهزم!! بعد عملية الخطف اللي نفذها حزب الله.. قام طلعت النتيجة بهدلة اكبر!!

المهم انه ما لحقت وانتهت الحرب, واذ منسمع, كل يوم باخبار اسرئيل, انهم مسكوا جاسوس هون وجاسوس هناك, جواسيس كانو يساعدو حزب الله!! لاه .. شو هالحكي؟؟! بعلمنا انه المخابرات الاسرائيلية من اقوى اجهزة المخابرات بالعالم.. حتى فضيحة "بولورويد" اللي كان يشتغل بامريكا ويتجسس لصالح اسرائيل, لليوم اسرائيل بتحاول تطلعوا من سجنه باميركا, وترجعوا على اسرائيل ومش قادرين.. خذوا هاي مسطرة عن قوة مخابرات اسرائيل.. حتى على اسيادها بتتجسس!! ولو هيك خبط لزق, كل يوم صار يطلع خبر عن القاء القبض على جاسوس وداسوس ودساس!! والله يا دنيا.

هذا النوع من التشنج المخابراتي, كانوا شاطرين العرب فيه اكثر اشي.. كل ما كان يصير في هزه ولزه, من ناحية سياسية او اقتصادية, او شي فضيحه اخلاقية.. كانت الانظمة العربية تتسلح بأنها القت القبض على مجموعة من الجواسيس اللي بيعملوا لصالح اسرائيل.

مش بس هيك.. حتى انه دريد لحام.. اللي كلنا منعرفه باسم غوار الطوشة.. ذكر قصة الدواسيس.. يعني الجواسيس, بمسرحية ضيعة تشرين.. يومت ما كبشوا الاستاذ اللي رجع من الغربة.. وقال له دريد لحام شو رجعك يا استاذ.. ولك شو رجعك ياحمار؟؟!! يومتها قال المختار انه كَبَش ثلاث دواسيس تحت مخدته!! يعني عنا من هالخروب سده مليانه.! بتذكر انه ايام حافظ الاسد في سوريا.. كان في شلة شباب قاعدين يسهروا بشي قهوة بالشام.. والحكي داير بيناتهم, ومن جملة الحديث حكوا عن قصة فلسطين.. قام واحد على نياته حكى لهم, انه ابوه وعمه كانوا يشتغلوا بفلسطين ايام الانتداب.. وشافوا يهود واشتغلوا معهن!! ثاني يوم.. ع الحارك.. تم القبض على ابو الشاب وعمه.. واعلنت وكالة سانا السورية انه تم القبض على خلية جاسوسية تعمل لصالح اسرائيل!! الله اكبر.. الله اكبر.. يا هيك تكون الانظمة يا بلاش!!

طيب اذا بدنا نحكي الحقيقة.. منقول انه هذا هو طابع الدولة والانظمة الرجعية.. بتعتمد على عنصر التخويف, لتردع أي تحرك شعبي ضدها!! اما اسرائيل.. ولو.. هاي اسرائيل! اللي الكل بيحسبلها الف حساب.. وبرجع بيعد من الاول وجديد قبل أي خطوة.. وصلت مواصيلها هاي الايام, انها تطلع باخبار القبض على جواسيس ومتآمرين.. وانهن هنه اللي منعوها من تحقق أي انتصار على حزب الله؟!! لا كثير هيك!!

كانت الاخبار عن قدرة اسرائيل المخابراتية تشبه الاسطورة.. من جملة الحكي بيقولوا, انه اسرائيل بواسطة جواسيسها زرعت اللغام تحت كل الجسور اللي بالقاهرة.. عشان لمن اسرائيل تحس باي خطر, تفجر القاهرة وتقطع شراين المواصلات اللي فيها! واللي راح ع القاهرة.. وشاف قديش فيها جسور.. وقديش الجسور مهمة لاستمرار الحياة فيها.. اكيد بعرف قديش تفجير الجسور ممكن يسبب ضرر وخراب وقتل!!

مش بس هيك.. اذا بترجوا معي بالذاكرة لاكم سنة لورا.. بتتذكروا انه اكثر من مرة ذاعوا بالاخبار انه اسرائيل ابطلت محاولة انقلابية بالسعودية.. وبغيرها من الدول العربية المتأمركة.. واللي مش متأمركه كمان!!

