الحوار المتمدن - موبايل
الموقع الرئيسي


الجنون هو... (٨): الفضول المرضى القاتل وتتبع أخبار الناس

محمود عبد الله
أستاذ جامعي وكاتب مصري
(Dr Mahmoud Mohammad Sayed Abdallah)

2022 / 3 / 3
كتابات ساخرة


الجنون هو... (٨): الفضول المرضى القاتل وتتبع أخبار الناس
بقلم: د/ محمود محمد سيد عبد الله (أستاذ جامعي وكاتب مصري)

في رأيي، الجنون ممكن يبقى ظاهر - في بلدنا أو مجتمعنا بالذات - في أبشع صوره في "التطفل المرضي الشاذ والمقيت"..وهو (كسقطة أخلاقية) مرتبط في الغالب بالتدني الأخلاقي والسلوكي والتعليمي والإجتماعي والديني.. تلاقي فيه ناس كتيييير تموت في "المعرفة" (مش الأكاديمية أو العلمية.. يا ريييييييت.. كنا وصلنا من زماااااان وبلدنا بقت فلة!!).. المعرفة (المقصودة) هنا هي "معرفة أخبار الناس وتتبعهم والتسابق في تفسير (معرفة سبب) أي غموض (أو مشكلة-تفاصيل) في حياة شخص أو أسرة. وتضييع وقت كبيييييير في اللت والعجن والكلام الفاضي ده!!

والله الواحد قرف من النوعيات (الناس الفاضية) دي ومن البلد كلها.. تلسين على خلق الله وخوض في أعراض الناس وردح وقلة أدب وقصص وحكايات (ناهيك عن الظلم والمحسوبية وقلة العقل والدين والكيل بمكيالين والتصرفات الصغيرة إللي تنم عن عقليات تافهة مريضة ونفوس ضعيفة (غير سوية)..تصرفاتها زي العيال الصغيرة في بيئة غير صحية تهتم بالمظهر (والتفاهة) على حساب الجوهر والمضمون) ..

إحنا في بلد "اللقطة" (على رأي أحد الإعلاميين) والإشاعة إللي بنطلعها، (من خيبتنا) بنصدقها.. ونفتري على خلق الله ونتبلى عليهم.. بالذمة ده وضع أو منظر بلد قامت فيها ثورتين؟!! حسبي الله ونعم الوكيل في إللي خربوا البلد (زي ما دعيت من فترة وأنا متعلق بأستار الكعبة).. حسبي الله ونعم الوكيل في كل إللي يسخن حد على حد علشان يخربها ويقعد يتفرج.. حسبي الله ونعم الوكيل في كل من سلب حق حد أو ظلمه أو عامله بما لا يستحق.. حسبي الله ونعم الوكيل في كل من سرق وبارك الفساد وعزف على أوتار أحزان الناس وجراحهم.. حسبي الله ونعم الوكيل في كل من افترى على أحد ونشر عنه أكاذيب وإشاعات َوأباطيل وخاض في أعراض الناس وألف عليهم القصص والحكايات الكاذبة - وهم أبعد ما يكون عن تلك التفاهات.. حسبي الله ونعم الوكيل في كل من يتستر على الباطل وأهله ويحارب الحق وأهله.. حسبي الله ونعم الوكيل فيمن يرقص على جراح الناس ويجعل من سمعتهم وأجسادهم وجثثهم وأشلائهم سلما يصعد عليه لتحقيق مجد زائف..

حسبي الله ونعم الوكيل (في دبر كل صلاة) فيمن أخطأ في حقي وظلمني وتقول علي وتتبع عوراتي وعثراتي دون أن أخطئ في حقه (وأحيانا دون سابق معرفة).. حسبي الله ونعم الوكيل في كل من دبر لي شرا َأو تعمد إيذائي وَاستفزازي وتصيد الأخطاء لي وأنا قافل باب مكتبي عليا علشان لحد يشوفني - ولا يزغر عينه لجوه كده (بشكل مريض غير سوي) علشان يشوفني قاعد بأعمل إيه و مع مين - ولا أشوف حد مجرد رؤيته بتعصبني وتجيبلي إكتئاب (أو - على النقيض - تخليني مش قادر أمسك نفسي من الضحك من كتر سطحيته وتفاهة الحركات إللي بيعملها كل ما يعدي من قدام مكتبي ولا عيل صغير في ابتدائي والله)..وبعدين مش ناقصة بنت مثلا بتاعت إمبارح - فاهمة الجامعة غلط - تقعد تعدي وتبص وتضحك بطريقة مستفزة وهي رايحة جاية تتمرقع (زي ما تكون ما اتربتش) .. ما تعرفش إن إللي زيها بنبصلهم بإحتقار وقرف - ولو حد سأل عنها (لأي سبب) عمرنا ما نقول في حق النوعيات (الرديئة) دي كلمة كويسة.. إللي زيها لو شافت الطالبة الجامعية بره (في أوربا مثلا) إزاي بسيطة وناضجة وسوية وجادة ومش تافهة، كانت إنتحرت وريحتنا!! طبعا دي قلة قليلة من التافهات، لكن الغالبية العظمي من بناتنا (بالذات في الصعيد) محترمات متزنات يتسمن بالجدية والمثابرة والجد والإجتهاد والتفوق العلمي.. دول إللي بعتبرهم بناتي بجد (إللي مخلفتهمش)..

