الحوار المتمدن - موبايل
الموقع الرئيسي


وَلَكْ لا تمشي بجنب الحيط الحيط..!!

كامل النصيرات

2006 / 10 / 29
كتابات ساخرة


عارف وبدون ما تحكي إنك تطلب الستر يا مفضوح ..!! وعارف إنك ترسل في تقريرك عن نفسك كل يوم ( نُمرة كلسونك ولونه) ..ورغم أنك تكتب كل يوم ( نَفْس النُّمْرة ونفْس اللون ) إلاّ إن أحداً لم يسألك : شو إنت فِشْ عندك إلا هالكلسون ..قرفتْ حياتنا فيه ..؟؟ لن يسألك أحد عن ذلك ..ولن يهتموا هل هو كلسون محترم ..أم كلسون إمْبَهدل من فعل الزمن والتآكل ..!! ولن يلتفت أحد إلى أنك أصلاً تلبس كلسون ..وإلاّ إنك لابس بنطلون القماش ( إللي عمره خمس سنين ) عَ اللحم ..وإنك ماشي وإنتَ تقول : يا رب السترة ..!! سترة إيش يا مفضوح بالألوان ..وَلَكْ إنت فيديو كليب يمشي على الأرض والعرض متواصل ...!! يعني آخر إغراء بسوق نخاسة الفضائيات..!!
بدّكْ تمشي جنب الحيط ..ها ..؟؟ حيط إللي يقع عليك وعلى سلالتك ..من أوّل جِدْ كان يعتقد بأن ( الشوارب والسكسوكة ) يخلِّنْ أعتى بنت ( تْنِخْ ) ...إلى آخر طفل وُلِدَ قبل قليل وسيعتقد بعد سنين قريبة ؛ أن ( الحفّاظة ) هي بنك الانماء الجديد والوحيد الصالح لتحويشة العمر القادم...!!
أي حيط يا أهبل ..؟؟ أي حيط يا خويثة ..؟؟!! وَلَكْ صَحْصِحْ..وَلَكْ الحيط إللي بدهم يمشّوك بجنبه ؛ حيط مليء بالعقارب والحيايا وكافة أنواع القوارص واللوادغ واللواطش ..!! صَحْصِحْ يا ملطوش صَحْصِحْ..!! بدهم يسرقوا بنطلونك القماش ..ويخلّوك تطلع فوق الحيط ..ويخلّوك تمشي فوقيه ..!! وبدهم يجيبوا أمّك ومرتك وبناتك ؛ يمرقوهم من هناك بالصدفة ( المقصودة ) ..!! وَلَكْ صَحْصِحْ ..يلعن أبو أحسن حيط يخليك تطلب الستر من دائرة محيطها مكشوف لكل العالم ..!!
لسّة بدّكْ تمشي بجنب الحيط ..لسة مصمِّمْ ..؟؟ ماشي ..بس أرجوك ..خُذْ معك قَدْ ما تقدر من الساندويشات ( لأنو ما حدا رح يهتم بجوعك وبشبعك ) ..وخذ معك إبرة وخيط ( بنطلونك رح ينمزع بجنب الحيط لا محالة ).. وخذ معك حزام ( مِشْ ناسف ..ومش عشان يمسك البنطلون ) عشان تحط الحزام في رقبتك ( يعني رَسَنْ ) ..وبُكرة بس تنظرب على راسك وتفقد كل شيء بما فيها ذاكرتك ..ممكن تلاقيلك ابن حلال ؛ يشدّك من حزامك ويجيبك عند أهلك ..!!
وَلَكْ صَحْصِحْ ..الحيط مش حيطنا ..!! بُكرة الكل بقوم و رَحْ يهدّوا الحيط ..وما رَحْ يظل غير إنت ..شو يعملوا فيك ساعتها ..؟؟ أكيد ما رَحْ يعرفوا يعيشوا بدون الحيط ..عشان هيك رَح يجيبوك ويحطّوك بَدَل الحيط ..وتصير إنت الحيط المايل إللي الكل يركب وينطنط عليه ...!!! وَلَكْ صَحْصِحْ..صَحْصِحْ..!!





التعليق والتصويت على الموضوع في الموقع الرئيسي


اخر الافلام

.. فقرة غنائية بمناسبة شم النسيم مع الفنانة ياسمين علي | اللقاء

.. بعد تألقه في مسلسلي كامل العدد وفراولة.. لقاء خاص مع الفنان




.. كلمة أخيرة - فقرة غنائية بمناسبة شم النسيم مع الفنانة ياسمي

.. كلمة أخيرة - بعد تألقه في مسلسلي كامل العدد وفراولة.. لقاء




.. كلمة أخيرة - ياسمين علي بتغني من سن 8 سنين.. وباباها كان بيس