الحوار المتمدن - موبايل
الموقع الرئيسي


قصائد محكية

عبد الكريم بدرخان

2024 / 3 / 19
الادب والفن


قصائد محكية للشاعر السوري عبد الكريم بدرخان:

(( بحبك كأنك حمص ))

بحبك كأنك حمصْ
بحبك كأنك شامْ
والقلب يرقص رقصْ
وقت الـ عَ صدرك نامْ

بحبك كأنو الليل وقمارُهْ
خلْقوا لضمِّكْ عالـهَدَا
ويطلع صبح من وجهِكْ نهارُهْ
أنت اللي ما متلك حَدَا

بحبك كأنو الشعر وجنونُهْ
نقطة ببحر صَوتِكْ
دمعة فرَحْ غصّتْ على جفونُهْ
تسمع صلا صمتك

بحبك كأنك حمصْ
والعاصي محبوبِكْ
والقبلة كانت قُدْسْ
واليوم عَ دروبكْ

* * *

عبد الكريم بدرخان - اسطنبول 22-2-2014

------------------------------------------


(( سمعان صوتـك من حلب ))

سمعان صوتِـكْ من حلبْ
جايي على حصان التعبْ
طال الطريقْ
مدّيتْ لِـكْ رمشيْ
لـ تنزلي و تمشيْ
و تنامي بعيون الغريقْ

سمعان صوتِـكْ من حلبْ
جايي على غيمة طَـرَبْ
بفتحـلِـكْ بوابيْ
امشيْ على ترابيْ
بـ يقلُب تحت رجلكْ دَهَبْ

سمعان صوتِـكْ من حلبْ
جايي على مهلو
عم يبتعدْ كلما اقتربْ
والغالي يرخصلو

سمعان صوتكْ من حلبْ
شلّال بالقلب انسكبْ
عم ألحـقِـكْ حافيْ
و تندهلِـكْ شفافيْ :
" عطشان يا بنت العِـنَـبْ "

* * *

عبد الكريم بدرخان - عينتاب 9-9-2013
------------------------------------------


(( قلعة حلب ))

عنديْ وَرَا قلعةْ حلبْ
عينين أغلى من الدَهَبْ
عم يضحكو..
بيناتنا ليل وسَـفَـرْ
ودروب محَّاها المطرْ
لمّا بكو..
* * *
ماشي على دربكْ
بصرخْ: أنا بحبِّكْ!
لـ تهرهر وْرَاق العمرْ
وتبرعم الكلْماتْ!
هالليل عمْ يسرُقْ من عيونِكْ جمرْ
ويرشرش النجْماتْ
* * *
عنديْ ورا قلعةْ حلبْ
صيفين من تين وعِنَبْ
لا تقطفي العنقودْ
بإيدين أصفى من القَدَحْ
خلّيهْ عَ غصون المسا موعودْ
عم ينزُف نبيد الـفَـرَحْ
* * *
بحكيلِكْ حكايةْ
وجهِكْ قمرْ
عتم السما مرايةْ
بيناتنا ليل وسـفَـرْ
وخيامْ منْ بدو وحَضَرْ
وبكل دربْ رايةْ
* * *
عندي ورا قلعةْ حلبْ
رموشِكْ أو سيوف العربْ؟
محنِـيَّـةْ أحلاميْ
عـرَّشْ على كتافي التعَبْ
هـدّلِّـي أيّـاميْ!
* * *

عبد الكريم بدرخان – عينتاب 21-9-2013
------------------------------------------


(( بيت أهلي ))

دقّ الهَوا باللّيل عَ بوابيْ
قلّي رجِـعْ أيلولْ
هَرهَرْ دمعْ أسود عَلَى كتابيْ
محّا اللّي بدّي قولْ

دقّ الهوا شبّاكنا المكسورْ
ذكَّـرني بغيابِـكْ
يا مصَوَّرةْ ما بَـيْـن نار و نُورْ
مشتاق لترابِـكْ

* * *

أنتِ بيت أهلي
أنتِ الصباح الـ بشَرْبو
بالبَـنّ عَ مهلي
أنتِ المسا الـ عم ألحقو
ولشموسِك بصلّي
أنتِ حمص المحاصَرةْ
وعمْ تختنق متليْ
وحجارها السودا
نزلِـتْ من دموعِـكْ معَ الكحـلِـةْ
أنتِ بلادي الضايعةْ
عَ رمال عمْ تغليْ
أنتِ الحمام الـ ناطرو
لَـ يطير و يعلّـي
أنتِ اللي ما متلِكْ حَدَا
أو ما حدا متليْ

مالكْ اسمْ
ولا بتنحكي بـ جملةْ
ومتلْ الحلمْ
عم تكبري و تحليْ

يا دمعة بلادي
وضحكة بيت أهلي
يا رموشْ .. سجّادة صَلَا
وعيونِـكِ الـقِـبْـلِـةْ ..!!