حسبي الله ونعم الوكيل في كل من سعى لإيقاع أي ضرر بي أو حاول إشعال أو تسخين أو تأجيج خلاف عابر أو موقف عادي ما يخصوش علشان يضرني (كل حاجة بتصلني على فكره وأنا قاعد باشا في مكتبي من غير أي مجهود.. ومش معنى إني متجاهل أمر ما، إني مش على علم بيه.. بس الحساب يجمع - زي ما بيقولوا.. وكله بأوان)..

نرجع للفضول (المرضى) المقيت إللي هيقتلك ونهمك بمعرفة ما وراء الأبواب (لدرجة إنك تسقط سقطة أخلاقية كبييييرة وتعقد فترة كده تتصنت على الأبواب وتدخل على الناس فجأة من غير ما تستأذن وتخبط عالباب زي خلق الله!! .. مش بأقولك "مجنون" مش طبيعي بالمرة!! ).. لو محيراك قفلة الباب دي، فده حقي..فأنا بأحب الخصوصية ياخي ومش عاوز حد (محترم) مثلا قاعد معي يبقى عرضة لإشاعات أو كلام أو بوستات من حد مريض أو متخلف إنسانيا.. اعتزالي الناس من فترة وقعدتي في مكتبي بالساعات لوحدي قافل بابي عليا (كافي خيري شري) دي نعمة كبيرة ما عرفتش بقيمتها غير قريب.. وما تزعلش حد..

وعموما، لو محيراك المسألة دي والفضول هيقتلك (زي ما وصلني)، هقولك برضه (علشان معنديش حاجة أخبيها أو أخجل منها): الوقت ده إللي بأقضيه في المكتب في الكام ساعة دول بتوع الصبحية والضهرية، ما بيخرجش عن عمل مجموعة من الأشياء (وفقا لخطة زمنية وجدول يومي لا يمكن تنفيذه كما يجب، إلا في مناخ صحي هادئ بعيد عن القيل والقال - دون التعرض لأي مقاطعة أو تطفل من أحد) أهمها:
١الصلاة والعبادة وتلاوة القرآن
٢الإطلاع في كتاب لإنهائه والبدء في غيره
٣التركيز في عمل علمي (بحث أو مقال أو كتاب أو البحث عن موضوع ما بكل تفاصيله) ..
٤نقاش علمي (فردي أو جماعي) مع باحثين بأشرف عليهم وقراءة إنتاجهم العلمي وكتابة التغذية الراجعة لهم..
٥كتابة مقالات جديدة (عامة) ونشرها على مواقع معينة..
٦تعلم شيء جديد أو تنمية مهارة شخصية أو أكاديمية أو لغوية أو مهنية..
٧مراسلة جامعات عربية وأجنبية لأسباب عديدة أونلاين..
٨تناول القهوة أو الشاي أو أي مشروب ساخن مع السيجارة في أوقات الراحة والإستجمام..
٩قراءة وتقييم أبحاث وأوراق الطلاب..وتحكيم الأدوات البحثية لكل من يثق في شخصي الضعيف من الباحثين ويطرق بابي..
١٠الإعداد باستمرار للمحاضرات والإمتحانات..
١١الجلوس مع بعض الأصدقاء القريبين إلى قلبي - وهم قليلون (بل نادرون) في هذا الزمان..
١٢تفعيل الساعات المكتبية للطلاب في مرحلتي البكالوريوس والدراسات العليا..

وحاجات كتيييييير تاني عمرها ما بتخلص.. وعلى فكرة ما فيش حاجة بره اسمها عضو هيئة تدريس يبقى فاتح مكتبه أصلا!! وعمري ما شفت حد من أساتذتي الإنجليز مثلا قاعد ومكتبه مفتوح لأي سبب!! المكتب (في مكان المفروض إنه أكاديمي) مش كافتيريا أو كوفي شوب.. فيه حاجة اسمها "خصوصية" ما يفهمهاش غير إنسان "متحضر" راقي - مش واحد بلطجي همجي بيتعامل مع الناس كإنه "عربجي"..يلقح كلام وهو رايح جاي زي الغوازي والنسوان ويتنحنح بشكل متخلف (غير طبيعي) ينم عن عقلية صغيرة غير جديرة بالإحترام أصلا!!

ربنا ينجينا من الناس العجيبة دي.. ومن البلد الغريبة دي إللي كل يوم من سيء إلى أسوأ!!
خالص تحياتي





التعليق والتصويت على الموضوع في الموقع الرئيسي


اخر الافلام

.. أفقد السقا السمع 3 أيام.. أخطر مشهد فى فيلم السرب


.. في ذكرى رحيله.. أهم أعمال الفنان الراحل وائل نور رحمة الله ع



.. كل الزوايا - الفنان يحيى الفخراني يقترح تدريس القانون كمادة


.. فلاشلايت... ما الفرق بين المسرح والسينما والستاند أب؟




.. -بيروت اند بيوند- : مشروع تجاوز حدود لبنان في دعم الموسيقى ا