الحوار المتمدن - موبايل
الموقع الرئيسي


قاسم علي فنجان: يسارية التخوين وبطل العركات

جاسم سلام عادل

2025 / 2 / 17
مواضيع وابحاث سياسية


مقال باللهجة العراقية حتى يفهم قاسم علي فنجان
بالوسط السياسي، دائمًا نلكه ناس تتبجح بالمبادئ وتدّعي إنها تمتلك الحقيقة المطلقة، بس على أرض الواقع تسوي العكس تمامًا. قاسم علي فنجان نموذج حي لهذول الناس بالوسط اليساري، واحد يحچي بالثورية والتغيير، بس أول ما أحد يطرح عليه نقد، يسد أذانه، يرفض النقاش، ويمنع حتى التعليقات على مقالاته بـالحوار المتمدن، وكأنو كلامه منزل من السما. يشوف نفسه وتنظيمه الانشقاقي "حركة البديل الشيوعي" أنه أعظم تنظيم على وجه الأرض، بينما هو بنفسه ينشر مقالات يهاجم بيها كل القوى اليسارية، وهو يدري زين أنه لو أي رفيق من جماعته كتب نقد ضده، ما راح ينشر لا بجرايدهم ولا حتى بالمناشير الداخلية، اللي أصلاً محد يقرها غير جم نفر من جماعتهم! ا يكتفي فنجان بالهجوم على كل الفصائل اليسارية والشخصيات البارزة، لا، بل يتبنى عقلية متعالية استبدادية، يخلي أي اختلاف وياه "خروج عن الماركسية"، وخيانة عظمى. وهو يدري زين إنو أساس الفكر الماركسي قائم على الحوار والصراع الفكري، بس هو نظامه قائم على الإقصاء، الدكتاتورية، والعبادة العمياء لشخص مؤيد أحمد، اللي انشق عن الحزب الشيوعي العمالي العراقي بعد ما أزيح من منصب السكرتير من قبل رفاقه! وكأنه هو المرشد الأعلى للماركسية اللينينية، وأي نقد إله يعني الانحراف والخيانة. قبل فترة، بدل ما ينشغل ببناء تنظيم قوي، شنّ هجوم على ناس يساريين معروفين، لأنهم ما يتفقون وياه فكريًا. يعني بدل ما يحترم التعددية الفكرية، بدل ما يحاور، راح يتبع أسلوب الشيطنة والتخوين ، وكأنو الماركسية صارت ملك شخصي إله وإلى جماعته اللي مقدسين أفكاره. وين الديمقراطية اللي تحچي عنها يا رفيق؟ هل عندك الجرأة تخلي أحد ينتقد السكرتير الأبدي مؤيد أحمد وينشر بصحفكم؟ لو أي واحد يحاول يطرح مجرد سؤال عن قيادتكم يكون مصيره الطرد، مثل ما صار ويا غيره؟ التجارب السابقة أثبتت أنه تنظيمكم الحالي والسابق واحد من أكثر التنظيمات اللي ما تتحمل النقد الداخلي، وأي خلاف فكري يتحول إلى سبب للطرد والاتهام بالخيانة، بدل ما يكون فرصة للنقاش والتطوير. وبالنهاية، شنو النتيجة؟ بقيتوا بس جم نفر، عايشين على بركات "الجهات المانحة"، ومنعزلين عن الواقع. بدل ما تشتغلون على بناء حركة يسارية مؤثرة، كل طاقتكم منصبّة على مهاجمة الآخرين، وكأنو معركتكم الحقيقية مو ضد الرأسمالية والاستغلال، بل ضد رفاقكم اليساريين! حركة تدّعي الثورية، بس تشتغل بأساليب استبدادية، شلون ممكن تكونون البديل الثوري؟ التناقض بين شعاراتكم وممارساتكم هو اللي خلاكم مجرد مجاميع فكرية معزولة وتنظير بدون أي تأثير حقيقي على أرض الواقع. الماركسية الحقيقية مو شعارات ولا تنظير فارغ، الماركسية ممارسة، ارتباط بالطبقة العاملة، فهم علمي للواقع، وتغيير ثوري حقيقي. بس أنتم بدل ما تتصلون بالجماهير، بدل ما تنظمون العمال، بدل ما تشتغلون على بناء قوى ثورية حقيقية، كل طاقتكم صايرة على الانشقاقات المستمرة والعركات، وأخيرًا استبدال أسماء تنظيماتكم بين يوم وليلة، وكأنو تغيير الاسم راح يخليكم مؤثرين بالمشهد السياسي!
سؤال أخير، يا رفيق النضال المعظم: كم عامل بالعراق يعلم معنى "الشيوعية البروليتارية" اللي صدعتوا روسنا بيها؟ إذا ماكو ارتباط بالعمال، إذا التنظيم كاعد على قارعة الطريق، إذا أنتم منفصلين عن الجماهير، شلون تريدون تكونون البديل الثوري الشيوعي البروليتاري العمالي اليساري الماركسي .....................؟ صرتوا تنافسون القذافي بجماهيريته العظمى، كل يوم طالعين لنا باسم طويل جديد، وكل اسم أغرب من اللي قبله!

نصيحة، تعلموا الديمقراطية الحزبية من الحزب الشيوعي العراقي، بدل هاي العركات الصبيانية اللي صارت مسخرة!





التعليق والتصويت على الموضوع في الموقع الرئيسي


التعليقات

1 - استفسار
معلق عراقي ( 2025 / 2 / 18 - 09:54 )
السيد كاتب المقال
الرجاء توضيح نوع التخوين، حيث انك لم تذكر سوى التخوين ثم انتقادات عمومية لبعض التيارات السياسية. آخر ما قرأت لـ قاسم علي فنجان هو انتقاد اياد علاوي الذي كان يجاهر بكونه يفتخر بتاريخه كـبعثي - قاوم- الشيوعيين. ومن المعلوم إن اياد علاوي كان من انشط عناصر الحرس القومي الذي يكفي اسمه الذي اصبح عنوانا للقتل والإستهتار والجريمة..
اليس الأجدر بشخص يحمل إسم احد ضحايا الحرس القومي أن يبدأ بنقد علاوي ويمدح مقال قاسم علي فنجان.

اخر الافلام

.. غـــزة: أي تــداعــيــات لــلــعــمــلـيـة الــبــريـة؟


.. ليبيا: هل تصمد حكومة الدبيبة؟ • فرانس 24 / FRANCE 24




.. ليبيا: حكومة الدبيبة تعلن مواصلة الجهود لتثبيت وقف إطلاق ال

.. مؤسسة الفكر العربي تخصص يوما بباريس للفكر والإبداع في الدول




.. خلال أداء إسرائيل في-يوروفيجن-: هل تعمد المنظمون إخفاء صيحات