* * *

عبد الكريم بدرخان – إسطنبول 25-3-2014
------------------------------------------


(( رسملي بـلـد ))

رسمْليْ بـلـدْ
أحلى من الأحلامْ
بغفا على حجارا ولـدْ
وبفيق عَ صْوات الحمامْ
رسمْليْ بـلـدْ
دمعي حبرْ ، ورموشْ صارو قلامْ
عيوني عمْ تشوف الأبـدْ
بيشبهْ حواري الشـامْ

كانت صبيّة مكـلّلةْ بالغـارْ
شَـعرا أغاني مجدّلـةْ
وصوتـا عطر بالدارْ
بتنام عَ سرير القمرْ
بيطلعْ من العتمةْ نهارْ
بتضحكْ متلْ غيمة مطرْ
والميّ تشعل نـارْ

رسمْلي بلدْ
أحلى من الأحلامْ
فيها مـآدن للأبـدْ
بتسـبّـحْ بأنـغـامْ
رسمْلي بلدْ
تشبه حواري الشامْ
فيها كنايس بالأحـدْ
بتعـطِّـر الأيـامْ

كانتْ بنتْ حلوةْ
عيونـا صلاةْ مكـحّـلـةْ
وشفافْ عم تـرويْ
غطّيتْ إيديْ بالجمرْ
حطّيتْ هالـركـوةْ
سَـمرا متلْ خيمةْ عربْ
من لـونكِ القهوةْ
سبحان مَنْ خـلّا المسا
يشعل ألف شهوةْ !

رسمْليْ بـلـدْ
أحلى من الأحلامْ
عمري أنـا .. موجة زبـدْ
والشطّ أرض الـشـامْ

* * *

عبد الكريم بدرخان – عينتاب 12-5-2014
------------------------------------------


(( تكسير ))

ومكسّرةْ رموش الزمنْ
لو تفتحي عينيْ
رحْ تغرقي بدمع الوطنْ
بين السما و بينيْ

ومكسّرةْ غصون الكلامْ
لو تسمعي صوتي
رح تجفل طيور الحمامْ
و تغنّي عَ موتي

ومكسّرةْ سيوف العشقْ
لو تجرحي قلبي
رح تنزف ورود الصدقْ
و تفـتِّـح بدربي

ومكسّرةْ قداح الخمرْ
لو تـعْـصِري روحي
رح تطفح دنان العمرْ
وما بتسْـكَـر جروحي

* * *

عبد الكريم بدرخان – عينتاب 5-6-2013
------------------------------------------


(( حليان وجهك ))

عم يبكي ع فراقِـكْ
لا تبكي عَ فراقـو
خلّي العمر يمشي
و يهرهِـرْ وراقـو

كنتي متل ما كانْ
عصفور عالحيطانْ
بتغيبي عن عينو دهرْ
و بينطركْ طول العمرْ
لو ترجعي .. من عتمة النسيانْ
" حليان وجهِـكْ يا بنت حليانْ
سكران عنقود الخصر سكرانْ
الإيدين ما عاد توسعكْ
عم يكبر الرمّـانْ "

عم يبكي ع فراقكْ
لا تسمعي الكلماتْ
سكران من قهرو
سارح على الطرقاتْ

* * *

عبد الكريم بدرخان عينتاب 5-7-2013
------------------------------------------


(( وقت الندي ))

متلْ الوردْ وقت النديْ
مـرّيتي من حدّيْ
لملمتْ خصلاتْ الشَـعرْ
وحدةْ ورا وحدةْ
قطفتُنْ من نجوم المسا
زرعـتُـنْ عَ المخدّةْ
سهران أكتبلِكْ شِـعرْ
لكْ غيرو ما عنديْ
هالليل قهوة عالجمرْ
والصوت بِـوَدّي
رسمتِكْ على ضفاف القمرْ
وردةْ ورا وردةْ
سقيتِكْ من دموع العمرْ
الطوفان من بعديْ
طـال السهرْ
طـال السهرْ
و بقيتْ لَـوحديْ

* * *

عبد الكريم بدرخان – عينتاب 11-8-2013
------------------------------------------





التعليق والتصويت على الموضوع في الموقع الرئيسي


اخر الافلام

.. مليون و600 ألف جنيه يحققها فيلم السرب فى اول يوم عرض


.. أفقد السقا السمع 3 أيام.. أخطر مشهد فى فيلم السرب




.. في ذكرى رحيله.. أهم أعمال الفنان الراحل وائل نور رحمة الله ع

.. كل الزوايا - الفنان يحيى الفخراني يقترح تدريس القانون كمادة




.. فلاشلايت... ما الفرق بين المسرح والسينما والستاند أب؟