الفيسبوك
التويتر
اليوتيوب
الانستغرام
لينكدإن
تيلكرام
بنترست
بودكاست
الحوار المتمدن
- موبايل
الموقع
الرئيسي
نص بحاجة للعنوان!
ندى مصطفى رستم
2023 / 8 / 15الادب والفن
مين على الباب؟...نحنا التجنيد خالة ... خير ابني ...افتحي الباب ...انا لوحدي... اي خالة افتحي الباب لحتى نتفاهم ... حاضر دقيقة جاي ابني عم قلك لوحدي انا ....خير شو بدك...ياخالة نحنا جاين نبلغ ابنك مشان يلتحق بالخدمة العسكرية ولازم توقعي على التبليغ...... ابني مو هون مسافر.......ياخالة مو حلوة منك انت ست كبيرة عيب تكذب! مو لصالحوا، انا حذرتك اسمحي لنا ندخل البيت معنا امر بتفتيش........ ياابني عيب تدخلو على حرمة لوحدا....ليش وين زوجك؟...... زوجي عطاك عمره بمشاكل التمانينات، يمكن امك ابوك ما تزوجوا بعد، وقتها جمعوا كل رجال الحارة، وقفوهم ع الحيط ورشوهم ماضل حتى المخَبر كلن ماتوا، واخذوا البنات من بيوت اهاليهم، ولحد الان مامنعرف شي عنهم اعمارهم بين (12 و20 )سنة، اكيد اهلك حكولك شو صار بتلك الفترة ،،،
ياخالة انا مو جاي اسمع ئصص، جاي اعمل واجبي الله يخليك، قولي وين ابنك؟ ..... مصمم تعرف وينو،،، فوت قرب دخول،،، بس ياريت تفوت لحالك
حاضر.. ياشباب خليكم برا لشوف اخرتها مع هل الحرمة.
اي خالة ماني شايف شي بالجنينة .......لا ابني هو هون محل مانك واقف، نايم تحت التراب، امانة ماتاخدو خليلي ياه، ابوس ايدك ماضل لي غيرو.... بس ياخالتي لازم يدفن بالمقبرة يلي جنبك،،، وبصراحة شايف ايدو فوق التراب،،، هيك ما يجوز حرام .......اي ابني: انا خليتها فوق لتراب، مشان كل يوم الصبح المسها واطمنه انو انا معه، مارح خلي حدا ياخذه... الضنى غالي، ربي يخليك لامك،،،
كيف مات خالة?!!.
اه اه اه ياابني بذكر كان طالع يجيب خبز، وكان اول مرة ما بعذبني لانو كان ينفخ قلبي لبين ما يلبيني ياعيوني، هو كان مشغول عطول بشو ما بعرف حاطط جهاز بيشبه التلفزيون بحضنو وعم يكبس ع زرار. مابعرف شو اسمو بتبتوب، اكيد عرفت شو هو.....
اي خالة اسمه اللابتوب .*
وقاعد طول الوقت هو وهذا يلي ذكرتو، بس يومها قام باس ايدي وقال شبيك لبيكي اطلبي كل طلباتك ياحنونة، لابس ومتعطر وقتها، ضحكت قلت اليوم مابدي شي الا خبز ياموووو ، وراح ياعمري وبعد شوي جابولي ياه ودمو طولووو (ولي ع طولي على الشوفة) واذ في كتير شباب معه ميتين... ما تقول الشباب وهو، كانو طالعين بمظاهرة وحاملين ورد (هيك حكوا الناس لانها كانت ع تلفزيون بالاخبار منقولة انا ماشفتها لاني عم جهز الغدا) بس ياروحي عليهم، قابلوهم بالرصاص الله يشل ايدهم يلي امر بضربهم. اي خالة المهم ليش دفنتي ابنك هون.....عم تسأل ليش معقول مابتعرفوا وانتو منهم للحكومة، ليش خليتونا ندفن اولادنا بسلام من كتر الرصاص يلي نزل علينا ما قدرنا الله وكيلك، ويلي دفن ابنه تاني النهار راح مشان يطمئن عليه، يجي يلاقي القبر منبوش وفاضي عم ياخذوهم ياابني ميتين، عم ياخذوهم الله ما قالها. لهيك قررت دفنو بالجنينة المهم خالة بدك تسمحيلنا ناخذو إلى مقبرة ..،،(لا والف لا) ابني ربي يخلي شبابك لامك ماضل لي غيرو،،،.. ليش وين اولادك!؟؟ اخ اخ ياابني، انا كان عندي اربع شباب، ربي يحفظك لاهلك ابني الكبير، اعتقله الامن هو وابنه البكر اجت عليهم فسدية الله لا يسامحهم، ليش قال عم يتظاهروا وينادو بالحرية، سلميين ياعيوني، والله وانتو بتعرفوا انهم سلميين بتعرفوا صح ابني، ولا انا غلطانة، اي خليك ساكت لان حيطان الها اذنين، وبعد فترة بيتصلوا بمرتو لان اهلها واصلين مع الحكومة، فهمت علي، اي واصلين كانو أهلها عم يحاولوا يعرفوا وين زوج ابنتهم وابنها معتقلين. بس ما طلع معهم شي، تلفون ابني بيرن، بترد مرت ابني عليهم، بيقولو زوجك وابنك فارقوا الحياة..لما سمغا الخبر طار عقلي، ماتو تحت التعذيب، تعرف ابني لما عرضو علي صور لشباب ميتين، بأحدى الفروع الامنية، ما بذكر شو اسم الفرع قدرت اميزهم، لما شفت الصور ما بذكر مين جبلي الصور، وشفتهم ياميمتي وياريت انعمت عيوني ولا شفت ابني كان له وحمة عند عينه اليسرى، وحفيدي عنده شامة، عند خدو اليسار ياروحي، هو كان عندو البكلوريا قصدي شهادة، بدي اسألك؟ شايف هيك صور، أي اي سكوت لا تحكي، سكوتك هاد، انك تعرف اكتر مني ،،،اي خالة الله يخليك خلصي من آخر الله يرحمهم اي طول بالك، أما ابني الثاني يا قلبي هو متزوج، وعندو اربع اولاد وعندو بسطة شاي وقهوة، عند مديرية التربية ورضيان بعيشتو، وما بحب يحكي بشي ماشي، الحيط وبقول يارب السترة واذ بعد اسبوعين من خبر اخوه وابنه بيسحبو احتياط، الله وكيلك ياابني هو خادم اربع سنين اخذوا ومارجع..... الله يرحمو خالة مات شهيد في سبيل الوطن...... اوووف ياابني هيك حفظوك، ولما اجى الخبر وقعت من طولي ويلي جرح قلبي، انو ما عطونا جثته، اجى لعنا على المبرة، ضابط على اكتافه نجمتين، وكان اهالي كتير مفجوعين متلي، عطاني هويته وكرتونة صغيرة ملفوفة بشريطة مكتوب عليها اسم ابني، وكيس كبير فيه بطانية كل الامهات يلي ماتو اولادهم هيك عطوهم اوووف كيف بدي غطي حالي بهل البطانية وهو تحت التراب كيف!!؟ ! ولا بعرف وين قبره كيف?
طولت عليك ابني بالكلام سامحني انا ام ربي يخلي امك حابة فضفض يلي بقلبي باينتك ابن عالم وناس ومتربي...... شكرا خالة، بعد في شي بدك تقوليه قولي لاني تأخرت..... لحظة ابني... ياريت بسرعة تحكي ...طيب ع راسي جايتك بالحكي ابني الثالث لما شاف الاوضاع عم تضيق، وعم يكتر الموت اخوتو ماتو ورفقاتو بالحارة شي مات، شي مخطوف، شي اخذو ع جيش وشي هرب فقرر يسكر محله( هو معلم بالحلويات) ولملم شو معو مصاري حتى اخذ الاسوارتين يلي كنت بدي جوز الصغير فيهم واجا ودعني هو مرتو والله رزقه بتوأم صبيان من اول سنة جواز بتقول اقمار ربي يبعتلك، وناوي السفر الى اروبا هيك قال ...قصدك أوروبا... اي هيك صح متل ما قلت ابني ماشاءالله بتعرف كلشي باين عين الله تحرسك المهم، سافروا بكيت كتير حتى انضربت عيني اليمين من البكي حاولت ان يعدل عن قرارو صعب عنيد طول عمره طالع لخالو ، بوس ايدي وقال : يمو انا بس اصل ارسل لك ولاخي تجوا لعندي، يامو انا مابدي موت بدي كبر اولادي يامووو.... دعيت له الله ييسر امره بس قلبي قامطني، خايفة حاولت اضحك بس ماقدرت مشان مايفكر اني زعلانة وهيك شي شهر لا خبر ولا هاتف منه نار عم تشعل بقلبي وانا عم اتفرج ع التلفزيون، والا بقولوا خبر عاجل وعينك ماتشوف ياابني هل المنظر بحبايبك، شفت عالم كتير فايشة فوق سطح مية البحر، وعم يشيلوهم ع الشاطئ، وابني معانق اولادو ومرتو جنبو، عرفتو من كنزة يلي انا اشتغلتها بأيدي له، اولاده ياروحي .. كملائكة نايمةع كتف ابوهم بس تعرف ابني لحد هذه اللحظة ماني مصدقة اكيد رح يتصل موهيك ابني قلي رح يتصل امانة قلي.
