الحوار المتمدن - موبايل
الموقع الرئيسي


حكايات شعبية من مدينة يثرب 3

حسين سليم
(Hussain Saleem)

2024 / 10 / 3
الادب والفن


شايل العليجة !*
(5)
في السوق، كان يحاول استفزازه بحصوة عادية وجدها بالشارع. بعد السلام قال:
- "ابو جاسم"، اريد تسويلي محبس من هاي الحصوة، مال زواج!
- تفضل اغاتي، زار عكا ومكة، وتاليها اجاني ليثرب يدور محبس زواج.
- شسوي توفيج.
- انت توبتنا، يا بنية انعرفك عليها، تروح تحجيلها، على الوطنية والصراع الطبقي! وبعدين افتريت العالم كله، حتى امك تگول حتى لو شايف صينية، مو مشكلة يطلعون الجهال سادة صينيين!
- انت، شجابك على شغل المحابس والسبح؟
- هم توفيج مثل توفيج زواجك.
- دشوفنا محبس من هاي الحصوة!
- اخاف انت هم مصدك، اكل السمج يجلب الرزق يوم الأربعاء، وكنس البيت وگت الغروب ما يصلح؟!
- لا .. بس المحبس غير.اكو مال حظ..
- واكو محبس مال رزق، ومحبس ضد الأمراض، محبس ضد الرصاص، محبس يخلي الرجال ما يدور غير زوجته، محبس مال محبة، ...
- يعني بهل الحالة ما نحتاج شي؛ لا عمل، لا أطباء ولا مستشفيات، وغيرها، هي الأمور تجي وحدها.
- يمعود انت تصدگ!
- لعد انت ليش تبيع للناس محابس؟
- لعد أبيع اللهم حچي حتى يگولون عني رومانسي، بس "الرثة" ضالة، وتزداد وروح جدك!
- مو قصدي هذا.
- اخي الناس محتاجة شي تجلب بيه، هي تريد هذا!
- بس انت تختلف.
- ما كو شغل و الناس تجبرك على هذا، مثل فلم (البيضة والحجر). تريد وهم تعيش بيه يومها.
- المهم، انت متگلي، شجابك؟! مو ما عوّلت خلصت بجلدك!
- توفيج!
- هم گال توفيج! جمالة جايب وياه خناكه، بالله احنا تحت رحمة بيان 13 ماتدري ياساعة يطلع من القمقم! بس انت فوگ الضيم هذا، مشمول بالقائمة ألبّيها حجي "شارلي شابلن".
- شسوي، وين ما توصل خل توصل.
- كل فترة سادين صفحة الفيس، انت ما تگعد راحة،كوة! الله لا يعطيهم، شمروك اهناك بحلك الأسد! خو ما جايب التليفون وياك؟ ههه
- لا ..خليته بالبيت! ههه
- ولا يهمك، انت احسن منّا، گتلتك ذات طابع اممي موش محلي مثلنا.
- خلف الله عليك.
- دمنا مطلوب من زمن قال وبلة، اتگلهم هذا التفاؤل زايد ما يفيد، خلوا ثلث او ربع علني والباجي سري، ما يرضون!
- هم أدرى، أهل مكة أدرى بشعابها!
- گوة أنت عينك جوية، درويش مو مثل غيرك، ما تعرف تمشي وادبر امورك! لا اهنا ولا اهناك! تگول "العليجة" مكتوبة باسمك، وين ما تروح شايلها وياك!

* الشخصيات في "يثرب" مزيج من الخيال والواقع.





التعليق والتصويت على الموضوع في الموقع الرئيسي


اخر الافلام

.. كيف يمكن للإعلام الموسيقي مساعدة ودعم القطاع السياحي في لبنا

.. هتاف لفلسطين خلال حفل غنائي لفنان بورتوريكي في إسبانيا




.. يطلب من الجمهور الدعاء له.. الأب بطرس دانيال يكشف تفاصيل الح

.. مريض عراقي يعزف ويغني لأم كلثوم أثناء إجرائه عملية جراحية في



.. صباح العربية | مريض عراقي يغني لأم كلثوم أثناء خضوعه لجراحة