مش عارف.. الحقيقة من ما وقفت الحرب ما عدت حضرت تلفزيون. ولا شفت ايهود يعاري. كنت حابب اسمع تحليلاته السياسية على نتائج الحرب.. والانجاز العظيم اللي حققته اسرائيل, وخاصة انها نجحت في مواجة أي عملية للقضاء على اسرائيل وشعبها. كنت حابب اسمع تعليق "المومحيم" يعني المتخصصين بالعلوم العسكرية والسياسية عن الحرب.. وخاصة عن عمليات القاء القبض على الجواسيس!! عنجد.. يا حرام اسرائيل بتشفق!! كلهن عليها!!

في شغلة يمكن.. يمكن ها.. لا تقولوا اني بجزم فيها.. يمكن ما يكون حدا انتبه الها.. هي انه من اول اسبوع بالحرب.. معدوش جابوا امنون ابرموفتش على برامجهم الاخبارية.. كنه مقبلش يحكي الحكي اللي بدهن اياه.. زي عادته! مهو ابرموفتش فضح كثير قصص.. اللي بيعرف بعرف واللي ما بيعرف بيقول كف عدس!! ولو حتى من اراء وتعليقات, اللي بتعتبرهم الصحافة الاسرائيلية انهم شخصيات صادقة ومهمة.. صارت اسرائيل تخاف!! لاه هاي من علامات القيامة!!

بتعرفوا.. عنجد مفش عدالة!! صحيح يا صاحبي ابو السعيد الشعباوي.. انه القوة هي اللي بتقرر!! يعني لو كان اسرائيل قدرت تمحي حزب الله.. كان كل اشي بتقوله اسرائيل بمشي؟؟ بس العتمة ما اجت على قد ايد الحرامة هاي المرة!! ووالله الخوف مش من اللي راح, لبخوف من اللي جاي!! يعني حاسس انه بقاء حزب الله رح يقض مضاجع الحكام والحكومات العربية.. ومش بعيد يتعاونوا هنه واميركا ويغتالوا حسن نصرالله.. وكل قيادات حزب الله عشان يتخلصوا منه!! مش القصة قصة عداوة شخصية.. لا لا .. بس لانه حالة حسن نصرالله.. او الاصدق نقول.. حالة حزب الله.. اذا استمرت رح يكون الها تأثير على الناس بالوطن العربي, من الدار البيضاء حتى توصل دار "نفط ابن الكعبة"!!

يعني اذا استمر حزب الله وبقي وصار جزء من الحياة السياسية في لبنان.. رح يكون اله تأثير على حركة التحرر العربية والعالمية. بس اللي خايف منه انه الحركات التحررية الاصولية "الاسلامية".. من اللي بتتبنى الفكر السلفي, زي بن لادن, والزرقاوي, وابو سياف, وابو قتادة.. وغيرهم وغيرهم, هذول اللي ما بيفكر بطريقة عصرية وسياسية منفتحة.. هذول اللي كل اشي عندهم مباح, واهون اشي عندهم القتل, وساعتها ما بيعود في جزائر وحده بس.. بيصير العالم العربي كله "جزائر"!!

من ناحية ثانية خوف الحكام على كراسيهن.. وخوف اسرائيل واميركا لتفلت دفة الشراع من ايديهن.. رح يخليهن يعملوا المستحيل عشان يقضوا على حزب الله.. واول اشي على حسن نصرالله. بتعرفوا ليش؟؟ لانه القضية بينه وبين اميركا واسرائيل صارت شخصية.!! طبعاً مش هو اللي عملها شخصية, أصلا هو ولا مره صرح انه بدوا يقضي على اسرائيل!! بس اميركا واسرائيل هنه اللي تعهدوا انهن يقضوا على حسن نصرالله وعلى حزب حسن نصرالله.

عشان هيك.. الثلالوث المجرم بعده حي يرزق.. ثالوث مركب من الامبريالية العالمية, والصهيونية, والرجعية العربية.. وهدول مش ممكن يهدا لهم بال اذا ما قضوا على المقاومة اللبنانية.. المقاومة الاسلامية الشيعية. هيك اسمها الحقيقي.!

على كل حال هذا الثالوث نفسه هو اللي كان وراء نكبة فلسطين وشعبها.. واللي بعده لليوم وراء كل المصايب والبلاوي اللي بتوقع على راس الشعب الفلسطيني بشكل خاص.. وعلى الشعوب العربية والشعوب المستضعفة بشكل عام.