ياخالة ربي يصبرك اي خالة اسمحيلنا ناخذ ابنك مشان ندفنه بالمقبرة لترقد روحه بسلام ...لا لا ارجوك للمرة الف لاتحرمني منه ومن لمسة ايدو يخليك لاهلك ... ياخالتي لازم ندفنو والمقبرة جنبك كل يوم بتزوري قبره،،، خلاص مافي امل ماشي ابني بس امانة وصي الشباب يحفرواع مهلهم مشان مايتألم او ينزعج وياريت تلفو بشرشف عرسه كنت مجهزتو له من شهرين ..كنت ناوية .اخطبلوبنت خالو ياحسرتي ....
فعلا تم دفنه بالمقبرة وكل يوم امه تقوم بزيارته من الفجر حتى آخر الليل ثم تعود لمنزلها.
اما العسكري فبعد تلك الحادثة، قرر الانشقاق اصيب بيته، ببرميل الطاغية، فخرجت زوجته وابنه الرضيع الى احدى المخيمات ع الحدود، منتظرة عودته، هو التحق بصفوف الجيش الحر، اصيب اول مرة تم علاجه، ثم عاد مرة اخرى ليشارك رفاقه، وللاسف استشهد ولا احد ذكره.. وكم شهيد بوطني لم يذكر بعد (شهيد او ضحية متل مابدكم سموه ).
الرحمة للابرياء...
|
|
التعليق والتصويت على الموضوع في الموقع الرئيسي
التعليقات
1 - مؤلمه هذه القصة
حميد صائغ
(
2023 / 8 / 15 - 12:38
)
دائما نبحث عن الفرح، دائما مواضيعكحزينة السيدة ندى! نتمنى بقادم ايام أن تفرحي وتفرح معك...كل الشوق للفرح ننتظره منك
2 - الالم يمثلنا أكثر
سهى تاجر
(
2023 / 8 / 15 - 12:50
)
نعم، الالم هذا هو وجودنا تماماً، في الفرح نهجر انفسنا، وفي الالم نكون نفسنا. تحياتي لك
3 - أول مرة
ماجدة منصور
(
2023 / 8 / 16 - 10:30
)
في حياتي أقرأ مقالا قد كتب باللغة المحكية السورية!!!!!!!0
شكرا لك فقد أدركت أن اللهجة السورية من أجمل اللهجات في الشرخ الأوسخ0
سعيدة أنا بالتعرف عليك أستاذة ندى
4 - مقاله معبره بكثافه عن بربرية الانظمة الاستبدادية ا
الدكتور صادق الكحلاوي-
(
2023 / 8 / 16 - 15:06
)
التضليلية في شرخنا الاوسخ-تثنية لتسمية استاذتنا ماجده-شكرا للاستاذة ندى-والسؤال كيف الخروج والتحرر من هذه الغمه التي طالت بهيمنتها على شعوبنا واصبحنا معرضين للفناء بين الغربة ومقابر البحار-تحياتي
5 - اللغة المحكية
ابراهيم زورو
(
2023 / 8 / 16 - 20:48
)
ما اجمل لغتك المحكية وخاصة مقالتك قديمة بعنوان الوضع السوري عاميا، كانت اجمل مقاله التي تتناول الوضع السوري بطريقة جد جميله، وهذه مقاله اخرى تشرح وضع السوري بطريقة حزينه جدا وبشكل العام، تتناولين الالم السوري عند كل الاطراف ، هي نفسها، قلمك لا مثيل له، كلما قرأت تذكرت عنوان مضمون المقال بين هدول وهدول وهاد وهداك، اجمل قلم عامي،،،كل التقدير ندوششش الغاااليه
6 - اللغة المحكية
ابراهيم زورو
(
2023 / 8 / 16 - 20:49
)
ما اجمل لغتك المحكية وخاصة مقالتك قديمة بعنوان الوضع السوري عاميا، كانت اجمل مقاله التي تتناول الوضع السوري بطريقة جد جميله، وهذه مقاله اخرى تشرح وضع السوري بطريقة حزينه جدا وبشكل العام، تتناولين الالم السوري عند كل الاطراف ، هي نفسها، قلمك لا مثيل له، كلما قرأت تذكرت عنوان مضمون المقال بين هدول وهدول وهاد وهداك، اجمل قلم عامي،،،كل التقدير ندوششش الغاااليه
.. بعد فوز فيلمها بمهرجان مالمو المخرجة شيرين مجدي دياب صعوبة ع
.. كلمة أخيرة - لقاء خاص مع الفنانة دينا الشربيني وحوار عن مشو
.. كلمة أخيرة - كواليس مشهد رقص دينا الشربيني في مسلسل كامل الع
.. دينا الشربيني: السينما دلوقتي مش بتكتب للنساء.. بيكون عندنا
.. كلمة أخيرة - سلمى أبو ضيف ومنى زكي.. شوف دينا الشربيني بتحب
