الحوار المتمدن - موبايل
الموقع الرئيسي


أمي ماتت مرتين

صفوت سابا

2023 / 12 / 24
الادب والفن


في السنة الماضية رحل عن عالمي أربع شخصيات، ندمت على فراق الأولى، وارتحت بالبعاد عن الثانية، وبكيت على رحيل الثالثة، أما الرابعة فقد جرحت بموتها فؤادي.
لهم جميعاً كتبت هذه الأبيات:

يا للي ناوي ع الرحيل
مش كنت قبل الرحلة تقول
أن النوبة دي بُعَاد طويل
إياب مفيش وذهاب يطول
وكأن ما في الصبر فرج ولا آخْرِته لازم تنول

يا للي ناوي ع الرحيل
رحلتك ماكنتش فَجأة
بس أنت كان دمك تقيل
ولا عمرها كانت مُفاجَأة
دا الخلاف في عينيك عداوة والحياة صَبَحِت مسابقة

يا للي ناوي ع الرحيل
الرحلة كانت من زمان
من سنين مش من قليل
القمحة مخنوقة بزَوَان
والعودة كانت مستحيل بعد ما فات الأوان

يا للي ناوي ع الرحيل
الرحيل م الباب بيُمْرُق
والْجِوَار مبقاش بيفرق بالكثير أو بالقليل
الذهب معدش يبرق
والشمس غابت بعدما كانت يوماتي تشرق

يا للي ناوي ع الرحيل
الرحيل مبينتهيش
بالفراق، ولا مرة فَكَّرْ يستقيل
والوجود لازم يعيش
واللي عاش مبيختشيش

***
يا للي ناوي ع الرحيل
الرحيل عُمْرُه ما كان للفُرْقَة حَلّ
أقرب له منه المستحيل
واللي عدى البحر ما ينبل
واللي ما ياخد من التلال تختل

يا للي ناوي ع الرحيل
الرحيل يزيد في كَسْرِة القلوب
فَتْفَتّها بسيوف الحروب والسلام صار مستحيل
والملح في السكر يدوب
والنَّفَس في الريح بيزهق، ينتهي بعد الهبوب

يا للي ناوي ع الرحيل
الرحيل حَفَّ حَتَّة من قلبي معاه
خللى قلبه قبل قلبي مات عليل
اتخنق بكمامة بمبي يوم بلاه
والنخلة كانت قبل ما تطرح نواة

يا للي ناوي ع الرحيل
الرحيل خلاني ناقص
بالحروف مش بالقرينة والدليل
والقرب ميجيش بالمسافة بيبقى ناقص
والمياتم بالرحيل اتحولت لعموم مراقص

***
يا للي ناوي ع الرحيل
هجر الرحيل نابه أزرق
تَنْهش نيابه في قلب جيل
يا سفينة مسيرها تغرق
ذي ريشة وسط بحر مياهه تحرق

يا للي ناوي ع الرحيل
لون الرحيل زنجي أسود
وبياض نهاره أسمر كحيل
مادد سواد جداره يَفْرَد
فوق شِيلان الضّي يَسْرَد

يا للي ناوي ع الرحيل
حلق الرحيل شبعان مرار
والقلب همه تقيل
بلغ لفرحه فرار
ناصب خيام الصحاري بعد معاش في العَمَار

يا للي ناوي ع الرحيل
غَدْر الرحيل أصله قاسي
ورِيحُه تصرخ عويل
ذنوبه فوق أم راسي
وقلبه نبضه ثواني للغدر عمره ما ناسي

***
يا للي ناوي ع الرحيل
الوطن برحيله غربة
قنديل في ضلمة بدون فتيل
الوطن يلزم له قُرْبَه
يا حَيّ مدفون في مدافن ألف تربة

يا للي ناوي ع الرحيل
ليه بترحل ناس معاك
ليه بتاخد لك زميل
شاب تفرح به القلوب تقول ملاك
هان عليك تاخد في وشك حد مش ماشي وراك

يا للي ناوي ع الرحيل
أيدُه قَابِضَةٌ بِعَقِبِ عِيسُو
والسكنى كانت في الخيام ذي النزيل
وحب رِفْقَةُ مستحيل تقدر تقيسه
أم رحلت لما دفنت حلم غيثه

يا للي ناوي ع الرحيل
عارف أن مقدرتش تسيبها
ذي أيام الطفولة في يوم وليل
ماشي تتشعبط في أيدها
وهي راضية، ماشيه حافيه بتْجَرْجَرْ صليبها

ياللي ناوي ع الرحيل
الرحيل عَطَّشْ عينيا
حَرَّض دموعي تثور، تسيل
فوق خدودي، ع الشفايف، وفي أيديا
والذكرى نَعْمَة بَتْهَوَّن عليّ

يا للي ناوي ع الرحيل
ليه بترحل … لسه بدري
مش كفاية بموت رحيل
ضخت العتمة في فجري
أمي ماتت مرتين: بعد ابويا وقبل قَدَرِي





التعليق والتصويت على الموضوع في الموقع الرئيسي


اخر الافلام

.. أدونيس: الابداع يوحد البشر والقدماء كانوا أكثر حداثة • فرانس

.. صباح العربية | بينها اللغة العربية.. رواتب خيالية لمتقني هذه



.. أغاني اليوم بموسيقى الزمن الجميل.. -صباح العربية- يلتقي فرقة

.. مت فى 10 أيام.. قصة زواج الفنان أحمد عبد الوهاب من ابنة صبحى



.. الفنانة ميار الببلاوي تنهار خلال بث مباشر بعد اتهامات داعية