حكى لي صديقي ابو ميسون.. بتعرفوا ليش بقول ابو ميسون, لانه يوم ما تعرفت على افراد عيلته, يعني ولادوه وبناته.. وناديت عليه بكنية "ابو باسل".. نسبة لابني الولد البكر!! قال لي .. مله واحد متخلف, ليش ابو باسل مش ابو ميسون؟ مهي ميسون الكبيرة!! على كل حال مش هون القصة.. القصة انه ابو ميسون حضر مؤتمر دولي للجمعيات في عمان قبل اكم سنة.. وهناك من على منصة المؤتمر.. قال لممثلي الجمعيات المدنية اللي جاي من الدول العربية.. اسمعوا يا عمي, احنا وانتوا مش قد الامبريالية وامبركا.. بس تعالوا تنتفاهم.. انتوا اهتموا بالرجعية العربية.. واحنا زي ما انته شايفين عارفين كيف نهتم ونتصرف مع الصهيونية, بالفكر والممارسة.. يعني بالعربي انتوا اهتموا بالرجعية واتركولنا الصهيونية.. وشوفوا كيف رح نقدر نغيير واقعنا واقعكم لواقع افضل!! الصحيح انه لمن حكى لي ابو ميسون هالحكي.. انبسطت وقلت حلو.. هيك يمكن نقدر نعمل اشي!! بس بعد ما فكرت وراجعت الامور.. لقيت انه لا الرجعية ولا الصهيونية رح يتأثروا ما دامت الامبريالية على ظهور خيلها.. لانه يا عمي الرجعية والصهيونية بيرضعوا من بزاز الامبريالية.. يعني بالعربي المشبرح, اميركا. مهي اللي بتدعمهن بالاموال وبالسلاح وبالمؤامرات!! وبدون ما يصير انقلاب ثوري عالمي.. يحد من قوة الامبريالية وينفس اميركا.. ويقضي على تواصلها مع الرجعية والصهيونية.. ما في اشي رح يتغيير. واذا صار أي تغيير ما رح يكون الا تغيير شكلي وبس!! يعني زي ما كان يضل يقول ابو سلام : كأنا يا بدر لا رحنا ولا جينا.

برجع مرجوعنا للجواسيس.. يعني حدا بيفكر انه على صعيد توصيل المعلومات بزمن المعلوماتية.. بعد في حاجة للجاسوسية التقليدية؟!! يعني بعد في حاجة ينقلوا اخبار للعدو.. "يعني العدو حسن نصرالله".. ويحكوا له وين وقع الصاروخ الفولاني.. وقديش انقتل.. ومش عارف ايش من هالبطيخ المسمر؟؟ مهو اللي بعرف شو في على شاشة الانترنيت.. واللي بيفوت وبيقرا ردود فعل وتعليقات القراء (يعني غطاسين الانترنيت).. وخاصة على المواقع الاسرائيلية.. بقدر يعرف كل هاي التفاصيل واكثر.!! فشوا القصد من اكتشاف الجواسيس يا اسرائيل؟؟ يعني في هناك طبخة ضد الفلسطينين اللي بقيوا باراضيهن.. يعني احنا.. اللي بتسمونا عرب اسرائيل!! في شي طبخة محضرينها النا زي طبخة يوم الارض وهبة اكتوبر؟؟ يعني عشان شعبنا ما أتضامن مع الحرب المجرمة اللي ارتكبتوها.. رح اتدفعونا اشي من ثمن الدم اللي سيلتوا واللي دفعتوا.. من دمنا؟؟!! ما حدا بيعرف!! بس اكيد مخابرات اسرائيل بتعرف؟؟ بس يخلص مسلسل الجواسيس بتبين اللعبة اللي جاي!! وليومها.. يمكن يفرجها الله, ويمكن لا!!





التعليق والتصويت على الموضوع في الموقع الرئيسي


اخر الافلام

.. فنان إيطالي يقف دقيقة صمت خلال حفله دعما لفلسطين


.. فيديو يُظهر اعتداء مغني الراب شون كومز -ديدي- جسدياً على صدي



.. فيلم السرب للسقا يقترب من حصد 28 مليون جنيه بعد أسبوعين عرض


.. الفنانة مشيرة إسماعيل: شكرا للشركة المتحدة على الحفاوة بعادل



.. كل يوم - رمز للثقافة المصرية ومؤثر في كل بيت عربي.. خالد أبو